O Le Galuega Taua Silisili
E alaala le tusitala i Iuta, ISA.
“O a’u nei, o loo ia te outou e pei o le auauna” (Luka 22:27).
E fiafia Amelia e asiasi ia Tinamatua. Sa fiafia o ia e taaloalo i manu meataalo ma faapupuu i le palanikete telē malūlū o Tinamatua. Ae o le asō sa lē mo le taalo. O le asō sa mo le fesoasoani atu.
I le agai atu i le fale o Tinamatua, sa talanoa uso o Amelia e uiga i galuega sa latou mananao e fai.
Sa manao Sara e salu le fale. Sa manao Emily e solo. Ma sa faatonu e Mama ia Alyssa e fufulu ia faamalama.
“Ae a au?” Na fesili ai Amelia. “Pe tatau ona ou fesoasoani e tafi le pefu?”
“E i ai sa’u galuega faapitoa mo oe,” na fai atu ai Tina. “Ou te manao ia te oe e faalogo.”
Sa faatalitali Amelia. “Ua lelei, o lea ou te faalogo atu. O le a?
“O le galuega lena!” Sa fai atu ai Tina ma se ataata. “Tau lava o le faalogo. Saofafai ma Tinamatua ma faalogo a o tautala o ia. Atonu o le galuega taua silisili lena tatou te faia i le aso atoa.”
E mafai faapefea ona avea le faalogo ma galuega taua silisili? Na manatunatu ai Amelia. Sa foliga mai o le tafi o le pefu o se galuega e sili ona moni! Ae sa naunau Amelia e taumafai.
Sa fiafia Tinamatua e vaai ia i latou. Sa taufai amata uma le isi vaega ia latou galuega. Sa alu ane Amelia ma nofo i talane o Tinamatua i luga o le nofoa faamalū umi. Sa vaaia e Amelia le lapiti vavae i le tulimanu. “Manaia lau lapiti,” sa ia fai atu ai.
Sa ataata Tinamatua. “Pe na ou faamatala atu ia te oe e uiga i lo’u tuagane o Mel ma le lapiti pepe?”
Sa te’i Amelia. “O se lapiti mo’i?
Sa lue atu le ulu o Tinamatua. “O se lapiti matuaoti na ia mauaina. Sa ia momonoina i totonu o lona mitiafu ina ia saogalemu.” Sa faamatala e Tinamatua ia Amelia le sai o le lapiti na fau e Mel.
O lena tala na manatua ai e Tinamatua isi tala. Sa ia faamatala e uiga i se tamai povi fagafao sa ia faaigoaina ia Star. Sa masani ona ia tietie i le tua o Star. Sa ata faamimigi ia Amelia a o ia vaai faalemafaufau ia Tinamatua o tietie i se tamai povi pepe. E lei faigofie, le vaai faalemafaufau ia te ia o se teineitiiti.
Sa talanoa ma talanoa ai lava Tinamatua. Sa ia toe faamatala foi le tala i le lapiti. O le isi taimi, sa ia malolo i le ogatotonu o se tala, ona toe amata foi lea.
Sa taumafai Amelia e faalogologo pea, ae ua amata ona lelavā. O la lava e galulue Mama ma isi teine.
Na faapupuu ifo Amelia i lona nofoa. Sa faigata ona saofai ma faalogo! Ae sa ataata Tinamatua. Sa foliga fiafia o ia e faasoa atu ana tala.
I ni nai minute mulimuli ane, na sau ai i totonu Tina. “Ua uma! Ua matou sauni e o.”
“E ese le manaia,” sa fai atu ai Tinamatua ia Amelia. “E ese lo’u fiafia ta te talanoa!”
Sa matua fusi e Amelia lona Tinamatua. Na ia vaaia loimata i mata o Tinamatua.
“O le a se mea ua tupu?” Na fesili atu ai Amelia.
“E leai se mea o faaletonu,” o le tala lea a Tinamatua. “Faafetai mo le ta talatalanoaga. Ou te alofa ia te oe.”
Sa lagona e Amelia le mafanafana i lona loto. “Ou te alofa foi ia te oe,” na ia fai atu ai. “Ou te toe vave sau.”
A o agai atu i le fale, sa fesili Alyssa, “Na faapefea le faalogologo Amelia?”
Sa faigata nai lo le mea na ou mafaufau i ai Ou te manatu na uma lo’u faalogologo ae lei uma na talanoa Tinamatua!” “Sa e lelei tele!” o le tala lea a Tina.“Faafetai,” o le tali lea a Amelia. “O nisi o tala na ia faamatala sa malie. na e iloaina sa i ai se tamai povi fagafao a Tinamatua?”
“Pei se povi pepe?” Na fesili ai Sara.
“Ioe! Sa masani ona tietie ai Tinamatua,” sa fai atu ai Amelia ma lue lona ulu. “O lona igoa o Star.”
Sa faamatala atu e Amelia ia i latou isi tala uma a Tinamatua. Sa ese le manaia o le aoao o le mau mea e uiga ia te ia.
Sa ataata Emily. “Peiseai e lelei pe a fesuia’i a ta galuega i le isi taimi. Ou te manao i se avanoa e faalogologo ai!” ●