Musumusuga ma le Sau, Mulimuli Mai ia te A’u
A o tapenapena se lesona mo tamaitai talavou, sa tonu ia te au e faataitai se mea fou.
Ata na tusia e David Green
Sa faatopetope ona ou autilo i itulau o le lesona a Tamaitai Talavou sa tuu ou te faia i le Aso Sa e sosoo ai. O upusii a le Pulega Aoao sa aofia ai e taua ma talafeagai, ae ua leva.
Mo se faataitaiga, o Peresitene Spencer W. Kimball (1895--1985) o le Peresitene o le Ekalesia i le vaitaimi na ou papatiso ai. Sa ou faatauaina ana saunoaga, ia sa tumu ai le tusi lesona, ae sa ou popole o le a le fesootai ia tamaitai talavou i upu a taitai sa latou le iloaina.
Sa ou tatalo mo se taitaiga ma sa uunaia au e faataitai se mea fou. Sa ou faafoua nisi o tala ma faaaofia ai upusii mai le konafesi aoao aupito lata mai, ma sii mai ai Peresitene Thomas S. Monson (1927--2018). Sa lofituina taunuuga. Sa faapitoa se matou lesona ma le tele o le auai e fefaasoaai. Mai lena taimi, sa ou faaaogaina le tusi lesona o se taiala e tapenapena ai a’u lesona.
O na tapenaga e manaomia ai galuega faaopoopo. E tatau ona ou suesue atili, e tatau ona ou iloaina atili ia tamaitai talavou, ma e tatau ona ou mafaufau e uiga i o latou aafiaga. Ona ou vaavaai ai lea mo faataitaiga ma upu mai taitai o soifua o le Ekalesia e mafai ona ou faaaogaina e faatatau ai tala i o latou olaga. Sa ou fiafia e alu i se maila faaopoopo mo tamaitai talavou ona o lo’u alofa mo i latou.
Sa oo ina matauina e o’u taitai le mea sa ou faia. Sa ou popole nei o latou otegiaina a’u i le faatautee, ae sa latou uunaia au e faaauau pea.
I ni nai vaiaso a o loma le faaiuga o le 2012, sa faatonuina ai taitai o le autalavou i la matou siteki e auai i se fonotaga faaleaoaoga lea na folasia mai ai e taitai o le siteki se mataupu fou e aoaoina mo le autalavou e igoa o le Sau, Mulimuli Mai ia te A’u.
Sa ou tau le talitonu i le mea na ou faalogoina. Sa faamalamalama mai e taitai o le siteki e faapea, e tatau ona matou aoao atu e faapei ona sa aoao mai le Faaola, saili musumusuga mo a matou lesona mai perofeta soifua ma aposetolo, ma ia iloa atili a tatou autalavou. Ua uma ona i ai sa’u molimau o na mea.
Sa fai fesili a isi pe faapefea ona saunia lesona, ae mo a’u, sa matuai manino lelei lea faiga fou. Sa ou lagonaina o le Sau, Mulimuli Mai ia te A’u o se tali mai le Alii ou te lei faatautee. Sa ou lagonaina sa Ia saunia a’u e aoao atu lenei mataupu aoaoina fou. Ou te iloa afai tatou te lotomaualalo ma maelega ma faalogo i le Agaga Paia, o le a tatou ogatusa ma suiga uma e fofogaina mai e o tatou perofeta ma aposetolo.