“ເຕີບໂຕຢູ່ໃນຫລັກທຳແຫ່ງການເປີດເຜີຍ,” Liahona, ເດືອນມັງກອນ 2021
ຂ່າວສານປະຈຳເດືອນ Liahona, ເດືອນມັງກອນ 2021
ເຕີບໂຕ ຢູ່ໃນຫລັກທຳແຫ່ງການເປີດເຜີຍ
ຂ້າພະເຈົ້າຂໍຊຸກຍູ້ທ່ານໃຫ້ດຳເນີນຕາມບາດກ້າວທີ່ຈຳເປັນ ເພື່ອຈະໄດ້ຍິນພຣະຜູ້ເປັນເຈົ້າໃຫ້ດີຂຶ້ນ ແລະ ຫລາຍຂຶ້ນເລື້ອຍໆ ເພື່ອວ່າທ່ານຈະສາມາດໄດ້ຮັບຄວາມຮູ້ແຈ້ງທີ່ພຣະອົງປະສົງຈະມອບໃຫ້ທ່ານ.
ຮູບພາບຈາກ Getty Images
ໃນວັນທີ 30 ເດືອນກັນຍາ, 2017, ຫລັງຈາກພາກບ່າຍຂອງກອງປະຊຸມໃຫຍ່ສາມັນ, ຂ້າພະເຈົ້າໄດ້ໄປແວ່ໂຮງໝໍເພື່ອຢ້ຽມຢາມສະມາຊິກກຸ່ມທີ່ຮັກຂອງຂ້າພະເຈົ້າ ແອວເດີ ຣໍເບີດ ດີ ແຮວສ໌. ເພິ່ນໄດ້ໄປນອນໂຮງໝໍຕັ້ງແຕ່ເປັນຫົວໃຈວາຍສາມສີ່ມື້ກ່ອນນັ້ນ.
ພວກເຮົາໄດ້ຢ້ຽມຢາມກັນຢ່າງມີຄວາມສຸກ, ແລະ ເພິ່ນກໍເບິ່ງຄືວ່າກຳລັງມີອາການດີຂຶ້ນ. ເພິ່ນໄດ້ຫາຍໃຈດ້ວຍຕົນເອງ, ຊຶ່ງເປັນສັນຍານທີ່ດີ.
ແຕ່, ໃນແລງວັນນັ້ນ, ພຣະວິນຍານໄດ້ກ່າວຕໍ່ຫົວໃຈ ແລະ ຈິດໃຈຂອງຂ້າພະເຈົ້າວ່າ ຂ້າພະເຈົ້າຄວນກັບຄືນໄປໂຮງໝໍໃນວັນອາທິດ. ລະຫວ່າງກອງປະຊຸມໃຫຍ່ສາມັນພາກເຊົ້າວັນອາທິດ, ຄວາມປະທັບໃຈຢ່າງແຮງກ້ານັ້ນກໍໄດ້ກັບຄືນມາ. ຂ້າພະເຈົ້າໄດ້ຮູ້ສຶກວ່າຂ້າພະເຈົ້າຄວນບໍ່ກິນເຂົ້າທ່ຽງ ແລະ ຟ້າວໄປຫາ ແອວເດີ ແຮວສ໌ ທັນທີທີ່ກອງປະຊຸມພາກເຊົ້າຈົບລົງ, ຊຶ່ງຂ້າພະເຈົ້າກໍໄດ້ເຮັດ.
ຕອນຂ້າພະເຈົ້າໄປເຖິງ, ຂ້າພະເຈົ້າກໍເຫັນໄດ້ວ່າ ອາການຂອງແອວເດີ ແຮວສ໌ ໄດ້ຊຸດໂຊມລົງ. ໜ້າເສົ້າໃຈທີ່, ເພິ່ນໄດ້ເສຍຊີວິດໄປ 10 ນາທີຫລັງຈາກຂ້າພະເຈົ້າໄດ້ໄປເຖິງ, ແຕ່ຂ້າພະເຈົ້າຮູ້ສຶກບຸນຄຸນທີ່ຂ້າພະເຈົ້າໄດ້ຢູ່ຄຽງຂ້າງເພິ່ນ ພ້ອມດ້ວຍມາຣີ ພັນລະຍາທີ່ຮັກຂອງເພິ່ນ, ແລະ ລູກຊາຍສອງຄົນຂອງພວກເພິ່ນຕອນເພິ່ນໄດ້ຈາກຊີວິດນີ້ໄປ.
ຂ້າພະເຈົ້າກະຕັນຍູທີ່ສຸລະສຽງກະຊິບຂອງພຣະວິນຍານບໍລິສຸດໄດ້ກະຕຸ້ນຂ້າພະເຈົ້າໃຫ້ເຮັດສິ່ງໃດສິ່ງໜຶ່ງທີ່ຖ້າບໍ່ດັ່ງນັ້ນຂ້າພະເຈົ້າອາດບໍ່ໄດ້ເຮັດ. ແລະ ຂ້າພະເຈົ້າກະຕັນຍູສຳລັບຄວາມເປັນຈິງຂອງການເປີດເຜີຍ ແລະ ວ່າຟ້າສະຫວັນກໍເປີດອີກຄັ້ງ.
ປີນີ້ ຈຸດສຸມຂອງການສຶກສາສ່ວນຕົວ ແລະ ໃນຫ້ອງຮຽນຂອງເຮົາຈະເປັນພຣະຄຳພີ ຄຳສອນ ແລະ ພັນທະສັນຍາ. “ການເປີດເຜີຍຈາກສະຫວັນ ແລະ ການປະກາດທີ່ດົນໃຈ” ເຫລົ່ານີ້ສາມາດເປັນພອນໃຫ້ແກ່ທຸກຄົນທີ່ສຶກສາມັນ ແລະ ປະຕິບັດຕາມຂໍ້ແນະນຳຈາກສະຫວັນເຫລົ່ານັ້ນ. ມັນເຊື້ອເຊີນ “ທຸກຜູ້ຄົນຢູ່ທຸກແຫ່ງຫົນໃຫ້ຟັງສຸລະສຽງຂອງອົງພຣະເຢຊູຄຣິດເຈົ້າ,”1 ເພາະຕາມຈິງແລ້ວ “ສຸລະສຽງຂອງພຣະຜູ້ເປັນເຈົ້າມາເຖິງມະນຸດທັງປວງ” (ຄຳສອນ ແລະ ພັນທະສັນຍາ 1:2).
ອັນຕະລາຍ, ຄວາມມືດ, ແລະ ການຫລອກລວງ
ປະສົບການທີ່ຫຍຸ້ງຍາກທາງຮ່າງກາຍ ແລະ ທາງວິນຍານເປັນພາກສ່ວນຂອງຊີວິດຢູ່ເທິງແຜ່ນດິນໂລກ, ດັ່ງທີ່ການແຜ່ລະບາດຂອງພະຍາດ ໂຄວິດ-19 ໄດ້ເຕືອນໃຈເຮົາ. ພຣະຜູ້ຊ່ວຍໃຫ້ລອດໄດ້ບອກລ່ວງໜ້າເຖິງວັນເວລາແຫ່ງຄວາມຍາກລຳບາກອັນໃຫຍ່ຫລວງທີ່ຈະເກີດຂຶ້ນກ່ອນການສະເດັດມາຄັ້ງທີສອງຂອງພຣະອົງ. ພຣະອົງໄດ້ກ່າວວ່າ, “ຈະມີຄວາມອຶດຢາກ, ແລະ ພະຍາດໂລຄາ, ແລະ ແຜ່ນດິນໄຫວ, ໃນບ່ອນຕ່າງໆ” (ໂຈເຊັບ ສະມິດ—ມັດທາຍ 1:29).
ສິ່ງທີ່ເຮັດໃຫ້ຄວາມຍາກລຳບາກຮ້າຍແຮງຂຶ້ນແມ່ນຄວາມມືດ ແລະ ການຫລອກລວງທີ່ເພີ່ມທະວີຂຶ້ນຢູ່ອ້ອມຮອບເຮົາ. ດັ່ງທີ່ພຣະເຢຊູໄດ້ບອກສານຸສິດຂອງພຣະອົງວ່າ, “ຄວາມຊົ່ວຮ້າຍຈະມີຢູ່ຢ່າງຫລວງຫລາຍ” ກ່ອນການສະເດັດຄືນມາຂອງພຣະອົງ (ໂຈເຊັບ ສະມິດ—ມັດທາຍ 1:30).
ຊາຕານກໍໄດ້ເຕົ້າໂຮມພະລັງຂອງມັນ ແລະ ກຳລັງຕໍ່ຕ້ານວຽກງານຂອງພຣະຜູ້ເປັນເຈົ້າ ແລະ ພວກເຮົາທີ່ມີພາກສ່ວນໃນນັ້ນ. ເປັນເພາະອັນຕະລາຍທັງຫລາຍທີ່ເຮົາປະເຊີນຢູ່, ເຮົາບໍ່ເຄີຍຕ້ອງການ ການນຳພາຈາກສະຫວັນຫລາຍກວ່າເວລານີ້, ແລະ ຄວາມພະຍາຍາມຂອງເຮົາທີ່ຈະໄດ້ຍິນສຸລະສຽງຂອງພຣະເຢຊູຄຣິດ—ພຣະຜູ້ເປັນກາງ, ພຣະຜູ້ຊ່ວຍໃຫ້ລອດ, ແລະ ພຣະຜູ້ໄຖ່ຂອງເຮົາ—ກໍບໍ່ເຄີຍຮີບຮ້ອນຫລາຍກວ່ານີ້.
ດັ່ງທີ່ຂ້າພະເຈົ້າໄດ້ກ່າວບໍ່ດົນຫລັງຈາກຂ້າພະເຈົ້າຖືກເອີ້ນໃຫ້ເປັນປະທານຂອງສາດສະໜາຈັກ, ພຣະຜູ້ເປັນເຈົ້າພ້ອມທີ່ຈະເປີດເຜີຍພຣະດຳລັດຂອງພຣະອົງແກ່ເຮົາ. ນັ້ນເປັນໜຶ່ງໃນຈຳນວນພອນທີ່ຍິ່ງໃຫຍ່ຂອງພຣະອົງທີ່ມີໃຫ້ແກ່ເຮົາ.2
ໃນວັນເວລາຂອງເຮົາ, ພຣະອົງໄດ້ສັນຍາວ່າ, “ຖ້າພວກເຈົ້າຈະຖາມ, ພວກເຈົ້າຈະໄດ້ຮັບການເປີດເຜີຍຕື່ມໃສ່ການເປີດເຜີຍ, ຄວາມຮູ້ຕື່ມໃສ່ຄວາມຮູ້” (ຄຳສອນ ແລະ ພັນທະສັນຍາ 42:61).
ຂ້າພະເຈົ້າຮູ້ວ່າພຣະອົງຈະຕອບການອ້ອນວອນຂອງເຮົາ.
ວິທີທີ່ເຮົາໄດ້ຍິນພຣະອົງ
ການຮູ້ວິທີທີ່ພຣະວິນຍານກ່າວແມ່ນຈຳເປັນໃນທຸກວັນນີ້. ເພື່ອຈະໄດ້ຮັບການເປີດເຜີຍສ່ວນຕົວ, ເພື່ອຈະພົບເຫັນຄຳຕອບ, ແລະ ເພື່ອຈະໄດ້ຮັບການປົກປ້ອງ ແລະ ການຊີ້ນຳ, ເຮົາຈື່ຈຳແບບແຜນທີ່ສາດສະດາໂຈເຊັບ ສະມິດ ໄດ້ຈັດໄວ້ໃຫ້ເຮົາ.
ທຳອິດ, ເຮົາຕ້ອງສຶກສາພຣະຄຳພີຢ່າງເລິກເຊິ່ງ. ການເຮັດສິ່ງນີ້ຈະເປີດຈິດໃຈ ແລະ ຫົວໃຈຂອງເຮົາສູ່ຄຳສອນ ແລະ ຄວາມຈິງຂອງພຣະຜູ້ຊ່ວຍໃຫ້ລອດ. ພຣະຄຳຂອງພຣະຄຣິດ “ຈະບອກ [ເຮົາ] ທຸກຢ່າງທີ່ [ເຮົາ] ຄວນເຮັດ” (2 ນີໄຟ 32:3), ໂດຍສະເພາະໃນວັນເວລາທີ່ບໍ່ແນ່ນອນ ແລະ ວຸ້ນວາຍເຫລົ່ານີ້.
ຕໍ່ໄປ ເຮົາອະທິຖານ. ການອະທິຖານຮຽກຮ້ອງການລິເລີ່ມ, ສະນັ້ນເຮົາຖ່ອມຕົວເຮົາເອງຕໍ່ພຣະພັກຂອງພຣະເຈົ້າ, ຫາບ່ອນທີ່ງຽບໆທີ່ເຮົາສາມາດໄປຫາເປັນປະຈຳ, ແລະ ເປີດອົກເປີດໃຈເຮົາຕໍ່ພຣະອົງ.
ພຣະຜູ້ເປັນເຈົ້າກ່າວວ່າ, “ຈົ່ງເຂົ້າມາໃກ້ເຮົາ ແລະ ເຮົາຈະເຂົ້າໃກ້ພວກເຈົ້າ; ຈົ່ງສະແຫວງຫາເຮົາດ້ວຍຄວາມພາກພຽນ ແລະ ພວກເຈົ້າຈະພົບເຮົາ; ຈົ່ງໝັ່ນຂໍ ແລ້ວພວກເຈົ້າຈະໄດ້ຮັບ; ຈົ່ງໝັ່ນເຄາະ ແລ້ວຈະມີຜູ້ໄຂປະຕູໃຫ້ພວກເຈົ້າ” (ຄຳສອນ ແລະ ພັນທະສັນຍາ 88:63).
ການເຂົ້າໃກ້ພຣະຜູ້ເປັນເຈົ້າຈະນຳການປອບໂຍນ ແລະ ກຳລັງໃຈ, ຄວາມຫວັງ ແລະ ການປິ່ນປົວມາໃຫ້. ສະນັ້ນ, ເຮົາອະທິຖານໃນພຣະນາມຂອງພຣະອົງກ່ຽວກັບຄວາມກັງວົນ ແລະ ຄວາມອ່ອນແອຂອງເຮົາ, ຄວາມໄຝ່ຝັນ ແລະ ຄົນທີ່ເຮົາຮັກ, ການເອີ້ນຂອງເຮົາ ແລະ ຄຳຖາມຂອງເຮົາ.
ແລ້ວເຮົາຮັບຟັງ.
ຖ້າຫາກເຮົາຄຸເຂົ່າຢູ່ຈັກໜ້ອຍໜຶ່ງຫລັງຈາກເຮົາອະທິຖານແລ້ວໆ, ຄວາມຄິດ, ຄວາມຮູ້ສຶກ, ແລະ ການຊີ້ນຳຈະເຂົ້າມາສູ່ຈິດໃຈຂອງເຮົາ. ການບັນທຶກຄວາມປະທັບໃຈເຫລົ່ານັ້ນຈະຊ່ວຍເຮົາໃຫ້ຈື່ຈຳການກະທຳຢ່າງໃດແດ່ທີ່ພຣະຜູ້ເປັນເຈົ້າປະສົງໃຫ້ເຮົາເຮັດ.
ຂະນະທີ່ເຮົາເຮັດຊ້ຳຕາມຂັ້ນຕອນນີ້, ຕາມຖ້ອຍຄຳຂອງສາດສະດາໂຈເຊັບ ສະມິດ ເຮົາຈະ “ເຕີບໂຕຢູ່ໃນຫລັກທຳແຫ່ງການເປີດເຜີຍ.”3
ມີຄ່າຄວນທີ່ຈະໄດ້ຮັບການເປີດເຜີຍ
ການຫລໍ່ຫລອມຄວາມສາມາດຂອງເຮົາທີ່ຈະຮັບຮູ້ການກະຊິບຂອງພຣະວິນຍານບໍລິສຸດ ແລະ ການເພີ່ມພູນຄວາມສາມາດຂອງເຮົາທີ່ຈະໄດ້ຮັບການເປີດເຜີຍຮຽກຮ້ອງການມີຄ່າຄວນ. ການມີຄ່າຄວນບໍ່ໄດ້ຮຽກຮ້ອງຄວາມດີພ້ອມ, ແຕ່ມັນຮຽກຮ້ອງວ່າເຮົາຕ້ອງພະຍາຍາມໃຫ້ມີຄວາມບໍລິສຸດຫລາຍຂຶ້ນ.
ພຣະຜູ້ເປັນເຈົ້າຄາດຫວັງຄວາມພະຍາຍາມທຸກໆວັນ, ການພັດທະນາທຸກໆວັນ, ການກັບໃຈທຸກໆວັນ. ການມີຄ່າຄວນຈະນຳຄວາມບໍລິສຸດມາໃຫ້, ແລະ ຄວາມບໍລິສຸດຈະເຮັດໃຫ້ເຮົາເໝາະສົມສຳລັບພຣະວິນຍານບໍລິສຸດ. ເມື່ອເຮົາຮັບເອົາ “ພຣະວິນຍານສັກສິດເພື່ອນຳພາ [ເຮົາ]” (ຄຳສອນ ແລະ ພັນທະສັນຍາ 45:57), ເຮົາຈະເໝາະສົມສຳລັບການເປີດເຜີຍສ່ວນຕົວ.
ຖ້າຫາກບາງສິ່ງກຳລັງຢຸດຢັ້ງເຮົາຈາກການເປີດປະຕູໄປສູ່ການນຳພາຈາກສະຫວັນ, ເຮົາອາດຕ້ອງໄດ້ກັບໃຈ. ການກັບໃຈອະນຸຍາດໃຫ້ເຮົາເປີດປະຕູ ເພື່ອວ່າເຮົາຈະສາມາດໄດ້ຍິນສຸລະສຽງຂອງພຣະຜູ້ເປັນເຈົ້າເລື້ອຍໆ ແລະ ຢ່າງແຈ່ມແຈ້ງຫລາຍຂຶ້ນ.
“ມາດຕະຖານກໍແຈ່ມແຈ້ງດີ,” ແອວເດີ ເດວິດ ເອ ແບ໊ດນາ ແຫ່ງກຸ່ມອັກຄະສາວົກສິບສອງ ໄດ້ສິດສອນ. “ຖ້າຫາກສິ່ງທີ່ເຮົາຄິດ, ເຫັນ, ໄດ້ຍິນ, ຫລື ເຮັດໄປ ເຮັດໃຫ້ເຮົາຫ່າງໄກຈາກພຣະວິນຍານບໍລິສຸດ, ແລ້ວເຮົາກໍຄວນຈະຢຸດຄິດ, ເຫັນ, ໄດ້ຍິນ, ຫລື ເຮັດສິ່ງນັ້ນ. ຖ້າສິ່ງທີ່ມີເຈດຕະນາຈະໃຫ້ການບັນເທີງ, ຍົກຕົວຢ່າງ, ເຮັດໃຫ້ເຮົາຫ່າງໄກຈາກພຣະວິນຍານສັກສິດ, ແລ້ວແນ່ນອນວ່າການບັນເທີງປະເພດນັ້ນບໍ່ແມ່ນສຳລັບເຮົາ. ເພາະວ່າພຣະວິນຍານບໍ່ສາມາດສະຖິດຢູ່ກັບສິ່ງທີ່ຫຍາບຄາຍ, ບໍ່ສຸພາບ, ຫລື ບໍ່ຮຽບຮ້ອຍ, ແລ້ວແນ່ນອນວ່າສິ່ງດັ່ງກ່າວບໍ່ແມ່ນສຳລັບເຮົາ.”4
ເມື່ອເຮົາລວມຄວາມບໍລິສຸດ ແລະ ການເຊື່ອຟັງທີ່ເພີ່ມທະວີເຂົ້າກັບການຖືສິນອົດເຂົ້າ, ການສະແຫວງຫາຢ່າງພາກພຽນ, ການສຶກສາພຣະຄຳພີ ແລະ ຖ້ອຍຄຳຂອງສາດສະດາທີ່ມີຊີວິດຢູ່, ແລະ ວຽກງານພຣະວິຫານ ແລະ ປະຫວັດຄອບຄົວ, ແລ້ວສະຫວັນກໍຈະເປີດ. ເມື່ອນັ້ນ, ພຣະຜູ້ເປັນເຈົ້າຈະບັນລຸຄຳສັນຍາຂອງພຣະອົງ ທີ່ວ່າ: “ເຮົາຈະໃຫ້ພຣະວິນຍານສ່ວນໜຶ່ງແກ່ເຈົ້າ, ຊຶ່ງຈະໃຫ້ຄວາມສະຫວ່າງແກ່ຄວາມຄິດຂອງເຈົ້າ” (ຄຳສອນ ແລະ ພັນທະສັນຍາ 11:13).
ເຮົາອາດຕ້ອງໄດ້ອົດທົນ, ແຕ່ພຣະເຈົ້າຈະກ່າວກັບເຮົາໃນວິທີທາງຂອງພຣະອົງເອງ ແລະ ໃນເວລາຂອງພຣະອົງເອງ.
ວິນຍານແຫ່ງຄວາມເຂົ້າໃຈ
ໂຢບໄດ້ປະກາດວ່າ, “ແມ່ນພຣະວິນຍານຂອງພຣະເຈົ້າອົງຊົງລິດອຳນາດຍິ່ງໃຫຍ່ ທີ່ໄດ້ມາຫາມະນຸດ: ແລະ ໃຫ້ປັນຍາແກ່ເຂົາເຈົ້າ” (ໂຢບ 32:8). ໃນວາລະປີໃໝ່ນີ້, ຂ້າພະເຈົ້າຂໍຊຸກຍູ້ທ່ານໃຫ້ດຳເນີນຕາມບາດກ້າວທີ່ຈຳເປັນເພື່ອຈະໄດ້ຍິນພຣະຜູ້ເປັນເຈົ້າໃຫ້ດີຂຶ້ນ ແລະ ຫລາຍຂຶ້ນເລື້ອຍໆ ເພື່ອວ່າທ່ານຈະສາມາດໄດ້ຮັບຄວາມຮູ້ແຈ້ງທີ່ພຣະອົງປະສົງຈະມອບໃຫ້ທ່ານ.
ກ່ອນແອວເດີ ແຮວສ໌ ໄດ້ເສຍຊີວິດໄປໃນເດືອນຕຸລາ ປີ 2017, ເພິ່ນໄດ້ກະກຽມບົດປາໄສສັ້ນໆບົດໜຶ່ງສຳລັບກອງປະຊຸມໃຫຍ່ສາມັນ ທີ່ເພິ່ນບໍ່ສາມາດໄດ້ກ່າວ. ໃນບົດປາໄສນັ້ນ, ເພິ່ນໄດ້ຂຽນວ່າ, “ສັດທາຂອງເຮົາກະກຽມເຮົາໃຫ້ໄດ້ຢູ່ໃນທີ່ປະທັບຂອງພຣະຜູ້ເປັນເຈົ້າ.”5
ເມື່ອເຮົາຮັບເອົາການເປີດເຜີຍ, ເຮົາໃຊ້ເວລາຢູ່ໃນທີ່ປະທັບຂອງພຣະເຈົ້າ ຂະນະທີ່ພຣະອົງເປີດເຜີຍ ພຣະດຳລັດ, ພຣະປະສົງ, ແລະ ສຸລະສຽງຂອງພຣະອົງແກ່ເຮົາ (ເບິ່ງ ຄຳສອນ ແລະ ພັນທະສັນຍາ 68:4). ຂໍໃຫ້ເຮົາຈົ່ງຈັດສັດທາຂອງເຮົາໃຫ້ເປັນການກະທຳ, ເອີ້ນຫາພຣະອົງ, ດຳລົງຊີວິດໃຫ້ມີຄ່າຄວນສຳລັບການດົນໃຈທີ່ສັນຍາໄວ້ຂອງພຣະອົງ, ແລະ ລົງມືປະຕິບັດຕາມການຊີ້ນຳທີ່ເຮົາໄດ້ຮັບ.
© 2020 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, January 2021. Laotian. 17463 331