Pa’ari i roto i te parau tumu o te heheura’a

Nā te peresideni Russell M. Nelson

Peresideni nō te ’Ēkālesia a Iesu Mesia i te Feiā Mo’a i te mau Mahana Hope’a nei

Tē fa’aitoito atu nei au ia ’outou, ’ia rave i te mau ta’ahira’a e tītauhia nō te fa’aro’o maita’i a’e ’e te pinepine a’e i te Fatu ’ia noa’a ia ’outou te māramarama ’o tāna e hina’aro e hōro’a nō ’outou.

I te 30 nō Tetepa 2017, i muri a’e i te tuha’a purera’a i te avatea o te ’āmuira’a rahi, ’ua tāpe’a atu vau i te fare ma’i nō te haere e hi’o i tō’u melo herehia nō te pupu ’o Elder Robert D. Hales. ’Ua tāpe’ahia ’oia i te fare ma’i mai te tupura’ahia ’oia i te ma’i māfatu, tau mahana ri’i nā mua atu.

E fārereira’a fa’ahiahia mau nō māua, ’e mai te huru ra ē, tē maita’i mai ra ’oia. Nāna iho e huti i te aho, e tāpa’o maita’i roa te reira.

I taua pō ra, ’ua paraparau mai te Vārua i tō’u ’ā’au ’e i tō’u ferurira’a ē, ’ia ho’i fa’ahou vau i te fare ma’i i te sābati. I te roara’a o te tuha’a purera’a nō te po’ipo’i sābati o te ’āmuira’a rahi, ’ua ho’i fa’ahou mai taua mana’o pūai ra. ’Ua tupu te mana’o iā’u e ha’apae i te tāmā’ara’a o te avatea ’e ’ia haere rū e hi’o ’ia Elder Hales, ’ia fa’aoti te tuha’a purera’a po’ipo’i, ’o tā’u ïa i rave.

I tō’u taera’a atu, ’ua ’ite au ē ’ua taui te huru ’o Elder Hales i te fāito ’ino. Mea pe’ape’a roa, ’ua fa’aru’e mai ’oia 10 minuti i muri a’e i tō’u taera’a atu, tē māuruuru nei rā vau i tō’u ti’ara’a i piha’i iho i tāna vahine here, ’o Mary, ’e i tā rāua nā tamaiti, ’a fa’aru’e mai ai ’oia i teie orara’a.

’Auē tō’u māuruuru i te reo iti ha’iha’i o te Vārua Maita’i ’o tei tūra’i ’iā’u ’ia rave i te hō’ē mea ’o tā’u e ’ore roa paha e rave ’āhiri ’aita. ’E ’auē tō’u māuruuru rahi i te tupura’a mau o te heheura’a ’e i te mātara-fa’ahou-ra’a o te mau ra’i.

I teie matahiti, tā tātou fā nō te tuatāpapara’a a te ta’ata hō’ē ’e a te piha ha’api’ira’a o Te Parau Ha’api’ira’a ’e te mau Parau Fafau ïa. E nehenehe teie « mau heheura’a nō ’ō mai i te Atua ra ’e teie mau fa’ahitira’a parau fa’auruhia » e ha’amaita’i i te tā’āto’ara’a ’o tē tuatāpapa i te reira ’e ’o tē fa’a’ohipa ’ia au i te mau arata’ira’a nō ’ō mai i te Atua ra. Tē ani manihini nei te reira i « te mau ta’ata ato’a ’ia fa’aro’o i te reo o te Fatu »,¹ ’e inaha ho’i « nō te mau ta’ata ato’a te reo o te Fatu » (Te Parau Ha’api’ira’a ’e te mau Parau Fafau 1:2).

Te ’ati, te pōuri, te ha’avare

’Ua riro te vero i te pae tino ’e i te pae vārua ’ei tuha’a nō te orara’a i te fenua nei, mai tā te ma’i parare o te COVID-19 i fa’aha’amana’o mai ia tātou. Nō te tau hou tōna ho’i-piti-ra’a mai, ’ua tohu te Fa’aora e tupu te mau ’ati ’ū’ana rahi. ’Ua parau ’oia : « E tupu mai te o’e ’e te ma’i rahi ’e te ’āueuera’a fenua i tera vāhi i tera vāhi » (Iosepha Semita—Mataio 1:29).

’Ua fa’a’ū’anahia te mara’ara’a o te pōuri ’e te ha’avare ’ati a’e ’ia tātou, e teie mau ’ati rahi. Mai tā Iesu i parau i tāna mau pipi : « E rahi te ’ino i te tupura’a » hou tōna ho’ira’a mai (Iosepha Semita—Mataio 1:30).

’Ua ha’aputuputu Sātane i tōna mau pūai ’e tē ’aro tu’utu’u ’ore nei nō te vāvahi i te ’ohipa a te Fatu ’e ia rātou tei fa’aō atu i roto. Nō te mara’ara’a o te mau fifi ’o tā tātou e fa’aruru nei, tō tātou hina’aro i te arata’ira’a nō ’ō mai i te Atua ra, ’aita roa ia i rahi a’e, ’e tā tātou mau tauto’ora’a nō te fa’aro’o i te reo o Iesu Mesia—tō tātou Ārai, te Fa’aora ’e te Tara’ehara—’aita roa i te mea rū a’e nei.

Mai tā’u i parau tau taime ri’i noa a’e ’a pi’ihia ai au ’ei Peresideni nō te ’Ēkālesia, ’ua ineine te Fatu i te heheu mai i tōna mana’o. ’O te hō’ē te reira o tāna mau ha’amaita’ira’a rahi roa a’e nō tātou.²

I tō tātou nei ’anotau, ’ua parau fafau mai ’oia, « mai te mea ’e ani mai ’outou, ’e fāri’i mai ho’i ’outou i te heheura’a nā ni’a i te heheura’a, te ’ite ho’i nā ni’a i te ’ite » (Te Parau Ha’api’ira’a ’e te mau Parau Fafau 42:61).

’Ua ’ite au e pāhono mai ’oia i tā tātou mau tāparura’a.

Nāhea tātou ’ia fa’aro’o ’iāna

Te ’itera’a nāhea te Vārua ’ia paraparau mai, e mea faufa’a ïa i teie mahana. Te fāri’ira’a i te heheura’a o te ta’ata iho, te ’itera’a mai i te mau pāhonoraa, ’e te fāri’ira’a i te pārurura’a ’e i te arata’ira’a, e ha’amana’o tātou i te hi’ora’a tā te peropheta Iosepha Semita i hōro’a mai ia tātou.

’A tahi, e utuhi ia tātou iho i roto i te mau pāpa’ira’a mo’a. E ’īriti te reira i tō tātou fērurira’a ’e tō tātou ’ā’au i te mau ha’api’ira’a ’e i te mau parau mau a te Fa’aora. « E fa’a’ite te parau a te Mesia ia [tātou] i te mau mea tā [tātou] e ha’apa’o » (2 Nephi 32:3), i teie iho ā rā mau mahana pāpū ’ore ’e te ’ārepurepu.

I muri iho, e pure tātou. E tītau te pure i te fa’aotira’a, ’a fa’aha’eha’a ai tātou ia tātou iho i mua i te Atua, ma te ’imi i te hō’ē vāhi hau i reira tātou e haere tāmau noa ai, ’e e nīni’i atu ai i tō tātou ’ā’au ’iāna.

’Ua parau te Fatu : « ’A ha’afātata mai iā’u nei ’e e ha’afātata atu ïa vau ia ’outou na ; ’a ’imi itoito noa mai iā’u nei ’e e ’ite mai ho’i ’outou iā’u ; ’a ani mai, ’e e fāri’i ïa ’outou ; ’a pātōtō mai ’e e ’īritihia atu ïa ia ’outou na » (Te Parau Ha’api’ira’a ’e te mau Parau Fafau 88:63).

Te ha’afātatara’a atu i te Fatu, e hōpoi mai te reira i te tāmahanahana, te itoito, te tī’aira’a ’e te fa’aorara’a. Nō reira, e pure tātou nā roto i tōna i’oa nō tō tātou mau pe’ape’a ’e tō tātou mau paruparu, tō tātou mau hia’ai ’e tō tātou mau feiā tei herehia, nō tō tātou mau pi’ira’a ’e tā tātou mau uira’a.

I muri iho, e fa’aro’o atu tātou.

Mai te mea e fa’aea tūturi noa tātou ma’a taime ri’i i muri a’e i te fa’aotira’a i tā tātou pure, e tae mai i roto i tō tātou fērurira’a te mau mana’o, te mau ’āehuehu ’e te mau arata’ira’a. Te pāpa’ira’a i teie mau mana’o, e tauturu te reira ia tātou ’ia ha’amana’o e aha te mau ha’ara’a tā te Fatu e hina’aro ’ia rave tātou.

’A tāpiti ai tātou i teie ravera’a, ’ia au i te mau parau a te peropheta Iosepha Semita, e riro tātou i te « tupu i te rahi i roto i te parau tumu o te heheura’a ».³

Ti’amā nō te fāri’i i te heheura’a

Te ha’amaita’ira’a i tō tātou ’āravihi ’ia ’ite mai i te mau muhumuhu a te Vārua Maita’i ’e ’ia fa’arahi i tō tātou tāreni nō te fāri’i i te heheura’a, e tītauhia te ti’amā. ’Aita te ti’amā e tītau i te maita’i-roa-ra’a, e tītau rā te reira ia tātou ’ia tūtava i te fa’arahi i te vi’ivi’i ’ore.

Tē tīa’i nei te Fatu i te tauto’ora’a i te mau mahana ato’a, te ha’amaita’ira’a i tō tātou huru ’e te tātarahapa i te mau mahana ato’a. E hōpoi mai te ti’amā i te vi’ivi’i ’ore, ’e e fa’ata’a te vi’ivi’i ’ore ia tātou ’ia fāri’i te Vārua Maita’i. ’A rave ai tātou i « te Vārua Mo’a ’ei arata’i nō [tātou] » (Te Parau Ha’api’ira’a ’e te mau Parau Fafau 45:57), tē fa’ata’a ra ïa tātou ia tātou nō te heheura’a nō te ta’ata iho.

Mai te mea e tāpe’a te hō’ē ’ohipa ia tātou ’ia ’īriti i te ’ūputa nō te arata’ira’a o te ra’i, e ti’a roa ia tātou ’ia tātarahapa. Nā te tātarahapa e fa’ati’a ia tātou ’ia ’iriti i te ’ōpani ’ia nehenehe ia tātou ’ia fa’aro’o pinepine a’e i te reo o te Fatu ’e ma te māramarama a’e.

« E mea māramarama maita’i te hi’ora’a », ’ua ha’api’i Elder David A. Bednar, nō te pupu nō te Tino ’Ahuru ma Piti ’āpōsetolo. « Mai te mea e fa’aātea te hō’ē ’ohipa tā tātou e mana’o nei, e hi’o nei, e fa’aro’o nei, ’e e rave nei i te Vārua Maita’i, e mea ti’a roa ia tātou ’ia fa’aeā i te mana’o, i te hi’o, i te fa’aro’o ’e i te rave i te reira. ’Ei hi’ora’a, mai te peu te mea tei fa’ata’ahia ’ei fa’a’oa’oara’a e fa’aātea ia tātou i te Vārua Mo’a, e mea pāpū roa ïa ē, e ’ere nō tātou te reira huru fa’a’oa’oara’a. Nō te mea e’ita te Vārua e nehenehe e fa’aoroma’i i te mea faufau, te parau ’ino ’aore rā te tai’ata, e mea māramarama maita’i ē, e’ita te reira mau mea nō tātou ».⁴

’Ia ’āpiti ana’e tātou te vi’ivi’i ’ore ’e te ha’apa’o pūai i te ha’apaera’a mā’a, i te ’imira’a itoito, i te tuatapapara’a i te mau pāpa’ira’a mo’a ’e i te mau parau a te mau peropheta ora, ’e i te hiero ’e i te ’ohipa ’ā’amu ’utuāfare, e matara te mau ra’i. ’E i tōna pae, e fa’atupu te Fatu i tāna parau : « E tu’u atu vau i tā tō’u nei Vārua ’ia ’oe na, ’o tē ha’amāramarama mai i tō ’outou fērurira’a » (Te Parau Ha’api’ira’a ’e te mau Parau Fafau 11:13).

E tītauhia paha ia tātou ’ia fa’a’oroma’i, e paraparau mai rā te Atua ia tātou ’ia au i tāna iho rāve’a ’e i tōna iho taime.

E vārua nō te hāro’aro’ara’a

’Ua parau Ioba : « E vārua rā tei roto i te ta’ata nei ; ’e nā te uru a te Pūaihope ra i noa’a ai iāna te ’ite » (Ioba 32:8). I teie matahiti ’āpī, tē fa’aitoito atu nei au ia ’outou ’ia rave i te mau ta’ahira’a e tītauhia nō te fa’aro’o maita’i a’e ’e te pinepine a’e i te Fatu, ’ia noa’a ia ’outou te māramarama o tāna e hina’aro e hōro’a mai nō ’outou.

Hou ’o Elder Hales ’a fa’aru’e mai ai i taua mahana nō ’Ātopa ra i te matahiti 2017, ’ua fa’aineine ’oia i te hō’ē a’ora’a poto nō te ’āmuira’a rahi ’e ’aita rā i ti’a iāna i te hōro’a mai. I roto i taua a’ora’a ra, ’ua pāpa’i ’oia : « E fa’aineine tō tātou fa’aro’o ia tātou ’ia ti’a i mua i te aro o te Fatu ».⁵

’Ia fāri’i ana’e tātou i te heheura’a, tē ti’a nei tātou i mua i te aro o te Atua ’a heheu mai ai ’oia i tōna mana’o, tōna hina’aro, ’e tōna reo ia tātou (hi’o Te Parau Ha’api’ira’a ’e te mau Parau Fafau 68:4). E mata na tātou i te fa’a’ohipa i tō tātou fa’aro’o, ma te pi’ira’a iāna, te orara’a ma te ti’amā i tāna fa’aurura’a i fafau mai, ’e i te ravera’a ’ia au i te arata’ira’a ’o tā tātou i fāri’i.

© 2020 nā Intellectual Reserve, Inc. Fatura’a pāruruhia. Nene’ihia i te fenua Mārite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly Liahona Message, Tēnuare 2021. Tahitian. 17463 895