Parau poro’i tā’āva’e Nō te Pūai o te Feiā ’Āpī, Tēnuare 2021

’A fa’aro’o, ’a ’apo mai ’e ’a ha’apa’o

Nā te peresideni Russell M. Nelson

Peresideni nō Te ’Ēkālesia a Iesu Mesia i te Feiā Mo’a i te mau Mahana Hope’a nei

Nō roto mai i te hō’ē a’ora’a nō te ’āmuira’a rahi nō ’Ēperēra 2020.

Mau fa’ahōho’ara’a nā Guev Design

Te ta’o mātāmua roa i roto i Te Parau Ha’api’ira’a ’e te mau Parau Fafau, ’oia ho’i ’a fa’aro’o (hi’o Te Parau Ha’api’ira’a e te mau Parau Fafau 1:1). Te aura’a o te reira : « ’Ia fa’aro’o ma te hina’aro ’ia ha’apa’o ». Te aura’a ’ia ’apo, ’o te « fa’aro’ora’a ïa iāna »—fa’aro’o e aha tā te Fa’aora e parau nei, ’e i muri iho ’ia ha’apa’o i tāna a’o. I roto i teie nā ta’o—« ’A fa’aro’o iāna »—tē hōro’a mai nei te Atua i te hōho’a nō te manuia, te ’oa’oa, ’e te poupou i roto i teie orara’a. E mea ti’a ia tātou ’ia fa’aro’o i te mau parau a te Fatu, ’ia ’apo mai i te reira, ’e ’ia ha’apa’o i te mea tāna i parau ia tātou !

I hea tātou e nehenehe ai e haere e fa’aro’o iāna ?

E nehenehe tātou e haere i roto i te mau pāpa’ira’a mo’a. E nehenehe ato’a tātou e fa’aro’o iāna i roto i te hiero. E nehenehe ato’a tātou e fa’aro’o iāna mā te pāpū maita’i ’a ha’amaita’i ai tātou i tō tātou ’aravihi nō te ’ite i te mau muhumuhu a te Vārua Maita’i. ’E, i te hope’a, e nehenehe tātou e fa’aro’o iāna ’a ha’apa’o ai tātou i te mau parau a te mau peropheta, te mau hi’o, ’e te mau heheu parau.

E aha tē tupu mai ’a fa’aro’o, ’a ’apo mai ’e ’a ha’apa’o hau atu ai ’outou ma te hina’aro, i tā te Fa’aora i parau ’e i te mea tāna i parau i teienei nā roto mai i tāna mau peropheta ? Tē fafau atu nei au ē, e ha’amaita’ihia ’outou ma te mana hau atu nō te fa’aruru i te fa’ahemara’a, te mau ’arora’a, ’e te mau paruparu. Tē fafau atu nei au i te mau temeio i roto i tō ’outou mau aura’a ’utuāfare ’e i te ’ohipa o te mau mahana ato’a. ’E tē fafau atu nei au ē, e mara’a mai tō ’outou pūai ’ia fāri’i i te ’oa’oa, noa atu e mara’a te ’ārepurepura’a i roto i tō ’outou orara’a.

I roto i tō ’outou orara’a

Mai tā te peresideni Russell M. Nelson i ha’api’i, e « ’apo mai » tātou ’ia fa’aro’o ’e ’ia pe’e ana’e tātou i te mau ha’api’ira’a tā tātou e fāri’i nō ’ō mai i te Fatu ra ’e i tōna mau tāvini. E aha tā ’outou e nehenehe e rave nō te ’apo maita’i a’e i te mau parau a te Fatu i roto i tō ’outou orara’a ?

© 2020 nā Intellectual Reserve, Inc. Fatura’a pāruruhia. Nene’ihia i te Fenua Mārite. Parau fa’ati’a nō te reo Peretāne : 6/19. Parau fa’ati’a nō te ’īritira’a : 6/19. ’Iritira’a nō Monthly For the Strength of Youth Message, January 2021. Tahitian. 17463 895