iTukutuku Vakavula ni Liaona , Feperueri 2021

Sa Tukuna na Kalou Meda Papitaisotaki

A biuta e dua na ivakaraitaki o Jisu Karisito ni papitaisotaki tu mai vua e dua ka tu vua na dodonu ni lewa ni Kalou.

Ni sega ni tiko vei keda e levu na veika matailalai ni bula vakaikoya i Jisu Karisito, eda sa kila ni a papitaiso o Koya ni sa yabaki 30 (raica na Luke 3:23). Oqo eso na ka eda vulica me baleta na papitaiso mai na Nona ivakaraitaki.

Me Baleta na Tamata Kecega

Kevaka eda sa qase ka matua meda tukuna na kedrau duidui na vinaka kei na ca, sa vinakata na Tamada Vakalomalagi me da papitaisotaki (raica na Vunau kei na Veiyalayalati 18:42). A yalosavasava tu o Jisu, ia a digitaka ga me papitaisotaki me muria na ivunau ni Kalou (raica na Maciu 3:13–17; 2 Nifai 31:7). O ira mada ga na mate sa rawa ni ciqoma na veipapitaisotaki. Eda dolea vei ira ena noda papitaisotaki tu ena vukudra ena valetabu. (Raica na Vunau kei na Veiyalayalati 128:15–18.)

Vakayacori ena Dodonu

A sega ni papitaisotaki o Jisu mai vua e dua ga na tamata. A gole vakatabakidua o Koya vua na Tavalena o Joni, ka tiko vua na dodonu ni matabete mai vua na Kalou. Ni sa mate oti o Jisu ka ra vakamatei tu na Nona tisaipeli, na dodonu ni matabete oya sa mai yali e vuravura. Ia, ena 1829, a rairai o Joni na Dauveipapitaiso kivei Josefa Simici ka solia vua na dodonu me veipapitaisotaki ena yaca ni Kalou. Ena vuku ni veivakalesui mai o ya, sa rawa ni da papitaisotaki nikua ena dodonu vataga o ya.

E Rua na Sala ni Yalayala.

Na Papitaiso e rua na sala ni kena yalayala, se veiyalayalati, vei keda kei na Kalou. Eda yalataka:

1. Ni taura kivei keda na yaca i Karisito.

2. Ni dau nanumi Koya tikoga

3. Ni muria na Nona ivunau.

Me kena isau, sa yalataka na Kalou ni na tiko vata ga kei keda na Yalona. Na vosa ni masu ni sakaramede e vakananumi keda ena veiyalayalati oqo ena veimacawa. (Raica na Vunau kei na Veiyalayalati 20:77, 79.)

Sa dua na Tiki Bibi ni Papitaiso na Ciqomi ni Yalo Tabu

Ni sa papitaiso oti o Jisu, a rairai mai na Yalo Tabu me vaka e dua na ruve (raica na 2 Nifai 31:8). Nikua, ni ra sa papitaiso oti na tamata, era vakadeitaki. Kena ibalebale oqo ni ra sa ciqoma e dua na veivakalougatataki matalia era sa mai sureti kina mera ciqoma na isolisoli veivakasavasavataki vakayalo ni Yalo Tabu (raica na 2 Nifai 31:17). Na Yalo Tabu sa rawa ni vakaroti keda ena veika rerevaki, vakacegui keda, tuberi keda ni caka vakatulewa vinaka, ka vukei keda ni vakila na loloma ni Kalou (raica na Vunau kei na Veiyalayalati 39:6).

Sa Rawa Ni Da Veivutuni Tikoga

Sa kila tu na Kalou ni da na caka cala. Se vakacava na noda sasaga vinaka duadua, eda na valavala ca ka lutu mai na noda yalayala ni papitaiso. Sa solia kina o Koya na gauna kivei keda yadua meda veivutuni. (Raica na Vunau kei na Veiyalayalati 18:13.) Sa rawa ni da cakava na noda vinaka taucoko e veisiga meda kere veivosoti ka vakadodonutaka na cala cavaga. Sa rawa ni da masu ka kere veivosoti vua na Kalou. Ia, ni da sa taura na sakaramede ena yalo malumalumu, sa na rawa ni tiko vata kei keda na Yalo Tabu (raica na 3 Nifai 18:11).

Na Cava e Tukuna na iVolanikalou me baleta na Papitaiso?

Sa dodonu me vukei ira na luvedra na itubutubu ni vakavakarau ki na papitaiso (raica na Vunau kei na Veiyalayalati 68:25).

E sega ni gadrevi mera papitaiso o ira na gone sobu mai na yabaki walu (raica na Moronai 8).

Ni da sa papitaisotaki, eda sa yalataka meda “rarawa vata kei ira sa rarawa … vakacegui ira era sa gadreva na veivakacegui, ka mo dou tu ka vakadinadinataka na Kalou ena veigauna kecega, kei na veika kecega, kei na veivanua kecega” (Mosaia 18:9).

© 2021 mai na Intellectual Reserve, Inc.. Dodonu kece e taqomaki. Tabaki e Amerika. Vakadonui me vaka-Valagi: 6/19. Vakadonui me vakadewataki: 6/19. Vakadewa ni Monthly Liahona Message, February 2021. Fijian. 17464 858