ພຣະເຈົ້າບອກໃຫ້ເຮົາຮັບບັບຕິສະມາ

ພຣະເຢຊູຄຣິດໄດ້ເປັນຕົວຢ່າງເລື່ອງການຮັບບັບຕິສະມາໂດຍຜູ້ທີ່ມີສິດອຳນາດຂອງພຣະເຈົ້າ.

ໃນຂະນະທີ່ພວກເຮົາບໍ່ມີລາຍລະອຽດຫລາຍກ່ຽວກັບຊີວິດສ່ວນຕົວຂອງພຣະເຢຊູຄຣິດ, ພວກເຮົາຮູ້ວ່າ ພຣະອົງໄດ້ຮັບບັບຕິສະມາເມື່ອພຣະອົງມີອາຍຸປະມານ 30 ປີ (ເບິ່ງ ລູກາ 3:23). ຕໍ່ໄປນີ້ແມ່ນບາງສິ່ງທີ່ພວກເຮົາຮຽນຮູ້ກ່ຽວກັບການບັບຕິສະມາຈາກຕົວຢ່າງຂອງພຣະອົງ.

ສຳລັບທຸກຄົນ

ຖ້າເຮົາໃຫຍ່ພໍ ແລະ ເປັນຜູ້ໃຫຍ່ພໍ ທີ່ຈະບອກຄວາມແຕກຕ່າງລະຫວ່າງຖືກ ແລະ ຜິດ, ພຣະບິດາເທິງສະຫວັນປະສົງໃຫ້ເຮົາຮັບບັບຕິສະມາ (ເບິ່ງ ຄຳສອນ ແລະ ພັນທະສັນຍາ 18:42). ພຣະເຢຊູດີພ້ອມທຸກຢ່າງ, ແຕ່ພຣະອົງຍັງເລືອກທີ່ຈະຮັບບັບຕິສະມາ ເພື່ອເຮັດຕາມພຣະບັນຍັດຂອງພຣະເຈົ້າ. (ເບິ່ງ ມັດທາຍ 3:13–17; 2 ນີໄຟ 31:7). ແມ່ນແຕ່ຜູ້ທີ່ຕາຍແລ້ວກໍສາມາດຮັບບັບຕິສະມາໄດ້. ເຮົາສະເໜີມອບໃຫ້ເຂົາເຈົ້າໂດຍການຮັບບັບຕິສະມາເພື່ອເຂົາເຈົ້າໃນພຣະວິຫານ. (ເບິ່ງ ຄຳສອນ ແລະ ພັນທະສັນຍາ 128:15–18.)

ຮູບພາບ

ການບັບຕິສະມາ

ກະທຳໂດຍສິດອຳນາດ

ພຣະເຢຊູບໍ່ໄດ້ຮັບບັບຕິສະມາໂດຍຜູ້ໃດກໍໄດ້. ພຣະອົງໄປຫາໂຢຮັນ ພີ່ນ້ອງຂອງພຣະອົງ, ຜູ້ທີ່ມີສິດອຳນາດແຫ່ງຖານະປະໂລຫິດຈາກພຣະເຈົ້າ. ຫລັງຈາກທີ່ພຣະເຢຊູສິ້ນພຣະຊົນ ແລະ ບັນດາສາວົກຂອງພຣະອົງຖືກຂ້າຕາຍແລ້ວ, ສິດອຳນາດແຫ່ງຖານະປະໂລຫິດນັ້ນກໍໄດ້ສູນຫາຍໄປຈາກແຜ່ນດິນໂລກ. ແລ້ວ, ໃນປີ 1829, ໂຢຮັນບັບຕິສະໂຕໄດ້ປະກົດຕໍ່ໂຈເຊັບ ສະມິດ ແລະ ໄດ້ມອບອຳນາດແຫ່ງການບັບຕິສະມາໃນພຣະນາມຂອງພຣະເຈົ້າໃຫ້ແກ່ເພິ່ນ. ຍ້ອນການຟື້ນຟູນັ້ນ, ເຮົາຈຶ່ງສາມາດຮັບບັບຕິສະມາດ້ວຍສິດອຳນາດດຽວກັນນັ້ນໃນທຸກວັນນີ້.

ຮູບພາບ

ການຟື້ນຟູຖານະປະໂລຫິດແຫ່ງອາໂຣນ

ຄຳສັນຍາສອງຝ່າຍ

ການບັບຕິສະມາແມ່ນຮ່ວມດ້ວຍຄຳສັນຍາສອງຝ່າຍ, ຫລື ພັນທະສັນຍາ, ລະຫວ່າງເຮົາ ແລະ ພຣະເຈົ້າ. ເຮົາສັນຍາວ່າ:

ຈະຮັບເອົາພຣະນາມຂອງພຣະຄຣິດ.
ຈະລະນຶກເຖິງພຣະອົງຕະຫລອດເວລາ.
ຈະຮັກສາພຣະບັນຍັດຂອງພຣະອົງ.

ເພື່ອເປັນການຕອບແທນ, ພຣະເຈົ້າສັນຍາວ່າ ພຣະວິນຍານຂອງພຣະອົງຈະຢູ່ກັບເຮົາຕະຫລອດເວລາ. ຖ້ອຍຄຳຂອງຄຳອະທິຖານສິນລະລຶກ ເຕືອນເຮົາເຖິງພັນທະສັນຍານີ້ໃນແຕ່ລະອາທິດ. (ເບິ່ງ ຄຳສອນ ແລະ ພັນທະສັນຍາ 20:77, 79.)

ຮູບພາບ

ຄອບຄົວໃນກອງປະຊຸມສິນລະລຶກ

ການຮັບພຣະວິນຍານບໍລິສຸດ ແມ່ນພາກສ່ວນສຳຄັນຂອງການບັບຕິສະມາ

ຫລັງຈາກທີ່ພຣະເຢຊູຮັບບັບຕິສະມາແລ້ວ, ພຣະວິນຍານບໍລິສຸດກໍມາປະກົດໃນຮູບຮ່າງຂອງນົກເຂົາ (ເບິ່ງ 2 ນີໄຟ 31:8). ທຸກວັນນີ້, ຫລັງຈາກທີ່ຜູ້ຄົນຮັບບັບຕິສະມາແລ້ວ, ພວກເຂົາຈະໄດ້ຮັບ ການຢືນຢັນ. ນີ້ໝາຍຄວາມວ່າ ພວກເຂົາຮັບພອນພິເສດ ຊຶ່ງພວກເຂົາໄດ້ຖືກເຊື້ອເຊີນໃຫ້ຮັບເອົາຂອງຂວັນແຫ່ງການຊຳລະຝ່າຍຈິດວິນຍານແຫ່ງພຣະວິນຍານບໍລິສຸດ (ເບິ່ງ 2 ນີໄຟ 31:17). ພຣະວິນຍານບໍລິສຸດສາມາດເຕືອນເຮົາເຖິງໄພອັນຕະລາຍ, ປອບໂຍນເຮົາ, ນຳພາເຮົາໃຫ້ຕັດສິນໃຈໄດ້ດີ, ແລະ ຊ່ວຍເຮົາໃຫ້ຮູ້ສຶກເຖິງຄວາມຮັກຂອງພຣະເຈົ້າ (ເບິ່ງ ຄຳສອນ ແລະ ພັນທະສັນຍາ 39:6).

ຮູບພາບ

ຜູ້ຍິງກຳລັງຮັບການຢືນຢັນ

ເຮົາສາມາດກັບໃຈໄດ້ຕະຫລອດເວລາ

ພຣະເຈົ້າຮູ້ວ່າເຮົາຈະເຮັດຜິດ. ເຖິງແມ່ນວ່າ ເຮົາຈະພະຍາຍາມຢ່າງເຕັມທີ່ກໍຕາມ, ເຮົາອາດເຮັດບາບ ແລະ ບໍ່ສາມາດເຮັດຕາມຄຳສັນຍາຕ່າງໆຂອງການບັບຕິສະມາຂອງເຮົາໄດ້. ດັ່ງນັ້ນ ພຣະອົງຈຶ່ງມອບໂອກາດແຫ່ງການກັບໃຈໃຫ້ແກ່ເຮົາແຕ່ລະຄົນ. (ເບິ່ງ ຄຳສອນ ແລະ ພັນທະສັນຍາ 18:13.) ໃນທຸກໆມື້ ເຮົາສາມາດເຮັດໃຫ້ດີທີ່ສຸດທີ່ຈະຂໍອະໄພ ແລະ ແກ້ໄຂສິ່ງທີ່ຜິດພາດ. ເຮົາສາມາດອະທິຖານ ແລະ ຂໍການອະໄພຈາກພຣະເຈົ້າໄດ້. ແລ້ວເມື່ອເຮົາຮັບສິນລະລຶກດ້ວຍຄວາມຖ່ອມໃຈ, ເຮົາກໍຈະສາມາດມີພຣະວິນຍານບໍລິສຸດຢູ່ກັບເຮົາ (ເບິ່ງ 3 ນີໄຟ 18:11).

ຮູບພາບ

ຜູ້ຍິງກຳລັງອະທິຖານຢູ່ຂ້າງຕຽງ

ພຣະຄຳພີໄດ້ກ່າວວ່າຢ່າງໃດກ່ຽວກັບການບັບຕິສະມາ?

ພໍ່ແມ່ຄວນຊ່ວຍລູກຂອງຕົນໃຫ້ກຽມພ້ອມສຳລັບການບັບຕິສະມາ (ເບິ່ງ ຄຳສອນ ແລະ ພັນທະສັນຍາ 68:25).

ເດັກນ້ອຍອາຍຸຕ່ຳກວ່າແປດປີບໍ່ຈຳເປັນຕ້ອງຮັບບັບຕິສະມາ (ເບິ່ງ ໂມໂຣໄນ 8).

ເມື່ອເຮົາຮັບບັບຕິສະມາແລ້ວ, ເຮົາສັນຍາວ່າ “ຈະເປັນທຸກກັບຄົນທີ່ເປັນທຸກ; … ຈະປອບໃຈຄົນທີ່ຕ້ອງການຄວາມປອບໃຈ, ແລະ ຈະຢືນເປັນພະຍານຂອງພຣະເຈົ້າໃນທຸກເວລາ ແລະ ໃນທຸກສິ່ງ, ແລະ ໃນທຸກບ່ອນ” (ໂມໄຊຢາ 18:9).

© 2021 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, February 2021. Laotian. 17464 331