“Nzambi Wakatuambila bua Tutambuishibua,” Liahona, Ngondo Muibidi 2021
Mukenji wa ku Ngondo wa Liahona Ngondo Muibidi 2021
Nzambi Wakatuambila bua Tutambuishibua
Yezu Kilisto wakaleja tshilejilu tshia kutambuishibua kudi muntu udi ne bukokeshi bua Nzambi.
Nansha mutudi katuyi ne dimanya dia mâlu onsu adi atangila moyo wa Yezu Kilisto, tudi bamanya se Yeya wakatambuishibua pavuaye ne bidimu bitua ku 30 (tangila Luka 3:23). Aa adi amua mâlu atudi bamanya pa ditambula kupitshila ku tshilejilu tshienda.
Bua Bantu Bonsu
Bituikala bakola ne bikala ne meji makumbana bua kumona dishilangana pankatshi pa mâlu mimpa ne mabi, Tatu wa mu Diûlu musue bua tutambuishibua (tangila Dilongesha ne Bipungidi 18:42). Yezu uvua muakane, kadi wakasungula bua kutambuishibua bua kulonda mikenji ya Nzambi (tangila Matayo 3:13–17; 2 Nefi 31:7). Nansha aba bakadi bafua, badi mua kuitaba ditambula. Tudi tubambuluisha nunku mu diditambuisha dietu buabu mu ntempelu. (Tangila Doctrine et Alliances 76:50–70.)
Tshikumbaja ku Bukokeshi
Yezu kavua mutambuishibua kudi muntu wa tshianana to. Wakatamba kuya kudi muana wa manseba wende Yona, uvua muikala ne bukokeshi bua buakuidi bua kudi Nzambi. Panyima pa lufu lua Yezu ne bayidi Bende, bukokeshi bua buakuidi buakajimina pa buloba. Pa nanku, mu 1829, Yona Mutambuishi wakamuenekela Joseph Smith ne kumupeshaye bukokeshi bua kutambuisha mu dina dia Nzambi. Kupitshila ku dipingajilula adi, tudi mua kutambuishibua ku bukokeshi bumua abu lelu.
Dilaya Dia Nseka-Ibidi
Ditambula didi diangata dilaya dia nseka ibidi, anyi tshipungidi, pankatshi petu ne Nzambi. Tudi tulaya bua:
-
Kuangata dina dia Kilisto pa mutu petu.
-
Kuikala kumuvuluka.
-
Kulama mikenji Yende.
Mu dipingana, Nzambi udi utulaya se Nyuma Wende neikala netu. Miaku ya masambila a biadidia bia tshijila adi atuvuluija tshipungidi etshi lubingu lonsu. (Tangila Dilongesha ne Bipungidi 20:77, 79.)
Kuangata kua Nyuma wa Tshijila kudi kuenza tshitupa tshia mushinga mu Ditambula
Pakatambula Yezu, Nyuma wa Tshijila wakatuluka pa mutu pende mu tshimfuanyi tshia nkutshi (tangila 2 Nefi 31:8). Lelu ewu, padi bantu batambula, badi bajadikibua. Etshi tshidi tshiumvuija se: badi bapeta dibenesha disunguluka didi dibakumbaja bua kupeta dipa dia busukudi bua Nyuma wa Tshijila (tangila 2 Nefii 31:17). Nyuma wa Tshijila udi mua kutudimuisha ku njiwu, kutusamba, kutulombola bua tuangata mapangadika mimpa, ne kutuambuluisha bua kumvua dinanga dia Nzambi (tangila Dilongesha ne Bipungidi 39:6).
Tudi mua Kukudimuna Mutshima Misangu Yonsu
Nzambi uvua mumanya se; netuenza bilema. Nansha bituikala tudienzeja, netuenza mibi ne katuakufika ku dinemeka malaya etu a ntambu to. Nanku Yeya udi utupesha bonsu mushindu wa tuetu kukudimuna mitshima, (Tangila Dilongesha ne Bipungidi 18:13.) Dituku dionsu, tudi mua kuditatshisha bua kulomba luse ne kuakaja mâlu mabi onsu. Tudi mua kusambila ne kulomba luse lua Nzambi. Nunku bituangata biadidia bia tshijila ne didipuekesha mu moyo, tudi mua kupeta Nyuma wa Tshijila (tangila 3 Nefi 18:11).
Ntshinyi Tshidi Mifundu Yamba bua Ditambula
Baledi badi ne bua kuambuluisha bana babu bua badilongolola bua kutambula (tangila Dilongesha ne Bipungidi 68:25).
Bana badi ne bidimu muinshi mua muanda-mukulu, kabena dijinga ne kutambula to (tangila Moloni 8).
Patudi tutambula, tudi tulaya bua “kudila ne badi badila; … ne kusamba badi ne dijinga dia disamba, ne kuikala bajadiki ba Nzambi diba dionso, mu bintu bionso, ne mu miaba yonso” (Mosiah 18:9).
© 2021 kudi Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, February 2021. Tshiluba. 17464 760