“Modimo O re Boleletse Gore Re Kolobediwe,” Liahona, Tlhakole 2021
Molaetsa wa Liahona wa Kgwedi le kgwedi, Tlhakole 2021
Modimo o re Boleletse Gore Re Kolobediwe
Jeso Keresete o beile sekao sa go kolobediwa ke mongwe yo o nang le taolo ya Modimo.
Ntswa re se na dintlha tse di ntsi ka botshelo jwa ga Jeso Keresete, re itse gore o ne a kolobediwa fa a ne a le dingwaga di ka nna masome a mararo (bona Luke 3:23). Fa ke dingwe tse re di ithutang ka kolobetso go tswa mo sekaong sa Gagwe.
Ya Motho Mongwe le mongwe
Fa re godile mo go lekaneng go bolela pharologanyo fa gare ga tshiamo le tshiamololo, Rara wa Legodimo o batla re kolobediwa (bona Dithuto le Dikgolagano 18:42). Jeso o ne a itekanetse, Mme O ne a itshenkela go kolobediwa le go sala morago ditaelo tsa Modimo (bona Mathaio 3:13–17; 2 Nephi 31:7). Le e leng bao ba ba setseng ba tlhokafetse ba ka amogela kolobetso. Re ba e naya ka go kolobediwa mo boemong jwa bone kwa ditempeleng. (Bona Dithuto le Dikgolagano 128:15-18.)
E e dirwang ka Taolo
Jeso ga a ka a kolobediwa ke mongwe le mongwe fela. O ne a tsamaya ka tlhomamo kwa go ntsalae Johane, yo o neng a na le taolo ya boperesiti e e tswang kwa Modimong. Morago ga Jeso a sena go tlhokafala le barutwa ba Gagwe ba bolailwe, taolo eo ya boperesiti ya latlhega mo lefatsheng. Mme, ka 1829, Johane wa Mokolobetsi a bonala mo go Joseph Smith mme a mo naya taolo ya kolobetso mo leineng la Modimo. Ka ntlha ya tsosoloso eo, re ka kolobetsa ka taolo yone eo gompieno.
Tsholofetso e e Tsela pedi
Kolobetso e akaretsa tsholofetso e e tsela pedi, kgotsa kgolagano, fa gare ga rona le Modimo. Re solofetsa:
-
Go amogela leina la ga Keresete.
-
Go Mo gakologelwa ka metlha.
-
Go tshegetsa ditaelo tsa Gagwe.
Mo poelong,Modimo o re solofetsa gore Mowa wa Gagwe o tla nna le rona ka metlha. Mafoko a dithapelo tsa Sakaramente a re gakolola ka ga kgolagano e beke nngwe le nngwe. (Bona Dithuto le Dikgolagano 20:77, 79.)
Go amogela Mowa o o Boitshepo ke Karolo e e Botlhokwa mo Kolobetsong
Morago ga Jeso a sena go kolobediwa, Mowa o o Boitshepo wa bonala mo setshwanong sa lephoi (bona 2 Nephi 31:8). Gompieno, morago ga batho ba sena go kolobediwa, ba a tlhomamisiwa. Se se raya gore ba amogela tshegofatso e e tlhaolegileng e mo go yone ba lalediwang go amogela neo ya mowa o o itshekisang ya Mowa o o Boitshepo (bona 2 Nephi 31:17). Mowa o o Boitshepo o ka re tlhagisa ka diphatsa, wa re gomotsa, wa re kaela go dira ditshwetso tse di molemo, le go re thusa go utlwa lorato la Modimo (bona Dithuto le Dikgolagano 39:6.).
Re Ka Ikwatlhaya ka Metlha
Modimo o ne a itse gore re tlaa dira diphoso. Le ntswa maiteko a a molemo a rona, re ka leofa mme ra tlhaela go diragatsa ditsholofetso tsa rona tsa kolobetso. Jalo O naya mongwe le mongwe wa rona sebaka go ikwatlhaya. (Bona Dithuto le Dikgolagano 18:13.) Letsatsi le Letsatsi re ka leka thata go kopa maitshwarelo mme ra baakanya diphoso dingwe le dingwe. Re ka rapela mme ra kopa maitshwarelo a Modimo. Ke gone, fa re tsaya sakaramente ka dipelo tse di ikokobeditseng, re ka nna le Mowa o o Boitshepo mo go rona (bona 3 Nephi18:11).
Dikwalo tse di boitshepo Tsa Reng Ka ga Kolobetso?
Batsadi ba tshwanetse go thusa bana ba bone go ipaakanyetsa kolobetso (bona Dithuto le Dikgolagano 68:25).
Bao ba ba kwa tlase ga dingwaga tse di ferabobedi ga ba tlhoke go kolobediwa (bona Moroni 8).
Fa re kolobediwa, re solofetsa go “lela le bao ba ba lelang; … go gomotsa bao ba ba tlhokang kgomotso, le go ema jaaka basupi ba Modimo ka dinako tsotlhe le mo dilong tsotlhe, le mo mafelong otlhe” (Mosia 18:9).
© 2021 ka Intellectual Reserve, Inc. All rights reserved. Printed in USA. Tetla ya Sekgoa: 6/19. Tetla ya Thanolo: 6/19. Thanolo ya Molaetsa wa Liahona wa Kgwedi le kgwedi, Tlhakole 2021. Puo. 17464 763