“Jesus Christ Asked Us to Take the Sacrament,” Liahona, March 2021
ຂ່າວສານປະຈຳເດືອນ Liahona, ເດືອນມີນາ 2021
ພຣະເຢຊູຄຣິດໄດ້ຂໍໃຫ້ເຮົາຮັບສິນລະລຶກ
ເຮົາໄດ້ຖືກຊຳລະລ້າງ ແລະ ໄດ້ຮັບການປິ່ນປົວຂະນະທີ່ເຮົາລະນຶກເຖິງພຣະຜູ້ຊ່ວຍໃຫ້ລອດຂອງເຮົາໃນແຕ່ລະອາທິດ.
The Last Supper [ຄາບເຂົ້າເທື່ອສຸດທ້າຍ], ໂດຍ ຄາລ ເຮັນຣິກ ບະລ່າ
ກ່ອນພຣະອົງສິ້ນພຣະຊົນ, ພຣະເຢຊູຄຣິດໄດ້ຮັບປະທານອາຫານມື້ສຸດທ້າຍຊຶ່ງເອີ້ນວ່າຄາບເຂົ້າເທື່ອສຸດທ້າຍ. ໃນຕອນທ້າຍຂອງຄາບເຂົ້າ, ພຣະອົງໄດ້ແນະນຳສິນລະລຶກໃຫ້ກັບຜູ້ຕິດຕາມຂອງພຣະອົງ. ພຣະອົງໄດ້ຫັກເຂົ້າຈີ່ ແລະ ໃຫ້ພອນມັນ. “ເຮັດຢ່າງນີ້ໃຫ້ເປັນທີ່ລະນຶກເຖິງເຮົາ,” ພຣະອົງໄດ້ກ່າວ (ລູກາ 22:19). ຈາກນັ້ນພຣະອົງໄດ້ໃຫ້ພອນ ແລະ ແບ່ງປັນເຫລົ້າອະງຸ່ນຈອກໜຶ່ງ.
ພາກສ່ວນໜຶ່ງຂອງການນະມັດສະການປະຈຳອາທິດ
ເມື່ອສາດສະໜາຈັກຂອງພຣະເຢຊູຄຣິດໄດ້ຖືກຟື້ນຟູຄືນສູ່ໂລກ, ສິນລະລຶກໄດ້ກາຍເປັນພາກສ່ວນໜຶ່ງຂອງການນະມັດສະການປະຈຳອາທິດ. ໃນລະຫວ່າງໂບດ, ສິນລະລຶກໄດ້ຖືກໃຫ້ພອນ ແລະ ແຈກຢາຍໂດຍຜູ້ທີ່ດຳລົງອຳນາດຖານະປະໂລຫິດ. ເຂົາເຈົ້າອະທິຖານໂດຍການນຳໃຊ້ຄຳເວົ້າຈາກພຣະຄຳພີ (ເບິ່ງ ໂມໂຣໄນ 4; 5). ຈາກນັ້ນແຕ່ລະຄົນທີ່ເຂົ້າຮ່ວມປະຊຸມຈະກິນເຂົ້າຈີ່ ແລະ ນ້ຳເພື່ອລະນຶກເຖິງພຣະເຢຊູຄຣິດ ແລະ ການເສຍສະລະຂອງພຣະອົງເພື່ອເຮົາ, ໃນວິທີທີ່ພຣະອົງໄດ້ຂໍໃຫ້ເຮົາເຮັດ.
ຮູບພາບ ໂດຍ ແອງຈີລາ ຊຸດເຕີ
ການກຽມພ້ອມເພື່ອຮັບສ່ວນ
ເພື່ອກຽມພ້ອມຮັບສິນລະລຶກ, ເຮົາຄວນຄິດຢ່າງຈິງຈັງກ່ຽວກັບຊີວິດ ແລະ ການເລືອກຂອງເຮົາ. ເຮົາຄວນກັບໃຈຈາກຄວາມຜິດພາດ ແລະ ບາບຂອງອາທິດທີ່ຜ່ານມາ, ລວມທັງການຂໍອະໄພຈາກພຣະເຈົ້າ. ເຮົາບໍ່ຈຳເປັນຕ້ອງດີພ້ອມທຸກຢ່າງເພື່ອຮັບສິນລະລຶກ, ແຕ່ວ່າເຮົາຄວນຖ່ອມໃຈ.
Prayer at Gethsemane [ການອະທິຖານທີ່ສວນເຄັດເຊມາເນ], ໂດຍ ແດວ ພາສັນ
ເປັນຫລາຍກວ່າເຂົ້າຈີ່ ແລະ ນ້ຳ
ການຮັບສິນລະລຶກເປັນເວລາທີ່ສັກກາລະບູຊາ ແລະ ສັກສິດ. ຄຳອະທິຖານໃນພິທີສິນລະລຶກເຕືອນເຮົາວ່າຂະນະທີ່ເຮົາກິນເຂົ້າຈີ່ ແລະ ນ້ຳ, ເຮົາລະນຶກເຖິງພຣະກາຍ ແລະ ໂລຫິດຂອງພຣະເຢຊູຄຣິດທີ່ມອບໃຫ້ແກ່ເຮົາ. ເຮົາສັນຍາທີ່ຈະຕິດຕາມພຣະອົງ ແລະ ດຳລົງຊີວິດແບບຊາວຄຣິດ. ເຮົາສັນຍາທີ່ຈະພະຍາຍາມຮັກສາພຣະບັນຍັດຂອງພຣະເຈົ້າ. ໃນການຕອບແທນ, ພຣະວິນຍານສັກສິດຈະປອບໂຍນ, ນຳພາ, ແລະ ປິ່ນປົວເຮົາ.
ການຕໍ່ພັນທະສັນຍາ
ເມື່ອເຮົາຜູ້ທີ່ໄດ້ຮັບບັບຕິສະມາຮັບສິນລະລຶກດ້ວຍໃຈທີ່ບໍລິສຸດ, ເຮົາໄດ້ຕໍ່ພັນທະສັນຍາທີ່ເຮົາໄດ້ເຮັດໃນພິທີບັບຕິສະມາ. ນີ້ລວມທັງການໄດ້ຮັບພຣະວິນຍານບໍລິສຸດ ແລະ ຖືກຊຳລະລ້າງໃຫ້ສະອາດຈາກບາບຄືດັ່ງດຽວກັນກັບເຮົາໄດ້ຮັບບັບຕິສະມາອີກຄັ້ງ. ນີ້ແມ່ນຄວາມຫວັງ ແລະ ຄວາມເມດຕາ ທີ່ພຣະເຢຊູໄດ້ສະເໜີມອບໃຫ້ເຮົາແຕ່ລະຄົນ. ມັນບໍ່ເຄີຍສາຍເກີນໄປທີ່ຈະກັບໃຈ ແລະ ໄດ້ຮັບການໃຫ້ອະໄພ.
That Ye Do Always Remember Me [ວ່າເຈົ້າລະນຶກເຖິງເຮົາຢູ່ຕະຫລອດເວລາ], ໂດຍ ແກຣີ ແອວ ແຄບ, ຫ້າມຄັດລອກ
ພຣະຄຳພີກ່າວວ່າຢ່າງໃດກ່ຽວກັບສິນລະລຶກ?
ເຮົາຄວນສຳຫລວດຕົວເອງທາງວິນຍານ, ເບິ່ງເຂົ້າໄປທາງໃນຢ່າງຈິງໃຈ, ກ່ອນຈະຮັບສິນລະລຶກ (ເບິ່ງ 1 ໂກຣິນໂທ 11:28).
ຫລັງຈາກທີ່ພຣະອົງໄດ້ຟື້ນຄືນພຣະຊົນແລ້ວ, ພຣະເຢຊູໄດ້ສະແດງວິທີແກ່ຜູ້ຄົນຂອງພຣະອົງໃນອາເມຣິກາເຖິງການຮັບສິນລະລຶກ (ເບິ່ງ 3 ນີໄຟ 18).
ສາດສະດາໃນຍຸກປະຈຸບັນໄດ້ບອກໃຫ້ເຮົາໃຊ້ເຂົ້າຈີ່ ແລະ ນ້ຳສຳລັບສິນລະລຶກ, ແຕ່ວ່າສິ່ງທີ່ເຮົາໄດ້ກິນ ຫລື ດື່ມນັ້ນບໍ່ສຳຄັນ (ເບິ່ງ ຄຳສອນ ແລະ ພັນທະສັນຍາ 27:2). ບາງຄັ້ງຜູ້ທີ່ມີພູມແພ້ຕ້ອງໄດ້ກິນເຂົ້າຈີ່ຊະນິດພິເສດ.
© 2021 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, March 2021. Laotian. 17466 331
The Last Supper, by Carl Heinrich Bloch; photograph of young woman praying by Angela Suitter; Prayer at Gethsemane, by Del Parson; That Ye Do Always Remember Me, by Gary L. Kapp, may not be copied