“Nagkasapulan iti Ubing a Lalaki a Mangisalakan iti maysa a Purok,” Para iti Pigsa dagiti Agtutubo, Abr. 2021, 10–11.
Binulan a Mensahe iti Para iti Pigsa dagiti Agtutubo Abril 2021
Nagkasapulan iti Ubing a Lalaki a Mangisalakan iti maysa a Purok
Agtawen laeng ni Tom Fanene iti 12, ngem idi kellaat a nagsaknap ti makapatay a sakit ti purokna a Samoa, a naidawat kenkuana nga agaramid kadagiti dadakkel a banag.
Panangiladawan ni James Madsen; ladawan manipud iti Getty Images
Kas iti kuna ti tema dagiti agtutubo iti daytoy a tawen, “isagsaganayo ti pamuon ti naindaklan nga aramid” (Doktrina ken Katulagan 64:33). Iti unos ti pakasaritaan ti Simbaan, masansan a dagiti agtutubo ti agakem iti napateg a papel iti napepeggad a panawen iti panangbangon iti pagarian ti Dios. Adtoy ti maysa a pagarigan.
Epidemia iti Isla
Nasurok a 100 a tawenen ti napalabas, kadagiti Isla ti Samoa ti Taaw Pacifico, ti agtutubo a lalaki nga agnagan iti Tom Fanene ti napateg a tulong bayat ti biag-ken-patay a kasasaad dagiti miembro ti Ti Simbaan ni Jesucristo dagiti Santo iti Ud-udina nga Aldaw.
Nagnaed ni Tom iti maysa a purok a maawagan iti Sauniatu, a binangon dagiti Santo iti Ud-udina nga Aldaw iti lugar a paguummongan ken pagaramidan iti maysa a komunidad. Kas met laeng kadagiti Santo ti Dios iti dadduma a panawen ken lugar, napadasanda dagiti pannubok kasta met dagiti milagro kabayatan ti panagtitinnulongda a mangbangon iti pagarian ti Dios. Dimteng ti maysa a pannubok idi 1918 idi dimmanon ti pandemia iti trangkaso iti purok.
Apaman a dimteng ti sakit, nangdaddadael daytoy, ket alisto a nagwaras daytoy. Dumani tunggal maysa kadagiti agarup 400 nga agnanaed iti purok ti naidalit iti sakit gapu iti daytoy. Maysa laeng a paris iti nasalun-at tapno tumulong a sumaranay: ti maysa a nataengan a lalaki ken ti 12-ti-tawenna a ni Tom.
Pammati ken Napasnek a Panagtrabaho
Inaramat ti pamilia ni Tom ti pammatida iti pannakaipasangona iti sakit idi ket nakakitada ti milagro kas banagna. Nagsakit ti inaudi a kabsat ni Tom a ni Ailama a nasapsapa iti sumagmamano a tawen. Nagtagainep ti amada, ni Elisala, a naikkan ti nalawag a pangiturong iti no ania ti aramidenna a mangaywan ken ni Ailama: mangsapul iti maysa a kayo ti wili-wili, mangikkat iti sumagmamano nga ukis dayta a kayo, ken bayoenna a mangala iti tubbogna. Inaramid ni Elisala daytoy ket intedna ti tubbogna ken Ailama a nanginum iti daytoy ket naimbagan iti saan a mabayag. Nakita ni Tom no kasano a ti panagtignay a sipapammati ket makatulong a mangparmek iti sakit.
Kabayatan ti pandemia iti trangkaso idi 1918, inaramat ni Tom ti pammatina bayat ti napasnek a panagtrabahona a mangtaripato kadagiti tao iti purok. “Tunggal bigat napanak namalaybalay tapno mangpakan ken mangdalus kadagiti tao ken tapno ammuen no asino ti natay,” kinunana.
Mapan agsakdo iti danum manipud iti ubbog ket mangyeg iti danum iti tunggal balay. Aguli kadagiti kayo ti niog, purosen ken ukisanna dagitoy, ket pisienna nga alaen ti tubbogna nga ipainum daytoy iti masakit. Pinartina amin a manok iti purok tapno agaramid iti pagkaldo para iti tunggal pamilia.
Panangaramid iti Naidumduma
Kabayatan daytoy a pandemia, agarup apagkapat ti amin a tao iti Samoa ti natay iti trangkaso. Natay pay ti sumagmamano kadagiti tao iti purok ni Tom. Timmulong ni Tom a nagkali kadagiti tanem a pangikalian iti nasurok a 20 kadakuada, agraman iti bukodna nga ama, ni Elisala.
Ngem pagyamanan iti napasnek nga aramid ken naayat a panagasikaso ni Tom, adu a tao ti nakaungar a nagbiag iti purokna. Nakaaramid iti dakkel a pagdumaan kadagita a tao ken iti pannakabangon ti pagarian ti Apo iti Samoa. Isu ti “nangisagsagana iti pamuon ti naindaklan nga aramid.”
Ket iti bukodyo a wagas, kastakayo met.
Mabalin a dikayo maawagan a mangaramid kas kadagiti inaramid ni Tom, ngem dakayo, kinapudnona, ar-aramatenyo ti pammatiyo iti nadumaduma a wagas a mangaramid iti dakkel a pagdumaan kadakayo, iti dadduma, ken iti aramid ti panangbangon iti pagarian ti Dios.
Mangipakpakitakayo iti pagwadan iti pamiliayo, gagayyem, ken iti dadduma pay babaen ti panangipakita iti saguday, kinaanus, kinasayaat, ken ayat. Agserserbikayo iti dadduma. Makiramramankayo iti panagadal iti nasantuan a kasuratan ken panagkararag. Ibingbinglayyo dagiti kinapudno ti naisubli nga ebanghelio ni Jesucristo.
Kabayatan daytoy napalabas a tawen, adu kadakayo ti agar-aramid kadagitoy a banag bayat ti panagibtur kadagiti epekto ti pandemia. Mabalin a dikayo pay nagsakdo iti danum wenno nagukis iti niog ken nangtaripato iti 400 a tao tapno agsubli ti salun-atda, ngem dakayo ti nangyeg kadagiti tao iti liwliwa, namnama, rag-o, ken talna iti adu a dadduma pay a wagas.
Saan a napatpateg ti edadyo ngem iti pammatiyo ken ti kinatallugodtayo nga agtrabaho ken agserbi iti dadduma. Dagiti pagwadan manipud iti napalabas, kas ken ni Tom Fanene ket makatulong kadakayo a mangisagsagana iti pamuon ti naindaklan nga aramid ti Dios.
© 2021 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, April 2021. Ilokano. 17467 864