“Insalakannatayo ni Jesucristo manipud iti Basol ken Ipapatay,” Liahona, Abril 2021
Binulan a Mensahe iti Liahona , Abril 2021
Insalakannatayo ni Jesuscristo manipud iti Basol ken Ipapatay
Gapu iti sakripisiona, addaantayo amin iti gundaway a mangsapul iti agnanayon a talna ken rag-o.
Ni Cristo a Mangparparsua iti Daga, ni Robert T. Barrett
Itudotayo ni Jesucristo kas Mangisalakantayo. Dayta ket gapu ta inkarona dagiti basbasoltayo ket pinarmekna ti bileg ti ipapatay. Insalakannatayo! Ti sakripisiona para kadatayo, a maawagan iti Pannubbot, ti kapatganen a pasamak a napagteng. Gapu Kenkuana, saan a kanibusanan ti patay. Gapu Kenkuana, mapakawantayo kadagiti basoltayo, agbalintayo manen a nadalus, ket dumakkeltayo a nasaysayaat iti inaldaw.
Ni Jesucristo ti Inauna
Sakbay ti yaay iti daga, nakipagindegtayo kadagiti nailangitan a nagannaktayo. Kas Inauna, timmulong ni Jesucristo a nangaramid iti daytoy napintas a lubong. Isu ti napili nga agbalin a Mangisalakantayo ken immanamong a mayanak iti daga tapno mabalinna ti mangipakita iti naan-anay a pagwadan, mangisuro iti ebangheliona, ken leppasenna ti Pannubbot para kadatayo.
O Amak, ni Simon Dewey
Binayadan ni Jesucristo dagiti Basbasoltayo
Idi naammuan ni Jesus nga Isu ket dandanin matay, napan iti maysa a minuyongan a maawagan iti Getsemani tapno agkararag. Kabayatan dayta a kararag, nangrugin nga agbayad para kadagiti basbasoltayo. Sitatallugod a nagsagaba tapno ditayo agsagaba—no agbabawitayo. No tallikudantayo dagiti basbasoltayo ken surotentayo la ketdi ti Mangisalakan , makasaraktayo iti pannakapakawan ken pannakapaimbag. Gapu iti napadasanna iti Getsemani, maawatan ni Jesus mismo no ania ti kayarigan ti tunggal maysa kadatayo. Nariknana ti amin a ladingit, sakit, ken saemtayo. Daytoy ti umuna a paset ti Pannubbot.
Ti Pannakaitanem ni Cristo, ni Carl Heinrich Bloch
Pinarmek ni Jesucristo ti Ipapatay
Kalpasan ti kararagna iti Getsemani, ni Jesus naliputan, natiliw, ken nakedngan a matay babaen ti pannakailansa iti krus. Nupay isu ti kabilgan iti amin, impalubos ni Jesus ti Bagina a matay iti krus. Siaayat nga inkabil dagiti pasurotna ti bagina iti maysa a tanem. Dida naamiris a nupay natayen ti bagina, sibibiag pay laeng ti espirituna iti lubong dagiti espiritu. Kalpasan ti tallo nga aldaw, nagbiag manen ni Jesus ket sinarungkaranna ida, a mangipampaneknek a mabalinna a parmeken ti patay. Daytoy ti nangileppas iti Pannubbot. Gapu ta nagungar ni Jesucristo, agbiagto manen ti tunggal maysa kadatayo kalpasan ti ipapataytayo.
Sibibiag Isuna, ni Simon Dewey
Ti Kaipapanan ti Paskua ken ti Paskua ti Panagungar
Rambakan ti adu iti lubong ti dua a piesta opisial a makatulong kadatayo a manglaglagip iti Pannubbot ni Jesucristo. Kabayatan ti Paskua, lagipentayo nga addaan iti panagyaman a nagtallugod ni Jesus nga umawat iti mision ti yaayna iti daga, uray pay mairaman iti panagsagaba ken ipapatayna para kadatayo. Rambakan ti Paskua ti Panagungar ti balligi ti Mangisalakan iti basol ken ipapatay, a mangted kadatayo iti namnama para iti masakbayan nga agnanayon a rag-o.
Ni Cristo a Mangaw-awag kada Pedro ken Andres, ni James Taylor Harwood
Ania ti Kuna dagiti Nasantuan a Kasuratan maipapan iti Pannubbot ti Mangisalakan?
Gapu ta am-ammonatayo a naan-anay ni Jesus, mabalinna ti “sumaranay,” wenno tumulong, kadatayo (kitaen iti Alma 7:11–12).
Maawatan ti Mangisalakan dagiti liday ken ladingittayo (kitaen iti Isaias 53:2–5).
Imbaon ti Dios ni Jesus a mangisalakan kadatayo gapu ta ay-ayaten ti Dios ti tunggal maysa kadatayo (kitaen iti Juan 3:16–17).
Inkararagan ni Jesus dadagiti pasurotna, agraman kadatayo, a tapno masalakniban manipud iti dakes ken makipagkaykaysa Kenkuana ken iti Nailangitan nga Ama (kitaen iti Juan 17).
Awisennatayo ti Mangisalakan a sumurot Kenkuana ken agsubli iti sidongna (kitaen iti Doktrina ken Katulagan 19:16–19, 23–24; 132:23).
© 2021 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, Abril 2021. Ilokano. 17467 864