“Mukul Se Na Enenuh In Molwelah Mura Se,” Nuh ke kuh luhn Mwet Fuhsr, Eprel 2021, 10–11.
Mahlwem nuhkwewa Nuh ke Kuh luhn Mwet Fuhsr Sramsram, Eprel 2021
Mukul Se Na Enenuh In Molwelah Mura Se
Tom Fanene el yac 12 , tuhsruhk ke pacl se ma mas na upac se sun mura lal fin acn Samoa, pahng el in oruh ma yohk.
Sroal ma sel James Madsen; petsac sin Getty Images
Oacna ke tim luhn mwet fuhsr ke yac inge fahk uh, kom “oakiyac pwelucng nuh ke orekma na wolacna se” (Doctrine ac Covenants 64:33). Ke ma etweyuck ke alu uh emet me, mwet fuhsr uh wacna muhta oruh ip yohk lalos ke pacl upac in muhsaheack tohkohsrahi luhn God. Sie srihkasrak ah pa inge.
Island Epidemic
Ke yac 100 somlah ah, ke tuhka Samoa ke inkof Pacsifik, tuhlihk mukul fuhsr se suc pahngpahng Tom Fanene el kahsruh na yohk srihpac se nuh sin mempuhr ke Alu luhn Jisus Kraist luhn Mwet Luhlahlfongi ke Lwen Sahflah ke puhluhn pacl se ma mwet uh e kuh in misac.
Tom el muhta ke mura se pahngpahng Sauniatu, ma sukokyak sin Mwet Luhlahlfongi ke Lwen Sahflah ke acn se inge tuh in acn in toeni lalos. Oacna mwet luhlahlfongi luhn God ke pacl sahyac ac acn sahyac, elos puhlakihn ma upac wi pac ma usrnguck luhn God ke elos tuhkweni orekma in muhsahelah tohkohsrahi luhn God. Sie ma upac ah tuhkuh ke 1918, ke pandemic in flu se tuh sun mura se inge.
Ke pacl se na mas se inge sun acn sac, arulacna upac, ac el sa na fahsrwelihk. Apkuhran in nohfohn mwet sin mwet 400 ah elos maswack ac oan na ke ma kiyaclos ke srihpen mas se inge. Mwet na ekahsr selos pa kuh ac kuh in forfor uh: mukul mahtuh se ac Tom ke el yac 12 ah.
Luhlahlfongi ac Orekma upac
Sucu lal Tom ah kampare ke luhlahlfongi lalos ke pacl oasr mas met ac elos liye ke ma usrnguck uh sikyak ke srihpen luhlahlfongi lalos. Tamuhlwel srihsrihk se wiyacl Tom suc pahngpahng Ailama el mas ke yac ekahsr met ah. Pahpah tuhmwaclos, Elisala, el oruh sie mwemwe ma ituckyang sapsap el in ukwe lah meac elac oruh in karuhnguhnuhlwacng Ailama:sokwack sahk wii-wii soko, eslah kuhtuh srohpoh ah, ac tukyac ac isaclah srano ah. Elisala el oruh ma se inge ac use tuhkuh srano sac sang nuh sel Ailama, suc nuhmlah ac kwelah ke pacl na sa. Pwacnwacng Tom el liye lah orekma nuh ke luhlahlfongi el fuhkah kahsruh in kuhtanglah mas uh.
Ke pacl se ke 1918 ke epidemic ke flu sac, Tom el orekmakihn luhlahlfongi ke el kampare orekma in karihngihn mwet ke mura sac. “Litutacng nuhkwewa nga som nuh ke kais sie lohm in kihteyac ac ahknwacsnwacsyelah mwet ah ac in konwacack lah suc misac uh,” el fahk.
El utiyac pakiht in kof e ke infacl soko ac use nuh ke lohm nuhkwewa. El fanwack kwacnu, isyac nu, kwacmlah, ac puhtwaclah in orwacni sronin nu ah in us som nuh yurin mwet mas ah. El oacyacpac inuyac nohfohn won ke mura se inge in oraclah sup nwacn kais sie sucu.
Oraclah sie Eklac
Ke pandemic se inge, ac sun sie tahfuh ahkosr ma ke nohfohn na mwet fin acn Samoa misac ke flu se inge. Kuhtuh sin mwet ke mura lal Tom ah misac pac. Tom el kahsruh puhkanwack kuhlyuhk ac pihkihnyac mwet puhs liki mwet 20, wi pahpah tuhmwacl, Elisala.
Tuhsruhk kuloh nuh sel Tom ke orekma upac lal, mwet puhkantwen ke mura se lal inge pain moullac. El oraclah eklac na yohk se nuh sin mwet inge ac nuh ke muhsaheack luhn tohkohsrahi luhn Leum fin ac Samoa. El “oaki pwelucng nuh ke orekma wolacna se.”
Ac ke innek na lom sifacna, kom pac.
Sahp tiac pahng kom in oruh kain se Tom el oruh ah, tuhsruhk kom, ahkyohkye luhlahlfongi lom ke ohiyac puhs ma ac oraclah eklac na yohk se sum, nuh sin mwet sahyac, ac nuh ke orekma nuh ke muhsaheack tohkohsrahi luhn God.
Kom fihliyac srihkasrak nuh sin sucu lom, kawuck, ac mwet sahyac ke wo lom, muhtweng, kuhlwacng, ac luhngse. Kom kuhlwacnsapuh mwet sahyac. Kom kampare ke riti ma suhmuhslah ac pruhe. Kom akacsruhi ke ma pwacye ke wosasuc luhn Jisus Kraist suc fohlohkihnyuckyak tari uh.
Ke yac se tari ah, puhkantwen suwos oruh ma inge in kampare kuhtanglah ma sikyak ke pandemic se. Sahp kom tiac us kof ac nu ac liyacacng mwet 400 elos in kwelac, tuhsruhk kom oruh in sang ahkweye nuh sin mwet, finsrak, engan, ac mislac ke kain in ohiyac puhkantwen.
Matwom tiac elyah yohk liki na luhlahlfongi lom ac luhngse lom in orekma in kuhlwacnsapuh mwet sahyac. Srihkasrak ke pacl somlah ah, kain se kacl Tom Fanene uh, kuh in kahsrwe kom in liye lah enenweyuck kom ke oakiyacn pwelucng ke orekma wolacna luhn God.
© 2021 sin Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lweng nuh ke Monthly For the Strength of Youth Message, April 2021. Kosraean. 17467 868