Jisus Kraist El Molikuhtlac liki Ma Koluk ac Misac

Ke srihpen kihsackuhnlah lal, kuht nohfohn oasr pacl wowo lasr in sokwack mislac ma pahtpaht ac engan.

Kuht nuhnkuh kacl Jisus Kraist ma el pa Mwet in Molwelah lasr uh. Pa oruh el misac ke ma koluk lasr ac kuhtanglah misac uh. El molikuhtlac! Kihsackuhnlah lal nuh sesr, pahngpahng Iwaclah, pa ma se ma yohk srihpac ac met ma sikyak uh. Ke srihpacl, tiac misac pa sahflahiyac uh. Ke srihpacl, kuht e kuh in eis nuhnak muhnahs ke ma koluk lasr, eklac sifilpac nwacsnwacs, ac kapwack wolac liki met ah ke kais sie lwen.

Jisus Kraist pa wen se emeet nahtuhl Pahpah Luhng.

Met liki kuht tuhkuh nuh facluh, kuht muhta yurin pahpah tuhmasr inkuhsrao. Ke el ekihn tuhlihk mahtuh se emeet uh, Jisus Kraist el kahsruh oraclah facluh wolacna se inge. Sollac el in Mwet in Molwelah lasr ac el insese in isuslac nuh fin facluh el in muh kuh in fihliyac srihkasrak wowo se, luti wosasuc lal, ac ahkfahsryelah Iwaclah nuh sesr.

Jisus Kraist El Molwelah Molin Ma Koluk Lasr Uh

Ke Jisus el etwacack muh elac apkuhran in misac ah, El som nuh ke imac se pahngpahng Gethsemane in pruhe. Ke pacl se el pruhe ah, El muhtwacwacack in elah molin ma koluk lasr uh. El kweok kuht in muh tiac—fin kuht auliyak. Ke kuht forlah liki ma koluk lasr ac ukwe Mwet in Molwelah lasr uh, kuht kuh in sokwack nuhnak muhnahs ac onweyucklac. Ke srihpen ma el puhlakihn fin acn Gethsemane, Jisus el kahlwem kac lah fuhkah atacsr kais sie. El puhla nohfohn ahsor lasr, mas lasr, ac kweok lasr. Pa inge ip se met ke Iwaclah sac.

Jisus Kraist El Kuhtanglah Misac

Tukun pruhe lal fin acn Gethsemane, ahklahlfoniyuhk Jisus, sruhuh el, fwack in acnwucki el fin sahksin soko. Finne El kuh liki nuhkwewa, Jisus el lwelah elan misac fin sahksin ah. Mwet luhlahlfongwel ah fihliyac mahnol lun kuhlyuhk in pokongo se. Elos tiacna akihlen lah finne mahnol misac, Nguhn Lal srwackna moul oasr ke facl luhn nguhn. Lwen tolu tohkoh, Jisus el sifilpac moulyak ac muhtwactalah nuh yohrohlos, ahkpwacyei nuh selos lah el kuh in kuhtanglah misac. Ma se inge ahksahfye Iwaclah sac. Ke srihpen Jisus el sifilpac moulyak, kais sie sesr kuh in sifil moulyak tukun kuht misac.

Kalmacn Kristmas ac Istuh

Inkaiyacn facluh ahkfuhlwactye aluhte luo ma kahsrwe kuht in esam Iwaclah lal Jisus kraist. Ke pacl in Kristmas uh, kuht esam ke kuloh lah Jisus el eis orekma lal in tuhkuh nuh facluh, finne in kweok ac misac kacsr. Istuh el ahkfuhlwactye kuhtanglah lal Mwet in Molwelah ke ma koluk ac misac, ma use nuh sesr finsrak nuh ke engan ma pahtpaht ke pacl fahsruh uh.

Meac Ma Suhmuhslah Fahk ke Iwaclah luhn Leum?

Ke srihpen Jisus el etwekuht na pwacye uh, El kuh in kahsrwe kuht (liye Alma 7:11–12).

Leum El kahlwem ke suhpwacr ac ahsor lasr (liye Isaiah 53:2–5).

God El suhpwaclma Jisus elan molikuhtlac mweyen God El luhngse kais sie sesr (liye John 3:16–17).

Jisus el pruhe ke mwet luhlahlfongwel, wi kuhtyang, in karihngihnyuck liki ma koluk ac in weluhl sie ac Pahpah tuhmasr Inkosrao (liye John 17).

Mwet in Molwelah el suli kuht in fahsr tohkohl ac fohlohklac nuh yohrohl (liye Doctrine and Covenants 19:16–19, 23–24; 132:23).

© 2021 sin Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lwenglah luhn Monthly Liahona Message, April 2021. Kosraean. 17467 868