“Ng di Imo el Buik e Osobelii a Beluu,” Kirir a re Ngeasek, Apr. 2021, 10–11.
Bek el Buil Kirel a Klisichir a Rengeasek Klumech, Ongeua el Buil 2021
Ng di imo el Buik e Osobelii a Beluu
Tom Fanene a mle teruich me a eru a rekil, eng di tial meringel secher er a lesiseb er a beluu er a Samoa, eng mlo kedong el mo meruul a meklou el tekoi.
Zunga el mlara James Madsen; siasing a mlara Getty Images
Me sel moktek er a re ngeasek a melekoi, kau a “meleketek er a dodai er a ngarbab el ureor” (Doctrine and Covenants 64:33). Ngar tial reksi er a Ikelesia, ea rengeasek a blechoel ngarngii a le relii el klou a ultutelel sel ngarngii a metacherbesul taem el meleketek er a rengedel a Dios. Tiakid a tara okesiul tiang.
Klou er Secher ra Iuns
Betok er a dart el rak ra mla memong, er a beluu er a iuns er a Samoa el ngara Daob er a Basibik, e a ngeasek el buik el ngklel a Tom Fanene a mle klou a ngelsouil er a taem er a bocha locheru er a kodall el teletael el rechedal a Ikelesia er a Jesus Kristo er a Uriul-klebesei el Santo a mla er ngii.
A Tom a kiliei er a beluu el Sauniatu, el ngii a mlokdubech er a re Uriul-klebesei el Santo el mla er tiaikid el basio e te mo kldibel e mekdebechii a imol kekerel beluu. El kmal diua re Santo er a Dios er a bebil er a taem me a basio, le te siliseb er a ongarm me a dirrek el ngilai ongasireng er a loureor el tmak el meleketek er a rengedel a Dios. A tara ringel a mlei er sera 1918, er sera klou el secher le bocha er tial kekerel beluu.
Sera le siseb tial secher, eng meral mle meringel, el di mle merechel el oberk. Te kmeed el rokui el chad el locha ngara eua el dart a di mlo mechiuaiu leng tial secher a uchul. Te di mle sesei er tir a mle telkib lungil meng mle sebechir el lomais: el imol klou el chad me a teruich me a eru rekil el Tom.
Klaumerang me a Meringel el Ureor
A telungalek er a Tom a mle ngara klaumerang er a temel tial rakt ruchei me te miles a ongasireng. A ochellel a Tom er a Ailama a mle smecher er a mekesai el rak ruchei. A demerir, er a Elisala, a ulmerrous el ngilai a osisechakl el komong mekera a bo lomekungil er a Ailama: bom sikii a kerrekar el wili-wili, e bkobk a bebil er a budel, e bo mrusech lotobed osechel. A Elisala a riruul a ikang e ngilai osechel el mora Ailama, meng ngilim meng di mle mereched el moungil. Me a Tom a mla mesang sel douedikel loba klaumerang eng sebeched el moungil er a sechered.
Me sera le ngarngii sel klou el secher er a 1918, e a Tom a uluedikl loba klaumerang er ngii el meringel el oureor mengetmokl ra rechad er sel le kiei er ngii. “Bek el tutau e ak merael obliil lomekang e mengetmokl er a rechad e osiik ra re mla mad,” ng ouchais.
Meng melai a ralm ra omeuachel e olengakt a ralm el mora bek el obliil. Ng melemiakl a lius, meruu a lius, mengeched, e melit el melai osechel mo chomesterir a re smecher. Ng milkeuad a rokui el malk er tial beluu el ngarngii el mo meruul a uasech el kelir a re bek el telungalk.
Mengetmokl e Lolngeseu
Sera le ngarngii tial secher, eng bekord el eual tiud ra rechad el ngara Samoa a mlad er tial rakt. A re bebil ra rechad er tial beluu el ngarngii a Tom me te mlad. A Tom e ulengeseu el mengiis a debuul e melakl ra re betok ra luich el chad, luldimukl ra demal ra Elisala.
Engdi ke doureng a sulel a Tom ra meringel lureor e lou beltik el reng el milngetmokl me te betok el chad er sel beluu a dimlak lemad. Ng mle klou lomeruul a le kiltmokl el mo er tirkel chad ma kirel a ulekurulel a rengedel a Rubak er a Samoa. Ng “milleketek ra dodai ra klou el lureor.”
Me ngokiu er sel moruul er ngii, e ke dirrek el lolengeseu.
Locha mo diak ke mokedong el mo meruul a uaikel tekoi el luruul a Tom engdi kau a melisiich ra klaumerang er kau lokiu a kakerous el teletael el klou a le relii er kau, ma re bebil, ma mora urellel a meleketek er a rengedel a Dios.
Kau a okesiu el mora telungalk er kau, a re sechelim, ma re bebil lokiu a ungil blekerdelem, kllouelreng, blekokeuii, ma beltik el reng. Ke mesiou ra re bebil. Kau a menguiu a chedaol lechukl e mesuub e ngar a nglunguuch. Kau a olecholt a ikel klemerang ra mla moluut el ebangkelio ra Jesus Kristo.
Tial mlo merek el rrak, eng betok er kemiu a miruul a ikal tekoi e ngara ongarm er tial rakt. A ltang direkak bom ngai a ralm ng mengur e mengetmokl ra re eual dart el smecher me bo lungil, engdi kau amlamesterir a rechad a ongelaod, omeletkir, deurreng, ma budech lokiu a betok el teletael.
A rekim a diak a belkul er sel kuk klaumerang er kau el soam loureor e mesiou ra re bebil. A okesiu er a ngara mong, el ua Tom Fanene, a sebechel ngosukid el mesa el kmo kulsbechall er a omeleketek el dodai er a ngarbab el urerel a Dios.
© 2021 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/19. Kengei er a Oidel: 6/19. Oidel a Bek el Buil el Klumech el Kirel a Klisichir a Rengeasek, Ongeua el buil 2021.Palauan.17463 881 Palauan.17467 881.