“A Jesus Kristo Ulsebelid er a Klengit me a Kodall,” Liahona, April 2021
Bek el Buil LiahonaKlumech, Ongeua el buil 2021
A Jesus Kristo Ulsebelid er a Klengit me a Kodall
E le Ngii el mlo chouarm me a uchul, e kede rokui el ngarngii a techelled el mo soiseb er a diak a ulebengelel el budech me a deureng.
Kristo el Omeob er a Beluulechad, mlara Robert T. Barrett
Ke de omes el mora Jesus Kristo el Osobeled. E le Ngii el mlo tenget el kirel a kngtid e mlo mesisiich er a kodall. Ngii a ulsebelid! Ng mlo chouarm el kired, el tia okedongall el kmo Tngakireng, el kot el klou a ultutelel tekoi el mla dubech. Le Ngii a uchul, ea kodall a diak el ulebongel. Le Ngii a uchul, eng sebeched el nguu a klausubes er a kngtid, el lmuut el mo beches, e mukeroul el moungil er a bek el sils.
A Jesus Kristo a Mle Kot el Ngalek
Uchei er a demei er a beluulechad, e kede kiliei lobengterir a rdelad me a rdemad er a babeluades. Me sel le Kot el Ngaled, ea Jesus Kristo ullengeseu el lomeod er tial klebokel el beluulechad. Ngii a mlengilt el mo Osobeled e kilengei el me mechell er a beluulechad me bol sebechel meral cherrungel okesiu, osisecheklii a ebangkelio er Ngii, e churrengelii a Tngakireng el kired.
Kau el Demak, mlara Simon Dewey
A Jesus Kristo a mle Tongetengii el Kirel a Kngtid.
A Jesus er a bolodengei el kmong mochu er a kodall, eng mlo er a sers lokedongall el Gethsemane el mo meluluuch. Ngar tiaikid el nglunguuch, e Ngii a mocha omuchel el melenget el kirel a kngtid. Ngii a mle mimokl el mo chouarm me bol sebeched el diak bo de charm—alsekum e kede mo ouchel a rengud. Sel bo de ikrii a kngtid e doltirakl er a Osobel, eng sebeched el mo nguu a klausubes me a omekungil. El le a ikel blol siseb er ngii er a Gethsemane, e a Jesus a kmal medengei el kmo ng uangera le uai a derta er kid. Ng mlo melchesiu a rokui el kngtil a rengud, sechered, me a ringeled. Tiaikid sel kot el tebedechel a Tngakireng.
Omelakl er a Kristo, mlara Carl Heinrich Bloch
A Jesus Kristo a mlo Mesisiich er a Kodall
Uriul er a nglunguchel er a Gethsemane, ea Jesus a mlo motelechakl, mlengai, leng miltib el kirel mo mad er a kerus. Ngii a mesisiich er a rokui, engdi a Jesus a di mlengii el mecherei meng mo mad er a kerus. A re oltirakl er Ngii a ngiluu a bedengel mora chelsel a debull. Te bai dimlak lolechesuar el bedengel lulekeuad, eng di a delbengel a dirke ngar el ngara belurir a rdeleb. Edei el klebesei ruriul, ea Jesus a liluut el mo chad e uleldingel er tir, el olechotel a kmo Ngii a sebechel mo kats er a kodall. Tiaikid a churrengelii a Tngakireng. E le uchul a Jesus a milekiis er a kodall, a derta er kid a lmuut el mo ngar ruriul er a de mad.
Ngii a Ngar, mlara Simon Dewey
Belkul a Kuristmas me a Baskua
Betok er a beluulechad a oldeu er a eru lulengull el sils el ngii a ngosukid el mo melatk er a Tngakireng er a Jesus Kristo. Sel le Kurismas, e kede mo melbedebek loba omereng el saul el kmo a Jesus a mle mimokl el kongei er a urerel el mera beluulechad, ngii me sel luldimukl er ngii a mo chouarm e mo mad el kired. A Baskua a outkeu er sera bol kats a Osobel er a klengit me a kodall, el ngii a meskid a doureng el kirel a diak a ulebengelel el deureng er a ngarmedad.
Kristo Lomekedong er a Petrus me a Andrew, mlara James Taylor Harwood
A Chedaol Llechukl Ngerang Melekoi el kirel a Tngakirel er a Osobel?
E le Jesus el cherrungel medengelkid, Ngii a sebechel “oltekau,” malechub e ngolengeseu, er kid. (mesa Alma 7:11–12).
A Osobel a ungil medengei a kngtil a rengud me a llengeled (mesa Isaia 53:2–5).
A Dios a uldureklii a Jesus el me olsobel er kid e le a Dios a betik a rengul er a derta er kid (mesa Johanes 3:16–17).
A Jesus a milluluuch el kirel a roltirakl er Ngii, uldimukl er kid, el mo selbechakl er a cherrarou e mo tang lobengkel me a Chedam er a Babeluades (mesa Johanes 17).
A Osobeled a oleker er kid el mo oltirakl er Ngii e lmuut el mora bita er Ngii. (mesa Doctrine and Covenants 19:16–19, 23–24; 132:23).
© 2021 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/19. Kengei er a Oidel: 6/19. Oidel a Klumech er a Bek el Buil er a Liahona , Ongeua el buil 2021.. Palauan.17467 881