“Pwutak emen pwehn Kapitala Kousapw Ehu,” Ong ni Kakehlepen Me Pwulepwul kan, Epreil 2021, 10–11.
Padahk en Sounpwong kan Ong ni Kakehlepen me Pwulopwul kan,Epreil, 2021
Pwutak emen me Kapitala Kousapw ehu
Tom Fanene sounparte 12, ahpw ni ansou me soumwahu doar ehu ahpw lel nan wasahn ah kouson nan Samoa, pwukoah laud ehu ahpw kohieng ih.
Kasansalda sang James Madsen; kilel sang Getty Images
Me sansal sang nan oaralap en me pwulopwul kan en pahr wet koasoia, kumwail koaskoasone poahson en doadoahk laud ehu (Doctrine and Covenants 64:33). Nan erein poadoapoad en Mwomwohdisoht, me pwulopwul kan kin kalapw iang pahkihda pwukoah kesempwal nan ansou apwal kan en kokoudahn Sapwellimen Koht wehi. Iet ehu karasaras.
Soumwahu Lusulus ni Deke
Daulilahr sounpar 100 samwalahro, ni Dekeh kan en Samoa nan lepin Sed en Pacific, pwutak pwulopwul men adaniki Tom Fanene kasalehda sawas kesempwal ehu ni ansou me mwekid en mour oh mehla pwarada rehn irail tohn Mwomwohdiso en Sises Krais en Souleng en Imwin Rahn-akan.
Tom kin koukouson nan kousapw ehu me adaniki Sauniatu, wasa ehu me Souleng en Imwin Rahn-akan diarada pwehn wia arail wasahn poakonpene oh wiawasahn kouson. Me duwehte Souleng en Koht kan me mih nan iraihr en ahnsou oh wasa teikan, irail kin ale kahpwal kan oh pil manaman kan ni arail kin wie doadoahk pwehn patpene kauwada wehin Koht. Ehu kahpwalo pwarada nan 1918, ansou me soumwahu doar influenza lel kousapwo.
Ni en soumwahuo lel wasao, e inenen kehlail, oh e mwadangete doupeseng. Kerenieng irail me400 ko koaros tohn kousapwo wenkihdi nan ihmw pwehki soumwau wet. Ihte aramas riemen me sohte soumwahuda oh kak kohseli: iei ohl laud men oh Tom sounpar 12.
Pwoson oh Doadoahk Laud
En Tom peneinei doadoahngkiher arail pwoson ni arail sohpai soumwahu mwowe oh kilangehr manaman kan. Rien Tom pwutak tikitik Ailama soumwahudahr sounpar kei mwowe. Ara pahpa, Elisala, ouramandahr soangen wini me e pahn kihong Ailama: rapakihda ehu tuhke en wili-wili, kihsang kili, oh sukpene oh kihsang pile. Elisala wiahda met oh wahdo pileo rehn Ailama, e ahpw nimala oh mwadangete kehlailda. Tom eri kilangehr mwomwen doadoahngki pwoson pwehn kak powehdi soumwahu.
Nan erein soumwahu doar en influenza nan 1918, Tom doadoahngki pwoson ni eh kin doadoahk laud pwehn apwali aramas en kousapwo. “Ni menseng koaros I kin kohla ni ehu ehu ihmw pwehn kamwenge oh kamwakele aramas akan oh kin diar me melahr kan,” pwutako ahpw nda.
Pwutako kin idip pihl sang ni pillapo oh wahla ni ihmw kan koaros. E kin douda ni nihkan, kesehdi uhpw, kodomada, oh kadingada pwehn kihpene pileh kan oh wahla rehn me soumwahu kan. Pwutako pil kin kemehla malek kan nan kousapwo pwehn suhpwiada ong ehu ehu peneinei.
Wekilahn Ahnsou
Nan erein soumwahu doar wet, ele pahkis ehu en aramas en Samoa mehkihla influenza. Ekei tohn en Tom ah kousapwo pil iang mehla. Tom sewese weirada sousou kan oh saripedi tohtosang meh 20, iangahki ah pahpa, Elisala.
Ahpw kalahngan ong en Tom ah doadoahk laud oh limpoak, tohto aramas nan ah kousapwo pitila. Pwutako wiahda lapalahn wekila ong aramas pwuko oh ong ni koukoudahn wehin Kauno nan Samoa. E koaskoasonehdi poahson en doadoahk laud ehu.
Oh ong pein amwail ahnsou, iei pil kumwail.
Kumwail ele sohte pahn malipilipda pwehn wia soahng kan me Tom wiadahr, ahpw kumwail kin, ni mehlel, doadoahngki pwoson nan wiepe kei me pahn wiahda mehkot katapan ong kumwail, ong mehteikan, oh ong ni kokoudahn wehin Koht.
Kumwail kin wiahda ehu karasaras ong amwail peneinei, kempoakepamwail kan, oh mehteikan ni amwail kin kasalehda me mwahu, kanengamah, kadek oh limpoak. Kumwail kin papah mehteikan. Kumwail kin onohnopiki iren pwuhk sarawi kan oh kapakap. Kumwail kin ehukihda me mehlel kan en rongamwahu kopwurupwurdo en Sises Krais.
Nan erein pahr nekiero, tohto kumwail me wiwiahier mepwukat ni amwail kin powehdi soumwahu doar kan. Mwein kumwail saikinte idip pihl oh daurdi uhpw oh apwali aramas 400 pwehn kehlailda ahpw kumwail kihongehr aramas nsenamwahu, koapwoaroapwoar, popohl, oh meleilei ni songen mwekid teikan.
Amwail sounpar sohte katepe sang amwail pwoson oh amwail men doadoahk oh papah mehteikan. Karasaras kan sang mahs, me duwehte en Tom Faneneo kak sewese kumwail kilang me mie anahnepamwail en iang koasonehdi poahson en Sapwellimen Koht doadoahk kesempwal.
© 2021 by Intellectual Reserve, Inc. Kolokol pwuhng koaros. Ntingda nan USA. Kamanaman ong ni lokaiahn Wai: 6/19. Kamanaman ong kawehwe: 6/19. Kawehwepen Padahk en Sounpwong kan Ong Kakehlepen me Pwulopwul kan, Epreil 2021, Mahsen.17467 885.