Padahk en Sounpwong kan en Liahona, Epreil 2021

Sises Krais Ketin Doarei Kitail sang Dihp oh Mehla

Pwehki Sapwellime tohnmeteio, kitail koaros ahneki ansou mwahu en diar meleilei poatoapoat oh popohl.

Krais Ketin Kapikada Sampa, sang Robert T. Barrett

Kitail kin nda me Sises Krais iei atail Sounkomour. Met pwehki Ih me ketin pwaindahr dipatail kan oh powehdi manaman en mehla. E ketin kamaur kitaillahr! Sapwellime tohnmetei ong kitail, me kin kahdaneki Tomwo, wia mehkot me keieu kesempwal me wiawiher. Pwehki Ih, mehla sohte kin wia ni imwin mehkoaros. Pwehki Ih, kitail kak ale mahkepen dipatail kan, pwurehng mwakelekelada, oh kekeirda nan ehu ehu rahn akan.

Sises Krais me Wia Mesehni.

Mwohn atail kohdo sampa, kitail kin kouson rehn atail samatail oh inatail kan nanleng. Ni ah wia Mesehni, Sises Krais ketin iang sawas kapikada sampa lingan wet. E pilipilda en wiahla atail Sounkomour oh ketin pwungkihda en ipwidi sampah pwe Ih me pahn kak kasalehda karasaras pwung, padahngki Sapwellime rongamwahuo, oh ketin kaunsekala Tomwo ong kitail.

O Maing Sahm, sang Simon Dewey

Sises Krais ketin Pwaindahr Dipatail kan.

Ni en Sises ah ketin mwahngiada me E pahn ketin pwoula ansou keren, E ketla nan mwetuwel me adaneki Gethsemane pwehn loulou. Nan erein loulouo, E ketin tapidahr pwain pweinen dipatail kan. E ketin kupwurehda en ale lokolok pwe kitail en dehr kalokolok--ma kitail koluhla. Ni atail sohpeisang dipatail kan oh uhd idawehn Sounkomouro, kitail kak diar mahk oh kakehlail. Pwehki dahme E ketin sapwellimanekihda nan Gethsemane, Sises ketin mwahngi ni unsek duwen emen emen kitail. E ketin mwahngi atail pahtou kan, soumwahu kan, oh medek kan koaros. Met wia pali keieu en Tomwo.

Neknekdi en Krais, sang Carl Heinrich Bloch

Sises Krais ketin Powehdier Mehla

Mwurin Sapwellime loulouo nan Gethsemane, Sises ketin pangpangala, selidi, oh ale kalokolok en mehla sang kalohpwuhla. Itarete Ih me keieu manaman, Sises ketin mweidala Kahlepeo en pwoula pohn lohpwuho. Sapwellime tohnpadangko ni limpoak nekidedi Kahlepeo nan sousou ehu. Irail sohte wehwehki me itarete Kahlepeo pwoulahr, Sapwellime ngehno ketin ieiaste nan sapwen ngehn. Rahn silu mwuri, Sises ketin iasada oh ketla rehrail, kasalehda me E ketin powehdier mehla. Met kaunsekiala Tomwo. Pwehki Sises ketin iasadahr, emen emen kitail pahn pwurehng ahniki mour mwurin atail mehla.

E ketin Ieias, sang Simon Dewey

Wewehn Krismas oh Ihster.

Palilaud en sampa kin kauwauwih rahn kesempwal riau me kin sewesei kitail en tamataman Tomw en Sises Krais. Ni ansoun Krismas, kitail kin kataman ni kaping kalahngan me Sises ketin kuwpurki en ketdo sampa, itarete mwekid wet pahn iangahki lokolok oh pwoula pwehki kitail. Ihster kin kauwauwih en Sounkomouro powehdi dihp oh mehla, me kihong kitail koapwoaroapwoar ong popohl poatoapoat ong ansou kohkohdo kan.

Krais Ketin Malipe Peter oh Andrew, sang James Taylor Harwood

Dahme Iren Pwuhk Sarawi Kan Mahsanih duwen Tomw en Sounkomouro?

Pwehki Sises mwahngi kitaill ni unsek, E kak ketin apwalih, de sewesei, kitail (tehk Alma 7:11–12).

Sounkomouro mwahngi atail medek kan oh lokolok (tehk Aiseia 53:2–5).

Koht ketin kadarodo Sises pwehn komour kitailla pwehki Koht ketin poakohng emenemen kitail (tehk Sohn 3:16–17).

Sises ketin loulouki Sapwellime tohnpadahngko, iangahki kitail, pwehn perehsang me suwed oh en iang Ih waihla ehu oh Sahm Nanleng (tehk Sohn 17).

Atail Sounkomouro ketin lukei kitail en idawehn Ih oh pwurala Reh (tehk Doctrine and Covenants 19:16–19, 23–24; 132:23).

© 2021 by Intellectual Reserve, Inc. Kolokol pwuhng koaros. Ntingda nan USA. Kamanaman ong ni lokaiahn Wai: 6/19. Kamanaman ong kawehwe: 6/19. Kawehwehpen Padahk en Sounpwong kan en Liahona, Epreil 2021. Mahsen. 17467 885.