“Ho Nkile Moshanyana ho Pholosa Motse,” Bakeng la Matla a Bacha, ʹMesa. 2021, 10–11.
Molaetsa oa khoeli Bakeng la Matla a Bacha ʹMesa 2021
Ho Nkile Moshanyana ho Pholosa Motse
Tom Fanene o ne a le lilemo li 12 feela, empa ha lefu le sehloho le hlasela motse oa habo oa Samoa, o ile a kotjoa ho etsa lintho tse kholo.
Setśoantśo ka James Madsen; ho tsoa ho Getty Images
Joalokaha moralo oa bacha oa selemo sena o bolela, “u ala motheo oa mosebetsi o moholo” (Lithuto tsa Tumelo le Lilekane 64:33). Hohle nalaneng ea Kereke, bacha hangata ba bapetse seabo sa bohlokoa ka linako tsa bohlokoa ho aheng ʹmuso oa Molimo. Mohlala o le mong ke oona.
Seoa sa Sehlekehleke
Lilemong tse fetang 100 tse fetileng, lihlekehlekeng tsa Samoa tsa Leoatleng la Phasifiki, mohlankana ea bitsoang Tom Fanene o bile thuso ea bohlokoa lipakeng tsa lefu le bophelo molemong oa litho tsa Kereke ea Jesu Kreste ea Bahalaleli ba Mehla ea Kajeno.
Tom o ne a lula motsaneng o bitsoang Sauniatu, o neng o thehiloe ke balumeli ba “Bahalaleli ba Mehla ea Kajeno” sebakeng seo e le sebaka sa ho bokana le ho theha sechaba. Joalo feela ka Bahalaleli ba Molimo linakong le libakeng tse ling, ba ile ba feta liteko le mehlolo ha ba ntse ba sebetsa ho aha ʹmuso oa Molimo ʹmoho. Qholotso e le ʹngoe e bile ka 1918, ha seoa sa sefuba se fihla motseng.
Hang ha bokuli bo fihla, bo ile ba ruthutha, ʹme ba nama kapele. Palo e ka bang 400 ea baahi bohle ba motse e ne e robetse liphateng tse chesang ka lebaka la seoa sena. Ke ba ʹmaloa feela ba bona ba neng ba phetse hantle ho lekana hore ba ka khona ho tsamaea: e le monna-moholo le Tom ea lilemo li 12.
Tumelo le ho Sebetsa ka Thata
Lelapa labo Tom le ne le sebelise tumelo ha le tobane le bokuli pejana ʹme la bona mehlolo ka lebaka leo. Moena oa Tom, Ailama o ne a ile a kula lilemong tse ʹmaloa pejana. Ntata bona, Elisala, o ne a ile a ba le toro moo a ileng a fuoa litaelo tse qollehileng tse mabapi le seo a lokelang ho se etsa ho hlokomela Ailama: a fumane sefate sa wili-wili, a ebole makhapetla le ho tula lero. Elisala o entse sena ʹme a tlisetsa Ailama lero, ea ileng a le noa ʹme kapele a fola. Kahoo Tom o ne a bone kamoo ho etsa lintho ka tumelo ho ka thusang ho hlola bokuli.
Nakong ea seoa sa sefuba sa 1918, Tom o ile a bontśa tumelo ha a ntse a sebetsa ka thata ho hlokomela batho ba motse. O re: “Hoseng ho hong le ho hong ke ne ke ea ka ntlo le ntlo ke fepa le ho hlapisa batho le ho tseba hore na ke mang ea hlokahetseng.”
O ne a kha linkho tsa metsi selibeng ebe o tlisa metsi ntlong e ʹngoe le e ʹngoe. O ile a hloella lifate tsa kʹhokʹhonate, a khetha likʹhokʹhonate, a li hlohlora, ʹme a li bula hore a bokelle lero ho le tlisetsa ba kulang. O boetse a hlaba likhoho tsohle tsa motseng ho etsetsa lelapa ka leng sopho.
Ho Etsa Phapang
Nakong ea seoa sena, hoo e ka bang kotara ea batho bohle ba Samoa ba bolailoe ke sefuba. Batho ba bang motseng oa habo Tom le bona ba hlokahetse. Tom o ile a thusa ho cheka mabitla le ho pata ba fetang 20 ba bona, ho kenyeletsoa le ntate oa hae, Elisala.
Empa ka lebaka la mosebetsi o boima oa Tom le tlhokomelo e lerato, batho ba bangata motseng oa habo ba ile ba pholoha. O entse phapang e kholo ho batho bao le ho aheng ʹmuso oa Morena Samoa naheng ea Samoa. O ne a “ala motheo oa mosebetsi o moholo.”
ʹMe ka tsela ea hao, le uena ho joalo.
Ha ho hlokahale hore u etse mefuta ea lintho tseo Tom a li entseng, empa ha e le hantle, u ntse u sebelisa tumelo ka litsela tse fapaneng tse tla etsa phapang e kholo ho uena, ho ba bang, le mosebetsing oa ho aha ʹmuso oa Molimo.
U etsetsa lelapa la hao mohlala, metsoalle le ba bang ka ho bontśa bokhabane, mamello, mosa le lerato. U sebeletsa ba bang. U ntse u ithuta mangolo le thapelo. U arolelana linnete tsa evangeli e tsosolositsoeng ea Jesu Kreste.
Selemong sena se fetileng, bongata ba lona le bile le ntse le etsa lintho tsena ha le ntse le mamelletse litlamorao tsa lefu la seoa. Mohlomong ha u eso khe metsi le likʹhokʹhonate ʹme oa oka batho ba 400 hore ba hlaphoheloe, empa uena u tliselitse batho mohau, tśepo, monyaka le khotso ka litsela tse ling tse ngata.
Lilemo tsa hao ha li bohlokoa ho feta tumelo ea hao le boikemisetso ba hao ba ho sebetsa le ho sebeletsa ba bang. Mehlala ea nakong e fetileng, joalo ka ea Tom Fanene, e ka u thusa ho bona hore u ea hlokahala hore u rale motheo oa mosebetsi o moholo oa Molimo.
© 2021 by Intellectual Reserve, Inc. All rights reserved. E hatisitsoe USA. Tumello ea Sekhooa: 6/19. Tumello ea Phetolelo: 6/19. Phetolelo ea Monthly For the Strength of Youth Message, April 2021. Sesotho. 17467 639-3