“Jeso Keresete o re Bolokile mo Sebeng le Loso,” Liahona, Moranang 2021
Molaetsa wa Liahona wa Kgwedi le kgwedi, Moranang 2021
Jeso Keresete o Re Bolokile mo Sebeng le Loso
Ka ntlha ya setlhabelo sa Gagwe, rotlhe re na le sebaka sa go bona kagiso ya bosakhutlheng le boitumelo.
Keresete a Bopa Lefatshe, ka Robert T. Barrett
Re kaya Jeso Keresete jaaka Mmoloki wa rona. Seo ke ka ntlha ya gore O lefetse dibe tsa rona le go fenya thata ya loso. O re bolokile! Setlhabelo sa Gagwe mo go rona, se se bidiwang Tetlanyo, ke tiragalo e e botlhokwa thata e e kileng ya diragala. Ka ntlha ya Gagwe, loso ga se bokhutlho. Ka ntlha ya Gagwe, re ka itshwarelwa dibe tsa rona, ra ntlafala gape, le go tokafala letsatsi le letsatsi.
Jeso Keresete Ke Motsalwa pele
Pele ga re tla mo lefatsheng, re tshedile le batsadi ba rona ba selegodimo. Jaaka Motsalwa pele, Jeso Keresete o thusitse go bopa lefatshe le lentle le. O ne a itshenkelwa go nna Mmoloki wa rona mme a dumela go tsalwa mo lefatsheng gore A tle a tlhome sekao se se siameng, go ruta efangele ya Gagwe, le go re feleleletsa Tetlanyo a.
Rara Wa Me, ka Simon Dewey
Jeso Keresete o Lefeletse Dibe Tsa rona
Fa Jeso a setse a itse gore O tlaa tloga a swa , A ya kwa tshimong e e bidiwang Gethesemane go rapela. ka nako eo ya thapelo, A simolola go lefela dibe tsa rona. O bogile ka go rata gore re seka ra boga—fa re ka ikwatlhaya. Fa re sokologa mo dibeng tsa rona mme mo boemong ra sala Mmoloki morago, re ka bona boitshwarelo le pholo. Ka ntlha ya se A se itemogetseng kwa Gethesamane, Jeso o tlhaloganya tota tota gore go ntse jaana go nna mongwe le mongwe wa rona. O utlwile mahutsana a rona otlhe, malwetse, le ditlhabi. Se ke karolo ya ntlha ya Tetlanyo.
Phitlho ya ga Keresete, ka Carl Heinrich Bloch
Jeso Keresete o Fentse Loso
Morago ga thapelo ya Gagwe mo Gethesemane, Jeso o ne a tsiediwa, a tshwarwa, mme a atlholelwa loso ka go bapolwa. Le fa ntswa A ne a na le thata yotlhe, Jeso a itetlelela go swa mo sefapaanong. Balatedi ba Gagwe ka lorato ba baya mmele wa gagwe mo lebitleng. Ba ne ba seka ba lemoga gore le fa mmele wa Gagwe o sule, mowa wa Gagwe o ne o santse o tshela kwa lefatsheng la mowa. Morago ga malatsi a mararo, Jeso a boela mo botshelong gape mme a ba etela, go supa gore o ka fenya loso. Se sa feleletsa Tetlanyo. Ka ntlha ya gore Jeso o ne a tsosiwa, mongwe le mongwe wa rona o tla tshela gape morago ga re sena go swa.
O a Tshela, ka Simon Dewey
Bokao jwa Keresemose le Paseka
Mafatshe ka bontsi a ipelela malatsi a boikhutso a mabedi a a re thusang go gakologelwa Tetlanyo ya ga Jeso Keresete. Ka nako ya Keresemose, re gakologelwa ka boipelo gore Jeso o ne a rata go amogela thomo ya go tla mo lefatsheng, le fa ntswa seo se ne se akaretsa go boga le go re swela. Paseka e ipelela phenyo ya Mmoloki mo sebeng le loso, se se re nayang tsholofelo ya lobaka lo lo tla tlang la bosakhutleng la boitumelo.
Keresete o Bitsa Peter le Andrew, ka James Taylor Harwood
Dikwalo tse di boitshepo Tsa Reng ka Tetlanyo ya Mmoloki?
Ka ntlha ya gore Jeso o re itse gotlhelele, O ka re “tlamela,” kgotsa a re thusa, (bona Alema 7:11-12).
Mmoloki o tlhaloganya mahutsana a rona le pelobotlhoko (bona Isaia 53:2–5).
Modimo o rometse Jeso go re boloka gonne Modimo o rata mongwe le mongwe wa rona(bona Johane 3:16–17).
Jeso o ne a rapelela balatedi ba Gagwe, go akaretsa le rona, gore re sireletsege mo bosuleng le go re re nne bangwefela le Ene le Rara wa Legodimo (bona Johane 17).
Mmoloki wa rona o re laletsa go Mo sala morago le go boela kwa boleng teng jwa Gagwe (bona Doctrine and Covenants 19:16–19, 23–24; 132:23).
© 2021 by Intellectual Reserve, Inc. All rights reserved. Printed in USA. Tetla ya Sekgoa: 6/19. Tetla ya Thanolo: 6/19. Thanolo ya Molaetsa wa Liahona wa Kgwedi le kgwedi, Moranang 2021. Setswana. 16987 763