“Ano ang Nahimo sang Aton Manluluwas para sa Aton?,” Para sa Kusog sang mga Lamharon, Mayo 2021.
Priesthood nga Sesyon
Ano ang Nahimo sang Aton Manluluwas para sa Aton?
Mga Bahin (Excerpts)
Ano ang nahimo ni Jesucristo para sa tagsa sa aton? Ginhimo Niya ang tanan nga kinahanglanon para sa aton pagpanglakaton sa kabuhi pakadto sa kapalaran nga ginpahamtang sa plano sang aton Amay nga Langitnon. Mahambal ako parte sa apat ka mayor nga bahin sinang plano. …
Ang Pagkabanhaw nagahatag sa aton sang panan-awon kag kusog nga malampuwasan ang mga hangkat sang kabuhi nga ginaatubang sang tagsa sa aton kag sinang aton mga ginapalangga. Nagahatag ini sa aton sang bag-o nga panan-aw sang mga kakulangan sa pisikal, sa kaisipan, ukon emosyon nga naangkon naton sa pagkabun-ag ukon durante nga nagakabuhi. Nagahatag ini sa aton sang kusog sa pagbatas sang mga kalisud, mga kapierdihan, kag mga kapaslawan.
Ang Pagkabanhaw nagahatag man sa aton sing gamhanan nga motibo nga tumanon ang mga kasugoan sang Dios mientras nagakabuhi kita. …
Ang aton Manluluwas kag Manunubos nagbatas sang di-matungkad nga pag-antos agud mangin halad para sa mga sala sang tanan nga tawo nga magahinulsol. Ining nagabayad-sala nga sakripisyo naghatag sang pinakamataas nga kaayohan, ang cordero nga wala sing kasawayan, kabaylo sang tuman nga kalainan, ang mga sala sang bilog nga kalibutan.
… gintudloan kita ni Jesus sang plano sang kaluwasan. Ining plano nagalakip sang Pagtuga, sang katuyuan sang kabuhi, sang kakinahanglanon sang oposisyon, kag dulot sang kahilwayan sa pagpili. Gintudloan man Niya kita sang mga kasugoan kag mga kasugtanan nga kinahanglan naton tumanon kag sang mga ordinansa nga kinahanglan naton maeksperiyensyahan agud makabalik kita sa aton langitnon nga mga ginikanan. …
Ang aton Manluluwas nakabatyag kag nakahibalo sang aton mga pagsulay, sang aton mga paghimakas, sang aton mga hibubun-ot, kag sang aton mga pag-antos, kay kinabubut-on Niya nga gin-agyan ini tanan bilang kabahin sang Iya Pagbayad-Sala. … Dapat dumdumon sang tanan nga nagaantos sing bisan ano nga sahi sang tawhanon nga kahuyang nga ang aton Manluluwas nag-agi man sinang sahi sang kasakit, kag paagi sa Iya Pagbayad-Sala, nagatanyag Sia sa tagsa sa aton sang kabakod nga madala ini.