Bulanan nga Mensahe sa Liahona, Mayo 2021
Si Jesus Nabanhaw; Ang Pagtuo sa Iya Magasaylo sang mga Bukid
Ang pagtuo kay Jesucristo amo ang pinakamabaskog nga gahum nga maangkon naton sa sini nga kabuhi. Ang tanan nga butang posible sa ila nga nagapati.
Pinalangga kong mga kauturan, malipayon gid ako sa pribelihiyo nga maghambal sa inyo sa sining Domingo sang Pagkabanhaw.1 Ang nagabayad-sala nga pagsakripisyo kag Pagkabanhaw ni Jesucristo nagbag-o sang tagsa naton ka kabuhi sa katubtuban. Palangga Sia naton kag mapinasalamaton kita nga nagasimba sa Iya kag sa aton Amay nga Langitnon.
Sa sulod sang nagligad nga anum ka bulan, padayon kita nga nagapakigbato sa isa ka kalibutanon nga pandemya. Nahalawhaw gid ako sa inyo kabakod kag espirituhanon nga kabaskog sa atubang sang balatian, kasubo, kag pag-isahanon. Pirme ko ginapangamuyo nga, sa sini tanan, inyo mabatyagan ang wala nagalubad nga gugma sang Ginuo sa inyo. Kon inyo gin-atubang ang inyo mga pagtilaw nga may mas mabakod nga pagkadisipulo, ining nagligad nga tuig wala nangin walay kapuslanan sa inyo.
Sini nga aga, namati kita halin sa aton mga lideres nga naggikan sa tagsa ka ginapuy-an nga kontinente sang duta. Matuod gid, ang mga bugay sang ebanghelyo para sa tagsa ka rasa, hinambalan, kag katawhan. Ang Simbahan ni Jesucristo isa ka pangbug-os kalibutan nga simbahan. Si Jesucristo amo ang aton lider.
Salamat, nga bisan ang isa ka pandemya wala nakapahinay sang pasulong paabante sang Iya kamatuoran. Ang ebanghelyo ni Jesucristo amo gid ang ginakinahanglan sa sining naligban, magamo, kag lapyo nga kalibutan.
Ang tagsa ka anak sang Dios nagakaangay nga makabati kag magbaton sang nagapang-ayo, nagatubos nga mensahe ni Jesucristo. Wala na sing iban pa nga mensahe nga mas importante sangsa aton kalipayan—karon kag sa katubtuban.2 Wala na sing iban pa nga mensahe nga mas puno sang paglaum. Wala na sing iban pa nga mensahe nga makapadula sang pagbinaisay sa aton sosyedad.
Ang pagtuo kay Jesucristo amo ang pundasyon sang tanan nga pagtuluohan kag ang alagyan sang diosnon nga gahum. Suno kay Apostoles Pablo, “Sa walay pagtuo indi mahimo ang magpahamuot sa [Dios]: kay ang nagapalapit sa Dios kinahanglan magtuo nga amo sia, kag nga sia manugbalos sa mga nagapangita sa iya.”3
Ang tagsa ka maayo sa kabuhi—ang tagsa ka potensyal nga bugay nga may wala katapusan nga importansya—nagasugod sa pagtuo. Ang pagtugot sa Dios nga magpangibabaw sa aton mga kabuhi nagasugod sa pagtuo nga luyag Sia nga maggiya sa aton. Ang matuodtuod nga paghinulsol nagasugod sa pagtuo nga si Jesucristo may gahum nga magtinlo, mag-ayo, kag magpabakod sa aton.4
“Indi ninyo pag-ipanghiwala ang gahum sang Dios,” ang propeta nga si Moroni nagsiling, “kay nagahikot Sia paagi sa gahum, suno sa pagtuo sang mga anak sang tawo.”5 Ang aton pagtuo amo ang nagabukas sang gahum sang Dios sa aton mga kabuhi.
Ugaling, ang paggamit sang aton pagtuo mahimo nga daw makahalawhaw. May mga tinion nga nagapalibog kita kon bala makatipon kita sang bastante nga pagtuo agud makabaton sang mga bugay nga ginakinahanglan gid naton kaayo. Pero, ginpahamtang sang Dios inang mga kahadlok paagi sa mga pulong sang Propeta nga si Alma sa Libro ni Mormon.
Simple nga ginapangabay sa aton ni Alma nga mag-eksperimento sa mga pulong kag “maggamit sang isa ka tipik sang pagtuo, huo, bisan pa kon indi na kamo maglabaw sangsa maghandum sa pagpati.”6 Ang tinaga nga “tipik sang pagtuo” nagapadumdom sa akon sang promisa sang Ginuo sa Biblia nga kon “kita may pagtuo subong sa [liso] sang mustasa,” mahimo nga kita “magasiling sa sining bukid, Saylo didto; kag ini magasaylo; kag wala gid sing di-mahimo [sa aton].”7
Naintiendihan sang Ginuo ang aton mortal nga mga kahuyang. Tanan kita sa panalagsa nagakapaslawan. Pero nahibal-an man Niya ang aton dako nga potensyal. Ang liso sang mustasa nagasugod nga magamay pero nagadako bilang isa ka kahoy nga pwede pugaran sang mga pispis ang iya sini mga sanga. Ang liso sang mustasa nagasimbolo sang magamay pero nagatubo nga pagtuo.8
Ang Ginuo wala nagapangayo sang perpekto nga pagtuo agud makagamit kita sang Iya perpekto nga gahum. Pero nagapangabay Sia sa aton nga magpati.
Mahal kong mga kauturan, ang panawagan ko sa inyo sini nga aga sang Pagkabanhaw amo nga magsugod karon nga adlaw nga pabaskugon ang inyo pagtuo. Paagi sa inyo pagtuo, dugangan ni Jesucristo ang inyo abilidad nga magsaylo sang mga bukid sa inyo kabuhi,9 bisan pa nga ang inyo personal nga mga hangkat daw pareho kadako sang Bukid sang Everest.
Ang inyo mga bukid mahimo nga kasubo, pagduhaduha, balatian, ukon iban pa nga personal nga mga problema. Ang inyo mga bukid magalainlain, apang ang sabat sang tagsa ninyo ka hangkat amo ang pabaskugon ang inyo pagtuo. Nagakinahanglan ina sang pagtrabaho. Ang tamaran nga mga manugtuon kag nagapabuyan-buyan nga mga disipulo masami nga ginabudlayan sa pagtipon sang bisan isa ka tipik sang pagtuo.
Ang paghimo sing maayo sang bisan ano nga bagay nagakinahanglan sang pagtinguha. Ang mangin matuod nga disipulo ni Jesucristo wala sing kinalain diri. Ang pagpadako sang inyo pagtuo kag pagsalig sa Iya nagakinahanglan sang pagpaninguha. Luyag ko magtanyag sang lima ka panugyan agud buligan kamo sa pagpatubo sinang pagtuo kag pagsalig.
Una, magtuon. Magmangin matutum nga manugtuon. Ibuhos ang inyo kaugalingon sa balaan nga mga kasulatan agud maintiendihan sing mas maayo ang misyon kag pag-alagad ni Cristo. Hibaloa ang doktrina ni Cristo agud inyo maintiendihan ang gahum sini sa inyo kabuhi. Binagbinaga ang kamatuoran nga ang Pagbayad-Sala ni Jesucristo magamit sa inyo. Ginpas-an Niya sa Iya Kaugalingon ang inyo kalisud, ang inyo mga kasaypanan, ang inyo kahuyang, kag ang inyo mga sala. Nagbayad Sia sing kabaylo nga bili kag nagtigana sang gahum agud inyo masaylo ang tagsa ka bukid nga mahimo ninyo atubangon. Maangkon ninyo inang gahum paagi sa inyo pagtuo, pagsalig, kag kahanda sa pagsunod sa Iya.
Ang pagsaylo sang inyo mga bukid mahimo nga magkinahanglan sang milagro. Magtuon parte sa mga milagro. Ang mga milagro nagaabot suno sa inyo pagtuo sa Ginuo. Sentro sinang pagtuo amo ang pagsalig sa Iya pagbuot kag orasan—kon paano kag san-o Sia magabugay sa inyo sang milagroso nga bulig nga inyo ginahandum. Ang inyo kawalay-pagpati amo lamang ang magapugong sa Dios sa pagbugay sa inyo sang mga milagro agud sayluhon ang mga bukid sa inyo kabuhi.10
Kon mas nagatuon kamo parte sa Manluluwas, mangin mas mahapos ang pagsalig sa Iya kaluoy, sa Iya wala tupong nga gugma, kag sa Iya nagapabaskog, nagaayo, kag nagatubos nga gahum. Ang Manluluwas wala nangin mas malapit sa inyo sangsa tion nga nagapangatubang kamo sang mga hangkat nga may pagtuo.
Ikaduha, pilia nga magpati kay Jesucristo. Kon nagaduhaduha kamo parte sa Dios nga Amay kag sa Iya Pinalangga nga Anak ukon sa pagkabalido sang Pagpanumbalik ukon sa kamatuoran sang diosnon nga tawag ni Joseph Smith bilang propeta, pilia ang magpati11 kag magpabilin nga matinuohon. Dal-a ang inyo mga pamangkot sa Ginuo kag sa iban nga matinuohon nga bulig. Magtuon nga may handum nga magpati imbes nga nagalaum nga makakita sang mga diperensya sa kabuhi sang propeta ukon mga di-pagsinanto sa balaan nga mga kasulatan. Untati ang pagdugang sang inyo mga pagpangduhaduha paagi sa pagsugid sang mga ini sa iban nga nagaduhaduha man. Tuguti ang Ginuo nga tuytuyan kamo sa inyo pagpanglakaton padulong sa espirituhanon nga pagtukib.
Ikatatlo, mag-akto sa pagtuo. Ano ang dapat ninyo himuon kon may mas dako kamo nga pagtuo? Hunahunaa ini. Magsulat parte sini. Kag magbaton sing dugang nga pagtuo paagi sa paghimo sinang nagapangayo sing dugang pa nga pagtuo.
Ikaapat, magbaton sang sagrado nga mga ordinansa sing takos. Ang mga ordinansa nagabukas sang gahum sang Dios para sa inyo kabuhi.12
Kag ikalima, magpangayo sa inyo Amay nga Langitnon, sa ngalan ni Jesucristo, sang bulig.
Ang pagtuo nagakinahanglan sang pagtrabaho. Ang pagbaton sang rebelasyon nagakinahanglan sang pagtrabaho. Kay “ang tagsa-tagsa nga nagapangayo nagabaton; kag ang nagapangita makakita; kag ang nagapanuktok pagabuksan.”13 Nakahibalo ang Dios kon ano ang makabulig agud magtubo ang inyo pagtuo. Magpangayo, kag magpangayo liwat.
Ang wala nagapati ayhan magasiling nga ang pagtuo para sa mga mahuyang. Pero ining pagpati wala nagatalupangod sang gahum sang pagtuo. Nagpadayon ayhan ang mga Apostoles sang Manluluwas sa pagtudlo sang Iya doktrina pagkatapos sang Iya kamatayon, sa katalagman sang ila mga kabuhi, kon nagduhaduha sila sa Iya?14 Ihalad ayhan nanday Joseph kag Hyrum Smith ang ila mga kabuhi sa pagpangapin sang Pagpanumbalik sang Simbahan sang Ginuo kon wala sila sing pat-od nga saksi nga matuod yadto? Malab-ot ayhan sa halos 2,000 ka mga Santos ang nagkalamatay sa banas sang mga pionero15 kon wala sila sing pagtuo nga ang ebanghelyo ni Jesucristo ginpanumbalik? Matuod gid, ang pagtuo amo ang gahum nga nagapahanabo sang wala ginapaabot agud matuman ang imposible.
Indi pagpaluyaha ang pagtuo nga ara na sa inyo. Ginakinahanglan ang pagtuo agud magbuylog sa Simbahan kag magpabilin nga matutum. Ginakinahanglan ang pagtuo agud magsunod sa mga propeta sangsa mga eksperto kag bantog nga opinyon. Ginakinahanglan ang pagtuo agud magserbe sa misyon sa tion sang pandemya. Ginakinahanglan ang pagtuo agud magpangabuhi sing putli samtang ang kalibutan nagasinggit nga ang layi sang Dios sa kaputli indi na uso. Ginakinahanglan ang pagtuo agud tudloan ang mga kabataan sang ebanghelyo sa sekular nga kalibutan. Ginakinahanglan ang pagtuo agud ipangamuyo ang kabuhi sang isa ka pinalangga kag mas labi pa nga pagtuo agud batunon ang masubo nga sabat.
Duha ka tuig ang nagligad, ako kag si Sister Nelson nagbisita sa Samoa, Tonga, Fiji, kag Tahiti. Ining tagsa sinang nasyon nga isla nag-eksperiyensya sang madamol nga ulan sing pila ka adlaw. Ang mga miyembro nagpuasa kag nagpangamuyo nga ang ila mga miting sa gwa (sang Simbahan) maprotektahan sa ulan.
Sa Samoa, Fiji, kag Tahiti, insaktohan gid sa pagsugod sang miting, nag-untat ang ulan. Pero sa Tonga, ang ulan wala nag-untat. Pero ang 13,000 ka matutum nga mga Santos temprano pa kaayo nga nag-alabot agud makapungko, ang pasensyoso nga naghulat sa sige-sige nga pagbubo sang ulan, kag padayon nga nagpungko sa duha-ka-oras nga miting nga pwerte ka basa.
Amon nakita ang mapagsik nga pagtuo nga nagahikot sa tagsa ka taga-isla—pagtuo nga bastante agud pauntaton ang ulan kag pagtuo nga magpadayon sang wala mag-untat ang ulan.
Ang mga bukid sa aton mga kabuhi indi pirme masaylo sa paagi kag kon san-o naton gusto. Pero ang aton pagtuo pirme gid nga magatulod sa aton paabante. Ang pagtuo pirme nagapatubo sang aton pag-angot sa diosnon nga gahum.
Palihog tandai ini: kon ang tanan nga butang kag tanan nga tawo sa kalibutan nga inyo ginasaligan mapaslawan, si Jesucristo kag ang Iya Simbahan indi gid magpaslaw sa inyo. Ang Ginuo wala ginatuyo, kag wala man Sia nagatulog.16 Sia “amo man gihapon kahapon, karon, kag sa [palaabuton].”17 Indi Niya pagtalikdan ang Iya mga kasugtanan,18 ang Iya mga promisa, ukon ang Iya pagpalangga para sa Iya katawhan. Nagahikot Sia sing mga milagro karon, kag magahikot sang mga milagro sa palaabuton.19
Ang pagtuo kay Jesucristo amo ang pinakadako nga gahum nga ara para sa aton sa sining kabuhi. Ang tanan nga butang posible sa ila nga nagatuo.20
Ang inyo nagatubo nga pagtuo sa Iya magasaylo sang mga bukid—indi sang mga bukid nga bato nga nagapatahum sang kalibutan kundi ang mga bukid sang pag-antos sa inyo mga kabuhi. Ang inyo nagatin-ad nga pagtuo magabulig sa inyo nga bayluhan ang inyo mga hangkat sa indi matupungan nga pagtubo kag oportunidad.
Sa sining Domingo sang Pagkabanhaw, upod ang akon dako nga balatyagon sang pagpalangga kag kapasalamatan, ginadeklarar ko ang akon pagpamatuod nga si Jesucristo matuod gid nga nabanhaw. Nabanhaw Sia agud pangunahan ang Iya Simbahan. Nabanhaw Sia agud pakamaayuhon ang mga kabuhi sang mga anak sang Dios, kon diin man sila nagapuyo. Upod ang pagtuo sa Iya, mahimo naton sayluhon ang mga bukid sang aton mga kabuhi. Ginasaksi ko ini sa sagrado nga ngalan ni Jesucristo, amen.
© 2021 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, May 2021. Hiligaynon. 17468 861
Placeholder Image Credit