“Ania ti Inaramid ti Mangisalakantayo para Kadatayo?,” Para iti Pigsa dagiti Agtutubo, Mayo 2021.
Sesion iti Priesthood
Ania ti Inaramid ti Mangisalakantayo para Kadatayo?
Naadaw
Ania ti inaramiden ni Jesucristo para iti tunggal maysa kadatayo? Inaramidna ti amin a banag a kasapulan iti panagdaliasattayo itoy a biag nga agturong iti pagtungpalan a nabalabala iti plano ti Nailangitan nga Amatayo. Saritaek ti uppat a kangrunaan a sagudayen dayta a plano. …
Ikkannatayo ti Panagungar iti pannirigan ken pigsa nga agibtur iti karit itoy a biag a sarangten ti tunggal maysa kadatayo ken dagiti ipatpategtayo. Ikkannatayo iti baro a wagas a mangkita iti pisikal, mental, wenno emosional a pagkurangan idi nayanak wenno naalatayo iti mortal a biag. Ikkannatayo iti pigsa nga agibtur kadagiti ladingit, pannakaupay, ken pannakapaaytayo.
Ikkannatayo pay ti Panagungar iti nabileg nga insentibo nga agtungpal iti bilbilin ti Dios bayat ti mortal a biagtayo. …
Inibturan ti Mangisalakan ken Mannubbottayo ti di matukod a panagsagaba tapno agbalin a maysa a sakripisio para iti basbasol ti amin a mortal nga agbabawi. Indiaya daytoy pangsubbot a sakripisio ti kasayaatan a banag, ti natarnaw a kordero nga awan mulitna, para iti kangrunaan a kadagupan ti dakes, ti basbasol ti sangalubongan. …
… Insuro ni Jesus kadatayo ti plano ti pannakaisalakan. Mairaman ditoy a plano ti Panagparsua, ti panggep ti biag, ti panagkasapulan iti oposision, ken ti sagut ti karbengan nga agpili. Sinuruannatayo pay kadagiti bilin ken katulagan a nasken a tungpalentayo ken dagiti ordinansa a nasken a pasarantayo a mangisubli kadatayo kadagiti nailangitan a nagannaktayo. …
Marikna ken ammo ti Mangisalakan dagiti sulisogtayo, dagiti rigattayo, dagiti sakittayo, ken dagiti sagabaentayo, ta siaayat a pinasaranna amin dagitoy kas paset ti Pannubbotna. … Amin nga agsagaba iti ania man a kita ti sakit nasken a lagipenda a napadasan met ti Mangisalakantayo dayta a kita ti saem, ken babaen ti Pannubbotna, idiayaannatayo iti pigsa nga agibtur iti daytoy.