Mensahe ti Binulan a Liahona May 2021
Nagungaren ni Cristo; Pagtignayento ti Pammati Kenkuana dagiti Bantay
Ti pammati ken ni Jesucristo ti kinaindaklan a bileg a sidadaan a magun-odtayo iti daytoy a biag. Amin a banag kabaelan dagiti adda pammatina.
Patpatgek a kakabsatko, agyamanak iti gundaway nga agsarita kadakayo iti daytoy a Domingo iti Paskua ti Panagungar.1 Binalbaliwan nga agnanayon ti pangsubbot a sakripisio ken Panagungar ni Jesucristo dagiti biagtayo. Ay-ayatentayo Isuna ken napnuan iti panagyaman nga agrukbabtayo Kenkuana ken iti Nailangitan nga Ama.
Kabayatan ti napalabas nga innem a bulan, nagtultuloy a nakisarangettayo iti sangalubongan a pandemia. Masmasdaawak iti naandur ken naespirituan a pigsayo iti pannakisaranget kadagiti sakit, pannakadadael, ken panagmaymaysa. Ikararagko a kanayon a, babaen iti amin daytoy, mariknayonto ti saan a mapagduaduaan nga ayat ti Apo para kadakayo. No limmabankayo kadagiti pannubokyo nga addaan iti napigpigsa a kinadisipulo, saan koma a nagbalin nga awan kaes-eskanna ti napalabas a tawen.
Iti daytoy a bigat, nangngegantayo manipud kadagiti dadaulo ti Simbaan a simmangbay manipud iti tunggal kontinente iti daga. Pudno, dagiti bendision ti ebanghelio ket para iti tunggal puli, pagsasao, ken tattao. Maysa a sangalubongan a simbaan ti Simbaan ni Jesucristo. Ni Jesucristo ti dadaulotayo.
Agyamantayo, uray pay daytoy a pandemia ket saanna a pinakapsut ti agtultuloy a panagdur-as ti kinapudnona. Ti ebanghelio ni Jesucristo ti naan-anay a masapul iti daytoy a matiktikaw, mannakisuppiat, ken nabannog a lubong.
Maikari iti tunggal anak ti Dios iti gundaway a dumngeg ken umawat iti makaagas, manangsubbot a mensahe ni Jesucristo. Awanen ti sabali a mensahe a napatpateg para iti pagragsakantayo—ita ken iti agnanayon.2 Awanen ti sabali a mensahe ti ad-adda a napnuan iti namnama. Awanen ti sabali a mensahe a makaikkat iti sinnupanget iti kagimongantayo.
Ti pammati ken ni Jesucristo ti pundasion iti amin a pammati ken ti dana iti nadiosan a bileg. Kinuna ni Apostol Pablo, “No awan ti pammati saan a mabalin a maparagsak ti [Dios]: ta no umasidegka iti Dios masapul a patiem nga adda Dios, a manggunggona kadagiti agsapul kenkuana.”3
Ti amin a banag a nasayaat iti biag—ti tunggal potensial a bendision nga addaan iti agnanayon a kinapateg—ket mangrugi iti pammati. Ti panangpalugod iti Dios nga agballigi iti biagtayo ket mangrugi iti pammati a sitatallugod Isuna a mangiwanwan kadatayo. Ti pudno a panagbabawi ket mangrugi iti pammati nga addaan ni Jesucristo iti bileg a mangdalus, mangagas, ken mangpapigsa kadatayo.4
“Saanyo a tallikudan ti pannakabalin ti Dios,” impakdaar ti propeta a Moroni, “ta agaramid babaen ti pannakabalin, a maibatay iti pammati dagiti annak ti tao.”5 Ti pammatitayo ti manglukat iti bileg ti Dios iti biagtayo .
Ngem, ti panangaramat iti pammati ket mabalin a makarimbaw. No dadduma masdaawtayo no kabelantayo a papigsaen ti umdas a pammati tapno umawat kadagiti bendision a kasapulantayo iti kasta unay. Nupay kasta, gibusan ti Apo dagidiay a panagbuteng babaen kadagiti balikas ti propeta nga Alma iti Libro ni Mormon.
Indawat ni Alma a padasentayo ti balikas ken “tibnokanyo iti bassit a pammati, wen, uray no [ditayo] tarigagayan ti ad-adu a pammati.”6 Ti ragup ti balikas a “bassit a pammati” ket mangipalagip kaniak iti kari ti Apo iti biblia a no “adda pammatiyo a kas iti kadakkel ti bukel ti mustasa,” mabalintayo a “kunaen iti daytoy a bantay, Umaliska ket inka sadiay; ket umalis; ket awanto ti imposible [kadatayo].”7
Maawatan ti Apo dagiti mortal a pagkapsutantayo. Adda dagiti panawen a panagkapsuttayo amin. Ngem ammona met ti naindaklan a potensialtayo. Mangrugi a bassit ti bukel ti mustasa ngem dumakkel nga agbalin a kayo nga umdas a para kadagita tumatayab nga agumok kadagiti sangana. Ibagian ti bukel ti mustasa ti bassit ngem dumakdakkel a pammati.8
Saan a dawdawaten ti Apo ti naan-anay a pammati tapno magun-odtayo ti naan-anay a bilegna. Ngem kiddawenna kadatayo a mamatitayo.
Patpatgek a kakabsatko, idawatko kadakayo ita a bigat ti Paskua ti Panagungar ti panangirugi itan a mangpadakkel iti pammatiyo. Babaen iti pammatiyo, padakkelento ni Jesucristo ti kabaelanyo a mangpatignay kadagiti bantay iti biagyo,9 nupay mabalin a dumakkel dagiti bukodyo a karit a kas kadakkel ti Mount Everest,
Mabalin a liday, panagduadua, sakit, wenno sabali pay a bukod a pannubok dagiti bantayyo. Agdudumanto dagiti bantayyo, ngem ti sungbat iti tunggal karityo ket iti panangpapigsanto iti pammatiyo. Agkasapulan dayta iti aramid. Dagiti sadut nga agad-adal ken naliway a disipulo ti kanayonto a marigatan a mangpapigsa iti uray ania man a bassit a pammati.
Ti mangaramid iti ania man a nasayaat ket agkasapulan iti panagkagumaan. Ti panagbalin a pudno a disipulo ni Jesucristo ket awan panangilanglangina. Kasapulan ti panangikagumaan iti panangpapigsa iti pammati ken panagtalekyo Kenkuana. Mangipaayak man iti lima a singasing a makatulong kadakayo a mangpadur-as kadayta a pammati ken panagtalek.
Umuna, ti panagadal. Agbalin a maysa a makiraman nga adalan. Igamer ti bagiyo kadagiti nasantuan a kasuratan a mangawat a nasaysayaat ti mision ken panagministro ni Cristo. Ammuen ti doktrina ni Cristo tapno maawatanyo ti bilegna para iti biagyo. Ipalasagyo ti kinapudno a maiyaplikar ti Pannubbot ni Jesucristo kadakayo. Inakona iti Bagina ti ladingityo dagiti, biddutyo dagiti, pagkapsutanyo , ken dagiti basolyo . Binayadanna ti umno a gatad ken nangipaay iti bileg para kadakayo tapno mapagtignayyo ti tunggal bantay a maipasango kadakayo. Magun-odyo dayta a bileg babaen iti pammati, panagtalek, ken ti kinatallugodyo a sumurot Kenkuana.
Mabalin a kasapulan iti milagro ti panangtignayyo kadagiti bantayyo. Sursuruem ti maipapan kadagiti milagro. Umay dagiti milagro babaen ti pammatiyo iti Apo. Kangrunaan iti dayta a pammati ket ti panagtalek iti pagayatan ken panawenna—no kasano ken no kaano a bendisionanna kayonto iti namilagruan a tulong a tartarigagayanyo. Ti laeng kaawan iti pammatiyoti mangiparit iti Dios a mangparabur kadakayo kadagiti milagro a mangtignay kadagiti bantay iti biagyo .10
No ad-adu ti masursuroyo maipapan iti Mangisalakan, nalaklaka iti panagtalekto iti kaasina, ti awan patinggana nga ayatna, ken ti manangpapigsa, mangagas, ken manangsubbot a bilegna. Saan nga as-asideg ti Mangisalakan kadakayo ngem no tay sumangsangokayo wenno umul-ulikayo iti bantay nga addaan iti pammati.
Maikadua, pilien ti mamati ken ni Jesucristo. No addaankayo iti panagduadua maipapan iti Dios Ama ken ti Patpatgenna nga Anak wenno ti pannakaitutop ti Pannakaisubli wenno ti kinapudno ti nadiosan nga awag ni Joseph Smith kas maysa a propeta, pilien ti mamati11 ken agtalinaed a napudno. Idatag dagiti saludsodyo iti Apo ken kadagiti dadduma pay a napudno pagadawan. Adalenyo nga addaan iti tarigagay a mamati imbes a maaddaan iti namnama a makakitakayo iti pagkurangan iti biag ti propeta wenno maysa a pagdumaan iti nasantuan a kasuratan. Isardeng ti panangpadakkel kadagiti panagduaduayo babaen iti panangisaritayo kadagitoy kadagiti dadduma pay a managduadua. Palubosanyo ti Apo a mangiturong kadakayo nga agdaliasat iti naespirituan a panagtakuat.
Maikatlo, agtignay iti pammati. Ania ti aramidenyo no ad-adu pay ti pammatiyo? Panunotenyo maipapan iti daytoy. Mangisuratkayo maipapan iti daytoy. Kalpasanna umawat iti ad-adu pay a pammati babaen ti panangaramid iti maysa a banag nga agkasapulan iti ad-adu pay a pammati.
Maikapat, makiranud a maikari kadagiti sagrado nga ordinansa . Dagiti ordinansa ti manglukat iti bileg ti Dios para iti biagyo.12
Ken maikalima, mangkiddaw iti tulong, manipud iti Nailangitan nga Ama, iti nagan ni Jesucristo.
Kasapulan ti pammati iti aramid. Kasapulan ti panangawat iti paltiing iti aramid. Ngem “ta siasino man nga agdawat, umawat; ket ti agsapul, makasarak; ket isu nga agtuktok, malukatanto.”13 Ammo ti Dios no ania ti makatulong a mangpadur-as iti pammatiyo. Dumawatkayo, ket kalpasanna dumawatkayo manen.
Mabalin a kunaen ti saan a mamati a ti pammati ket para kadagiti nakapuy. Ngem linaksid daytoy a panangipapilit ti bileg ti pammati. Nagtultuloy ngata dagiti Apostol ti Mangisalakan ti nangisuro iti doktrinana kalpasan ti ipapatayna, nga uray iti pagpeggadan ti biagda, no adda idi ti panagduaduada Kenkuana?14 Nagsagaba ngata da Joseph ken Hyrum Smith iti martir nga ipapatay iti panangsalaknibda ti Pannakaisubli ti Simbaan ti Apo no awan ti pudno a pammaneknekda a daytoy ket pudno? Pimmusay kadi koma iti dumani 2000 kadagiti Santo iti desdes a nagnaan dagiti payunir15 no awan ti pammatida a naisubli ti ebanghelio ni Jesucristo? Pudno, ti pammati ket isu ti bileg a mangpabalin ti nalabit a di maipatungpal nga imposible.
Saanyo a pakapsuten ti pammati nga addan kadakayo. Kasapulan ti pammati tapno agkameng iti Simbaan ken agtalinaed a napudno. Kasapulan ti pammati a mangsurot iti propeta imbes a dagiti nalatak a tao wenno popular nga opinion. Kasapulan ti pammati nga agserbi iti mision kabayatan ti pandemia. Kasapulan ti pammati tapno agbiag a nadalus no ipukkawen ti lubong a ti linteg ti Dios ti kinadalus ket saanen a maitutop iti agdama a panawen. Kasapulan ti pammati tapno maisuro ti ebanghelio kadagiti annak iti daytoy sekular a lubong. Kasapulan ti pammati tapno umararaw para iti biag ti maysa nga ipatpateg ken ad-adu pay a pammati nga umawat iti makaupay a sungbat.
Dua a tawenen ti napalabas, idi binisitami ken ni Sister Nelson ti Samoa, Tonga, Fiji ken Tahiti. Tunggal maysa kadagidiay nga isla a pagilian ket nakapadas iti napigsa a tudtudo iti sumagmamano nga aldaw. Nagayuno ken nagkararag dagiti miembro tapno masalakniban koma dagiti panagtataripnongda iti ruar manipud iti tudo.
Iti Samoa, Fiji, ken Tahiti, idi umadani a mangrugin dagiti miting, nagsardeng ti tudo. Ngem iti Tonga, saan a nagsardeng ti tudo. Ngem nasapa nga immay ti 13,000 a napudno a Santo a mangala iti tugaw, siaanusda a naguray kabayatan ti napaut a tudo, sa nagtugawda iti ingget basa a dua nga oras a taripnong.
Nakitami ti nasaranta a naipakat a pammati iti tunggal maysa kadagiti islanders—pammati nga umdas a nangpasardeng iti tudo ken pammati tapno aganus idi saan a nagsardeng ti tudo.
Saan a kanayon nga agtignay dagiti bantay iti biagtayo no kasano wenno kaano a kayattayo. Ngem iti pammatitayo ti kanayon a mangiturong kadatayo nga agtultuloy. Ti pammati ket kanayon a mangnayon iti pananggun-odtayo iti nadiosan a bileg.
Ammuenyo kuma daytoy: no ti amin a banag ken iti tunggal maysa iti lubong a mapagtalkanyo ket agkamtud, ni Jesucristo ken iti Simbaanna ket saanto a pulos a mangpaay kadakayo. Saan a mairidep ti Apo, wenno saan isuna a maturog.16 Ti Dios “isu met laeng idi kalman, ita, ken iti [agnanayon].”17 saannanto a panawan dagiti katulaganna,18 dagiti karina, wenno ti ayatna para kadagiti taona. Agar-aramid isuna kadagiti milagro ita nga agdama, ken agaramidto kadagiti milagro iti agnanayon.19
Ti pammati ken ni Jesucristo ti kinaindaklan a bileg a sidadaan a magun-odtayo iti daytoy a biag. Amin a banag kabaelan dagiti adda pammatina.20
Ti dumurdur-as a pammatiyo kenkuana ti mamagtignayto kadagiti bantay—saan a dagiti bantay a bato a mangpappapintas iti daga no di ti kabambantayan ti panagrigat iti biagyo. Ti pammatiyo a dumakdakkel ti mangtulongto kadakayo a mangbalbaliw kadagiti karit iti awan kapadana a panagdur-as ken gundaway.
Iti daytoy a Domingo iti Paskua ti Panagungar, ti napalaus a riknak a panagayat ken panagyaman, ipakdaarko ti pammaneknekko a ni Jesucristo ket pudno a nagungaren. Nagungaren a mangidaulo iti Simbaanna. Nagungaren a mangbendision iti biag ti amin nga annak ti Dios, sadino man ti pagnaedanda. No addaan iti pammati Kenkuana, mabalintayo a pagtignayen dagiti bantay iti biagtayo. Ipaneknekko iti sagrado a nagan ni Jesucristo, amen.
© 2021 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus iti Mensahe ti Binulan a Liahona, Mayo 2021. Ilokano. 17468 864
Placeholder Image Credit