ຂ່າວສານປະຈຳເດືອນ Liahona, ເດືອນພຶດສະພາ 2021
ພຣະຄຣິດຊົງຟື້ນ; ສັດທາໃນພຣະອົງຈະຍ້າຍພູເຂົາ
ສັດທາໃນພຣະເຢຊູຄຣິດເປັນອຳນາດທີ່ຍິ່ງໃຫຍ່ທີ່ສຸດ ທີ່ມີໃຫ້ເຮົາໃນຊີວິດນີ້. ທຸກສິ່ງເປັນໄປໄດ້ສຳລັບຜູ້ທີ່ເຊື່ອ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າກະຕັນຍູສຳລັບສິດທິພິເສດ ທີ່ໄດ້ມາກ່າວກັບທ່ານໃນວັນອາທິດອີດສະເຕີນີ້.1 ການເສຍສະລະຊົດໃຊ້ ແລະ ການຟື້ນຄືນພຣະຊົນຂອງພຣະເຢຊູຄຣິດໄດ້ປ່ຽນຊີວິດຂອງເຮົາແຕ່ລະຄົນຕະຫລອດໄປ. ເຮົາຮັກພຣະອົງ ແລະ ນະມັດສະການພຣະອົງ ແລະ ພຣະບິດາເທິງສະຫວັນຂອງເຮົາດ້ວຍຄວາມກະຕັນຍູ.
ລະຫວ່າງຫົກເດືອນຜ່ານມານີ້, ເຮົາໄດ້ດີ້ນລົນກັບການແຜ່ລະບາດຕະຫລອດທົ່ວໂລກ. ຂ້າພະເຈົ້າພິສະຫວົງກັບຄວາມສາມາດ ແລະ ຄວາມເຂັ້ມແຂງທາງວິນຍານຂອງທ່ານ ໃນການປະເຊີນກັບການເຈັບປ່ວຍ, ການສູນເສຍ, ແລະ ການຢູ່ປ່ຽວ. ຂ້າພະເຈົ້າອະທິຖານຕະຫລອດເວລາວ່າ, ໃນທັງໝົດນີ້, ທ່ານຈະຮູ້ສຶກເຖິງຄວາມຮັກທີ່ບໍ່ມີວັນສິ້ນສຸດຂອງພຣະຜູ້ເປັນເຈົ້າທີ່ມີຕໍ່ທ່ານ. ຖ້າຫາກທ່ານໄດ້ຕອບຮັບກັບການທົດລອງດ້ວຍການເປັນສານຸສິດທີ່ເຂັ້ມແຂງຂອງທ່ານ, ປີທີ່ຜ່ານມານີ້ກໍບໍ່ໄດ້ໄຮ້ປະໂຫຍດ.
ເຊົ້າມື້ນີ້, ເຮົາໄດ້ຍິນຈາກຜູ້ນຳຂອງສາດສະໜາຈັກ ຊຶ່ງມາຈາກທຸກທະວີບຂອງແຜ່ນດິນໂລກ. ແນ່ນອນ, ພອນຂອງພຣະກິດຕິຄຸນແມ່ນສຳລັບ ທຸກ ເຊື້ອຊາດ, ທຸກພາສາ, ແລະ ທຸກຜູ້ຄົນ. ສາດສະໜາຈັກຂອງພຣະເຢຊູຄຣິດເປັນສາດສະໜາຈັກ ທົ່ວໂລກ. ພຣະເຢຊູຄຣິດເປັນຜູ້ນຳຂອງເຮົາ.
ຂອບຄຸນພຣະເຈົ້າ, ແມ່ນແຕ່ການລະບາດກໍບໍ່ສາມາດຢຸດຢັ້ງການດຳເນີນໄປໜ້າຂອງຄວາມຈິງຂອງພຣະອົງ. ພຣະກິດຕິຄຸນຂອງພຣະເຢຊູຄຣິດຄືສິ່ງທີ່ຕ້ອງການຫລາຍທີ່ສຸດໃນໂລກທີ່ສັບສົນ, ມີການຂັດແຍ້ງ, ແລະ ເຊື່ອມໂຊມນີ້.
ລູກໆຂອງພຣະເຈົ້າແຕ່ລະຄົນສົມຄວນທີ່ຈະໄດ້ຮັບໂອກາດໃນການໄດ້ຍິນ ແລະ ຮັບເອົາການປິ່ນປົວ, ຂ່າວສານແຫ່ງການໄຖ່ຂອງພຣະເຢຊູຄຣິດ. ບໍ່ມີຂ່າວສານອື່ນໃດທີ່ສຳຄັນຫລາຍກວ່າຕໍ່ຄວາມສຸກຂອງເຮົາ—ໃນເວລານີ້ ແລະ ຕະຫລອດໄປ.2 ບໍ່ມີຂ່າວສານອື່ນໃດທີ່ເຕັມໄປດ້ວຍຄວາມຫວັງຫລາຍກວ່ານີ້. ບໍ່ມີຂ່າວສານອື່ນໃດທີ່ສາມາດກຳຈັດການຂັດແຍ້ງຢູ່ໃນສັງຄົມຂອງເຮົາ.
ສັດທາໃນພຣະເຢຊູຄຣິດເປັນຮາກຖານຂອງຄວາມເຊື່ອທັງໝົດ ແລະ ເປັນວິທີເຂົ້າຫາອຳນາດແຫ່ງສະຫວັນ. ອີງຕາມອັກຄະສາວົກໂປໂລ, “ຖ້າບໍ່ມີສັດທາແລ້ວ ຈະເປັນທີ່ພໍພຣະໄທພຣະເຈົ້າບໍ່ໄດ້ ດ້ວຍວ່າຜູ້ທີ່ເຂົ້າມາເຝົ້າພຣະເຈົ້າໄດ້ນັ້ນ ຕ້ອງເຊື່ອວ່າພຣະອົງຊົງພຣະຊົນຢູ່ ແລະ ພຣະອົງເປັນຜູ້ປະທານລາງວັນ ໃຫ້ແກ່ຜູ້ທີ່ສະແຫວງຫາພຣະອົງ.”3
ທຸກສິ່ງທີ່ດີໃນຊີວິດ—ພອນກ່ຽວກັບຄວາມສຳຄັນນິລັນດອນທີ່ຈະມາເຖິງທຸກຢ່າງ—ເລີ່ມຕົ້ນດ້ວຍສັດທາ. ການໃຫ້ພຣະເຈົ້າໄຊຊະນະໃນຊີວິດຂອງເຮົາ ເລີ່ມຕົ້ນດ້ວຍສັດທາວ່າ ພຣະອົງຈະນຳພາເຮົາ. ການກັບໃຈທີ່ແທ້ຈິງເລີ່ມຕົ້ນດ້ວຍສັດທາວ່າ ພຣະເຢຊູຄຣິດມີອຳນາດທີ່ຈະຊຳລະລ້າງ, ປິ່ນປົວ, ແລະ ເພີ່ມຄວາມເຂັ້ມແຂງໃຫ້ເຮົາ.4
“ບໍ່ໃຫ້ປະຕິເສດອຳນາດຂອງພຣະເຈົ້າ,” ສາດສະດາໂມໂຣໄນປະກາດ, “ເພາະພຣະອົງທຳງານດ້ວຍອຳນາດ, ຕາມສັດທາ ຂອງລູກຫລານມະນຸດ.”5 ມັນແມ່ນສັດທາ ຂອງເຮົາ ທີ່ເປີດອຳນາດຂອງພຣະເຈົ້າ ໃນຊີວິດ ຂອງເຮົາ.
ແຕ່, ການໃຊ້ສັດທາສາມາດເບິ່ງຄືວ່າຍາກເກີນໄປ. ບາງເທື່ອເຮົາອາດສົງໄສວ່າເຮົາມີສັດທາພຽງພໍທີ່ຈະຮັບເອົາພອນທີ່ເຮົາຕ້ອງການຫລາຍທີ່ສຸດຫລືບໍ່. ເຖິງຢ່າງໃດກໍຕາມ, ພຣະຜູ້ເປັນເຈົ້າໄດ້ກຳຈັດຄວາມຢ້ານກົວເຫລົ່ານັ້ນແລ້ວ ຜ່ານທາງຖ້ອຍຄຳຂອງສາດສະດາແອວມາໃນພຣະຄຳພີມໍມອນ.
ແອວມາພຽງຂໍໃຫ້ເຮົາ ທົດລອງ ຖ້ອຍຄຳ ແລະ “ໃຊ້ສັດທາ ຈັກໜ້ອຍໜຶ່ງ, ແທ້ຈິງແລ້ວ, ຖ້າຫາກ [ເຮົາ] ເຮັດບໍ່ໄດ້ຫລາຍໄປກວ່າຄວາມປາດຖະໜາທີ່ຈະເຊື່ອ.”6 ວະລີທີ່ວ່າ “ສັດທາໜ້ອຍໜຶ່ງ” ເຕືອນເຮົາເຖິງຄຳສັນຍາຂອງພຣະຜູ້ເປັນເຈົ້າວ່າ ຖ້າຫາກເຮົາ “ມີສັດທາທໍ່ ເມັດຜັກກາດ,” ເຮົາຈະສາມາດ “ສັ່ງພູໜ່ວຍນີ້ວ່າ, ຈົ່ງເຄື່ອນຈາກບ່ອນນີ້ໄປຢູ່ບ່ອນນັ້ນ; ແລະ ມັນກໍຈະເຄື່ອນໄປ; ແລະ ບໍ່ມີສິ່ງໃດທີ່ [ເຮົາ] ເຮັດບໍ່ໄດ້.”7
ພຣະຜູ້ເປັນເຈົ້າເຂົ້າໃຈຄວາມອ່ອນແອຂອງການເປັນມະນຸດຂອງເຮົາ. ເຮົາຈະລັງເລໃຈເປັນບາງຄັ້ງ. ແຕ່ພຣະອົງກໍຮູ້ເຖິງສັກກະຍະພາບທີ່ຍິ່ງໃຫຍ່ຂອງເຮົາ. ເມັດຜັກກາດເປັນເມັດນ້ອຍໆ ແຕ່ມັນເຕີບໂຕເປັນຕົ້ນໃຫຍ່ພໍໃຫ້ນົກເຮັດຮັງໃສ່ໄດ້. ເມັດຜັກກາດເປັນຕົວແທນໃຫ້ສັດທາທີ່ນ້ອຍໆ ແຕ່ ເຕີບໂຕ ຂຶ້ນໄດ້.8
ພຣະຜູ້ເປັນເຈົ້າບໍ່ໄດ້ຮຽກຮ້ອງສັດທາ ທີ່ສົມບູນ ກ່ອນເຮົາຈະເຂົ້າເຖິງອຳນາດ ທີ່ສົມບູນ ຂອງພຣະອົງໄດ້. ແຕ່ພຣະອົງໄດ້ຂໍໃຫ້ເຮົາມີຄວາມເຊື່ອ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຄຳຮຽກຮ້ອງຂອງຂ້າພະເຈົ້າຕໍ່ທ່ານໃນເຊົ້າຂອງວັນອີດສະເຕີນີ້ ແມ່ນໃຫ້ ເລີ່ມຕົ້ນມື້ນີ້ ເພື່ອເພີ່ມພູນສັດທາຂອງທ່ານ. ຜ່ານທາງສັດທາຂອງທ່ານ, ພຣະເຢຊູຄຣິດຈະເພີ່ມຄວາມສາມາດຂອງທ່ານໃຫ້ຍ້າຍພູເຂົາໃນຊີວິດຂອງທ່ານໄດ້,9 ເຖິງແມ່ນການທ້າທາຍສ່ວນຕົວຂອງທ່ານອາດໃຫຍ່ເທົ່າກັບພູເຂົາ ເອວີເຣັດ ກໍຕາມ.
ພູເຂົາຂອງທ່ານອາດເປັນຄວາມເປົ່າປ່ຽວດຽວດາຍ, ຄວາມສົງໄສ, ຄວາມປ່ວຍໄຂ້, ຫລື ບັນຫາສ່ວນຕົວອື່ນໆ. ພູເຂົາຂອງທ່ານຈະແຕກຕ່າງ, ແຕ່ຄຳຕອບຕໍ່ການທ້າທາຍຂອງທ່ານແຕ່ລະຢ່າງແມ່ນ ໃຫ້ເພີ່ມພູນສັດທາຂອງທ່ານ. ສິ່ງນັ້ນຕ້ອງໃຊ້ຄວາມພະຍາຍາມ. ຜູ້ຮຽນທີ່ກຽດຄ້ານ ແລະ ສານຸສິດທີ່ເຫລວໄຫລ ຈະດີ້ນລົນສະເໝີ ແມ່ນແຕ່ໃນການມີສັດທາພຽງໜ້ອຍດຽວ.
ກ່ອນຈະເຮັດຫຍັງໄດ້ດີ ຕ້ອງໃຊ້ຄວາມພະຍາຍາມ. ການກາຍເປັນສານຸສິດທີ່ແທ້ຈິງຂອງພຣະເຢຊູຄຣິດບໍ່ໄດ້ຖືກຍົກເວັ້ນ. ການເພີ່ມພູນສັດທາຂອງທ່ານ ແລະ ການໄວ້ວາງໃຈໃນພຣະອົງຕ້ອງໃຊ້ຄວາມພະຍາຍາມ. ຂ້າພະເຈົ້າຂໍແນະນຳຫ້າຢ່າງເພື່ອຊ່ວຍທ່ານພັດທະນາສັດທາ ແລະ ການໄວ້ວາງໃຈນັ້ນ.
ໜຶ່ງ, ສຶກສາ. ກາຍເປັນຜູ້ຮຽນທີ່ເອົາໃຈໃສ່. ໃຫ້ເອົາຕົວເຂົ້າຫາພຣະຄຳພີ ເພື່ອໃຫ້ເຂົ້າໃຈພາລະກິດ ແລະ ການປະຕິບັດສາດສະໜາກິດຂອງພຣະຄຣິດຫລາຍກວ່າເກົ່າ. ຮູ້ຄຳສອນຂອງພຣະຄຣິດ ເພື່ອວ່າທ່ານຈະເຂົ້າໃຈອຳນາດຂອງມັນສຳລັບຊີວິດຂອງທ່ານ. ຮັບເອົາຄວາມຈິງທີ່ວ່າການຊົດໃຊ້ຂອງພຣະເຢຊູຄຣິດກ່ຽວຂ້ອງກັບ ທ່ານ. ພຣະອົງໄດ້ຮັບເອົາຄວາມທຸກທໍລະມານ ຂອງທ່ານ, ຄວາມຜິດພາດ ຂອງທ່ານ, ຄວາມອ່ອນແອ ຂອງທ່ານ, ແລະ ບາບ ຂອງທ່ານ. ພຣະອົງໄດ້ຈ່າຍແທນ ແລະ ມອບອຳນາດໃຫ້ທ່ານເພື່ອຍ້າຍພູເຂົາ ທຸກ ໜ່ວຍ ທີ່ທ່ານຈະປະເຊີນ. ທ່ານຮັບເອົາອຳນາດນັ້ນດ້ວຍສັດທາ, ດ້ວຍຄວາມໄວ້ວາງໃຈ, ແລະ ດ້ວຍຄວາມເຕັມໃຈຂອງທ່ານທີ່ຈະຕິດຕາມພຣະອົງ.
ການຍ້າຍພູເຂົາຂອງທ່ານອາດຮຽກຮ້ອງການມະຫັດສະຈັນ. ໃຫ້ຮຽນຮູ້ກ່ຽວກັບການມະຫັດສະຈັນ. ການມະຫັດສະຈັນມີມາອີງຕາມສັດທາຂອງທ່ານໃນພຣະຜູ້ເປັນເຈົ້າ. ຈຸດສູນກາງຂອງສັດທານັ້ນແມ່ນການໄວ້ວາງໃຈໃນພຣະປະສົງ ແລະ ເວລາຂອງພຣະອົງ—ພຣະອົງຈະອວຍພອນທ່ານດ້ວຍວິທີໃດ ແລະ ເມື່ອໃດ ດ້ວຍຄວາມຊ່ວຍເຫລືອຢ່າງປະຕິຫານທີ່ທ່ານປາດຖະໜາ. ພຽງແຕ່ຄວາມບໍ່ເຊື່ອ ຂອງທ່ານ ເທົ່ານັ້ນທີ່ຈະກີດກັນທ່ານຈາກການບໍ່ໃຫ້ພຣະເຈົ້າອວຍພອນທ່ານດ້ວຍການມະຫັດສະຈັນ ເພື່ອຍ້າຍພູເຂົາໃນຊີວິດ ຂອງທ່ານ.10
ເມື່ອທ່ານຮຽນຮູ້ກ່ຽວກັບພຣະຜູ້ຊ່ວຍໃຫ້ລອດຫລາຍເທົ່າໃດ, ມັນຈະງ່າຍຂຶ້ນທີ່ຈະໄວ້ວາງໃຈໃນຄວາມເມດຕາຂອງພຣະອົງ, ໃນຄວາມຮັກອັນບໍ່ມີຂອບເຂດຂອງພຣະອົງ, ແລະ ໃນພະລັງ, ການປິ່ນປົວ, ແລະ ອຳນາດແຫ່ງການໄຖ່ຂອງພຣະອົງຫລາຍເທົ່ານັ້ນ. ພຣະຜູ້ຊ່ວຍໃຫ້ລອດຈະບໍ່ຢູ່ໃກ້ທ່ານຫລາຍເທົ່າກັບຕອນທີ່ທ່ານກຳລັງປະເຊີນ ຫລື ກຳລັງປີນຂຶ້ນພູເຂົາ ດ້ວຍສັດທາ.
ສອງ, ເລືອກທີ່ຈະ ເຊື່ອ ໃນພຣະເຢຊູຄຣິດ. ຖ້າຫາກທ່ານສົງໄສກ່ຽວກັບພຣະເຈົ້າອົງເປັນພຣະບິດາ ແລະ ພຣະບຸດທີ່ຮັກຂອງພຣະອົງ ຫລື ຄວາມຖືກຕ້ອງຂອງການຟື້ນຟູ ຫລື ຄວາມຈິງຂອງການເອີ້ນຈາກສະຫວັນໃຫ້ໂຈເຊັບ ສະມິດ ເປັນສາດສະດາ, ຈົ່ງ ເລືອກ ທີ່ຈະເຊື່ອ11 ແລະ ຊື່ສັດຕໍ່ໄປ. ໃຫ້ນຳຄຳຖາມຂອງທ່ານມາຫາພຣະຜູ້ເປັນເຈົ້າ ແລະ ມາຫາແຫລ່ງອື່ນໆທີ່ຊື່ສັດ. ສຶກສາດ້ວຍຄວາມປາດຖະໜາທີ່ຈະ ເຊື່ອ ແທນທີ່ຈະເປັນຄວາມຫວັງວ່າທ່ານຈະພົບເຫັນຄວາມບົກພ່ອງໃນປະສົບການຊີວິດຂອງສາດສະດາ ຫລື ຄວາມແຕກຕ່າງຢູ່ໃນພຣະຄຳພີ. ເຊົາສົງໄສຫລາຍຂຶ້ນ ຊຶ່ງເກີດຈາກການສົນທະນາກ່ຽວກັບເລື່ອງດັ່ງກ່າວນຳຄົນທີ່ສົງໄສຢູ່ແລ້ວ. ໃຫ້ພຣະຜູ້ເປັນເຈົ້ານຳພາທ່ານ ໃນເສັ້ນທາງແຫ່ງການຄົ້ນພົບທາງວິນຍານຂອງທ່ານ.
ສາມ, ກະທຳ ດ້ວຍສັດທາ. ທ່ານຈະເຮັດສິ່ງໃດຖ້າຫາກທ່ານມີສັດທາ ຫລາຍຂຶ້ນ? ໃຫ້ຄິດກ່ຽວກັບມັນ. ໃຫ້ຂຽນກ່ຽວກັບມັນ. ແລ້ວ ຮັບເອົາສັດທາຕື່ມ ໂດຍການເຮັດບາງສິ່ງທີ່ ຮຽກຮ້ອງສັດທາຕື່ມອີກ.
ສີ່, ຮັບເອົາພິທີການສັກສິດ ຢ່າງມີຄ່າຄວນ. ພິທີການຈະເປີດອຳນາດຂອງພຣະເຈົ້າໃຫ້ແກ່ຊີວິດຂອງທ່ານ.12
ແລະ ຫ້າ, ທູນຂໍ ຄວາມຊ່ວຍເຫລືອຈາກພຣະບິດາເທິງສະຫວັນຂອງທ່ານ, ໃນພຣະນາມຂອງພຣະເຢຊູຄຣິດ.
ສັດທາຮຽກຮ້ອງຄວາມພະຍາຍາມ. ການໄດ້ຮັບການເປີດເຜີຍຮຽກຮ້ອງຄວາມພະຍາຍາມ. ແຕ່ “ທຸກຄົນທີ່ໝັ່ນຂໍ ຈະໄດ້ຮັບ; ແລະ ທຸກຄົນທີ່ໝັ່ນຊອກ ຈະພົບ; ແລະ ທຸກຄົນທີ່ໝັ່ນເຄາະ ຈະມີຜູ້ໄຂປະຕູໃຫ້.”13 ພຣະເຈົ້າຮູ້ວ່າແມ່ນຫຍັງຈະຊ່ວຍໃຫ້ສັດທາຂອງທ່ານເຕີບໂຕຂຶ້ນ. ທູນຂໍ, ແລະ ແລ້ວໃຫ້ທູນຂໍອີກ.
ຜູ້ທີ່ບໍ່ເຊື່ອອາດເວົ້າວ່າ ສັດທາແມ່ນສຳລັບຄົນອ່ອນແອ. ແຕ່ການຢືນຢັນນີ້ໄດ້ມອງຂ້າມ ອຳນາດ ແຫ່ງສັດທາ. ອັກຄະສາວົກຂອງພຣະຜູ້ຊ່ວຍໃຫ້ລອດຈະສືບຕໍ່ສິດສອນຄຳສອນຂອງພຣະອົງຫລັງຈາກການສິ້ນພຣະຊົນຂອງພຣະອົງບໍ, ໃນເວລາທີ່ຊີວິດຂອງພວກເພິ່ນມີອັນຕະລາຍ, ຖ້າຫາກພວກເພິ່ນໄດ້ສົງໄສພຣະອົງ?14 ໂຈເຊັບ ແລະ ໄຮຣຳ ສະມິດ ຈະຍອມຕາຍເພາະຄວາມເຊື່ອໃນການປົກປ້ອງການຟື້ນຟູສາດສະໜາຈັກຂອງພຣະຜູ້ເປັນເຈົ້າບໍ ນອກຈາກພວກເພິ່ນຮູ້ຢ່າງແນ່ນອນວ່າ ມັນເປັນຄວາມຈິງ? ໄພ່ພົນເກືອບເຖິງ 2,000 ຄົນຈະຍອມຕາຍຢູ່ໃນເສັ້ນທາງຂອງຜູ້ບຸກເບີກບໍ15 ຖ້າຫາກເຂົາເຈົ້າບໍ່ມີສັດທາວ່າ ພຣະກິດຕິຄຸນຂອງພຣະເຢຊູຄຣິດໄດ້ຖືກຟື້ນຟູແລ້ວ? ແນ່ນອນ, ສັດທາແມ່ນອຳນາດທີ່ ເຮັດໃຫ້ ຜູ້ທີ່ບໍ່ເປັນຕາເຊື່ອ ເຮັດສຳເລັດສິ່ງທີ່ເປັນໄປບໍ່ໄດ້.
ຢ່າໝິ່ນປະໝາດສັດທາທີ່ທ່ານມີຢູ່ແລ້ວ. ຕ້ອງໃຊ້ສັດທາເພື່ອເຂົ້າຮ່ວມສາດສະໜາຈັກ ແລະ ຄົງຢູ່ຢ່າງຊື່ສັດ. ຕ້ອງໃຊ້ສັດທາເພື່ອເຮັດຕາມສາດສະດາ ແທນທີ່ຈະເຮັດຕາມຜູ້ຊ່ຽວຊານ ແລະ ໃຫ້ຄວາມຄິດຄວາມເຫັນທີ່ເປັນທີ່ນິຍົມ. ຕ້ອງໃຊ້ສັດທາເພື່ອຮັບໃຊ້ເຜີຍແຜ່ລະຫວ່າງການແຜ່ລະບາດ. ຕ້ອງໃຊ້ສັດທາເພື່ອດຳລົງຊີວິດຢ່າງບໍລິສຸດ ເມື່ອຊາວໂລກຮ້ອງບອກວ່າ ກົດຂອງພຣະເຈົ້າເລື່ອງພົມມະຈັນ ລ້າສະໄໝແລ້ວໃນເວລານີ້. ຕ້ອງໃຊ້ສັດທາເພື່ອສິດສອນພຣະກິດຕິຄຸນໃຫ້ເດັກນ້ອຍ ໃນໂລກທີ່ບໍ່ສົນໃຈທາງສາດສະໜາ. ຕ້ອງໃຊ້ສັດທາເພື່ອອ້ອນວອນຂໍຊີວິດຂອງຄົນທີ່ເຮົາຮັກ ແລະ ແມ່ນແຕ່ຕ້ອງມີສັດທາຫລາຍກວ່າເກົ່າໃນການຮັບເອົາຄຳຕອບທີ່ຜິດຫວັງ.
ເມື່ອສອງປີກ່ອນ, ຊິດສະເຕີ ແນວສັນ ກັບຂ້າພະເຈົ້າໄດ້ໄປຢ້ຽມຢາມປະເທດຊາມົວ, ຕົງກາ, ຟີຈີ, ແລະ ຕາຮີຕີ. ແຕ່ລະເກາະເຫລົ່ານັ້ນໄດ້ປະເຊີນກັບຝົນຕົກຟ້າລົມແຮງເປັນເວລາຫລາຍມື້. ສະມາຊິກໄດ້ຖືສິນອົດເຂົ້າ ແລະ ອະທິຖານ ຂໍໃຫ້ກອງປະຊຸມກາງແປນຂອງເຂົາເຈົ້າໄດ້ຮັບການປົກປ້ອງຈາກຝົນຕົກຟ້າລົມ.
ປະເທດຊາມົວ, ຟີຈີ, ແລະ ຕາຮີຕີ, ເມື່ອເຖິງເວລາ ເລີ່ມຕົ້ນກອງປະຊຸມ, ຝົນກໍໄດ້ຢຸດ. ແຕ່ໃນປະເທດຕົງກາ, ຝົນ ບໍ່ ຢຸດ. ແຕ່ໄພ່ພົນທີ່ຊື່ສັດ 13,000 ຄົນໄດ້ມາຮອດກ່ອນຫລາຍຊົ່ວໂມງ ເພື່ອຈອງບ່ອນນັ່ງ, ໄດ້ລໍຖ້າດ້ວຍຄວາມອົດທົນໃນທ່າມກາງສາຍຝົນ, ແລະ ແລ້ວໄດ້ນັ່ງຕາກຝົນຢູ່ກອງປະຊຸມເປັນເວລາສອງຊົ່ວໂມງ.
ພວກເຮົາໄດ້ເຫັນສັດທາທີ່ມີຊີວິດຊີວາໃນທ່າມກາງຊາວເກາະເຫລົ່ານັ້ນ—ສັດທາພຽງພໍທີ່ຈະຢຸດຝົນໃຫ້ເຊົາຕົກ ແລະ ສັດທາທີ່ອົດທົນເມື່ອຝົນບໍ່ເຊົາຕົກ.
ພູເຂົາໃນຊີວິດຂອງເຮົາຈະບໍ່ເຄື່ອນຍ້າຍຕາມວິທີ ຫລື ຕາມເວລາທີ່ເຮົາຕ້ອງການສະເໝີ. ແຕ່ສັດທາຂອງເຮົາຈະໝຸນໄປໜ້າ ສະເໝີ. ສັດທາຈະຊ່ວຍໃຫ້ເຮົາເຂົ້າເຖິງອຳນາດຂອງພຣະເຈົ້າ ສະເໝີ.
ຈົ່ງຮູ້ໄວ້ວ່າ: ຖ້າຫາກທຸກສິ່ງ ແລະ ທຸກຄົນຢູ່ໃນໂລກ ຜູ້ທີ່ທ່ານໄວ້ວາງໃຈເຮັດໃຫ້ທ່ານຜິດຫວັງ, ພຣະເຢຊູຄຣິດ ແລະ ສາດສະໜາຈັກຂອງພຣະອົງຈະ ບໍ່ເຄີຍ ເຮັດໃຫ້ທ່ານຜິດຫວັງ. ພຣະຜູ້ເປັນເຈົ້າຈະບໍ່ເຊືອບ, ຫລື ຫລັບໄປຈັກເທື່ອ.16 ພຣະອົງ “ເປັນເໝືອນກັນ ເຊັ່ນມື້ວານນີ້, ມື້ນີ້, ແລະ [ມື້ອື່ນ].”17 ພຣະອົງຈະບໍ່ປະຖິ້ມພັນທະສັນຍາຂອງພຣະອົງ,18 ຄຳສັນຍາຂອງພຣະອົງ, ຫລື ຄວາມຮັກຂອງພຣະອົງທີ່ມີຕໍ່ຜູ້ຄົນຂອງພຣະອົງ. ພຣະອົງທຳການມະຫັດສະຈັນໃນມື້ນີ້, ແລະ ພຣະອົງຈະທຳການມະຫັດສະຈັນໃນມື້ອື່ນ.19
ສັດທາໃນພຣະເຢຊູຄຣິດເປັນ ອຳນາດທີ່ຍິ່ງໃຫຍ່ທີ່ສຸດ ທີ່ມີໃຫ້ເຮົາໃນຊີວິດນີ້. ທຸກສິ່ງເປັນໄປໄດ້ສຳລັບຜູ້ທີ່ເຊື່ອ.20
ສັດທາທີ່ ເຕີບໂຕ ຂອງທ່ານໃນພຣະອົງຈະຍ້າຍພູເຂົາ—ບໍ່ແມ່ນພູເຂົາກ້ອນຫີນທີ່ເຮັດໃຫ້ໂລກນີ້ສວຍງາມ ແຕ່ເປັນພູເຂົາແຫ່ງຄວາມທຸກທໍລະມານໃນຊີວິດຂອງທ່ານ. ສັດທາທີ່ ຮຸ່ງເຮືອງ ຂອງທ່ານ ຈະຊ່ວຍທ່ານປ່ຽນການທ້າທາຍເປັນການເຕີບໂຕ ແລະ ໂອກາດທີ່ຫາອັນປຽບບໍ່ໄດ້.
ໃນວັນອາທິດອີດສະເຕີນີ້, ດ້ວຍຄວາມຮັກ ແລະ ຄວາມກະຕັນຍູຢ່າງເລິກເຊິ່ງຂອງຂ້າພະເຈົ້າ, ຂ້າພະເຈົ້າຂໍປະກາດການເປັນພະຍານຂອງຂ້າພະເຈົ້າວ່າ ພຣະເຢຊູຄຣິດໄດ້ຟື້ນຄືນພຣະຊົນແທ້ໆ. ພຣະອົງຊົງຟື້ນເພື່ອນຳພາສາດສະໜາຈັກຂອງພຣະອົງ. ພຣະອົງຊົງຟື້ນເພື່ອອວຍພອນຊີວິດຂອງລູກໆຂອງພຣະເຈົ້າທຸກຄົນ, ບໍ່ວ່າເຂົາເຈົ້າຈະຢູ່ໃສກໍຕາມ. ດ້ວຍສັດທາໃນພຣະອົງ, ເຮົາສາມາດຍ້າຍພູເຂົາໃນຊີວິດຂອງເຮົາໄດ້. ຂ້າພະເຈົ້າເປັນພະຍານ ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.
© 2021 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, May 2021 Laotian. 17468 331
ບ່ອນວ່າງສຳລັບຮູບພາບ