“Kutta Pochokun ne Omusano,” Ren Pochokunen Sarafo, June 2021, 10–11.
Feito, Tapweto Mwuri
Kutta Pochokun ne Omusano
Ewe Samon a annuku ngeni kich pwe sipwe omusano ekkoch. I epwe anisi kich ne aponueta An kewe annuk, mi pachenong ei ew.
Chungan nios seni James Madsen
Ekkoch annuk ir mi nikinikin weires ach sipwe aponueta mwen ekkoch?
Iei ew mi eniwokusu chommong aramas: Ngang, ewe Samon, upwe omusano ion Upwe omusano, nge ren en mi auchea om kopwe omusano meinisin aramas (Doctrine and Covenants 64:10).
Uti. Sipwe fokkun omusano meinisin ion a mwan ngeni kich? Mi fen tongeni epwe tufich?!
Ina ew mettoch oupwe omusano ekkoch ren ar fosochou ngeni kemi ika a angei ewe omuchunon foun pinewa won ewe chepenin mongo. Nge met ren kewe anonnonun kinas? Ekkana watten assong ra tongeni awosukosuka ika fen ekesiwini fetanin manauach?
Fan ekkoch ewe tufichin omusano ekkoch ra fokkun emeteki kich usun epwe fen seni ach tongeni.
Iei ewe porous och: Fiti ewe aninis an Jises Kraist, ese kouk ngeni kich met sia tongeni fori won pusin ach.
Ewe Aninis Neminewe a Mochen
Emon Souneng mi fokkun achocho seni Netherlands itan Corrie ten Boom a kuna akkom ewe manamanen tingor ngeni Kot an epwe anisi an epwe omusano emon.
Neminewe me pwin ewe Betsy ra kanapus ikewe chommong aramas ra kanapus ie non fansoun ewe Oruen Mounen Fonufan. Corrie me ekkoch ra engino ngeni eriaffou seni ekkewe chon masen ewe nenien kanapus Nazi. Pwin ewe Betsy a mwo nge mano ren ewe eriaffou. Corrie a manau.
Mwirin ewe maun, Corrie a kuna ewe manamanen echikara ren omusano ekkoch. A kan aporousa an kewe porous non nenien chommong aramas. Nge non ew ran an kewe kapas ra weri watten sossot.
Mwirin ewe afanafan non ewe neni, emon me nein ekkewe mi angangangawen chon masen ewe nenien kanapus seni ewe camp a fein ngeni Corrie.
A ureni Corrie pwe a winiti emon Souneng mwirin ewe maun me a aier seni ekkewe mettoch mi ngaw a fori ren an emon chon masen kanapus.
A eitieu poun me apasa, “Kopwe omusaeino?”
Ren mettoch meinisin a kaeo me aporousa ussun omusano ekkoch, Corrie ese tongeni etiwa poun ei mwan me omusano i—esap won pusin winikapan.
Mwirin neminewe a makkei, “Pwan mwo ren ewe song, ekiekin niwini ngeni met ewe e fori a taipureta non ngang, Ua kuna ar tipis. … Samon Jises, Ua iotek, omuseino me anisiei ai upwe omusano atewe.
“Ua sotuni ne emenimen, [me] Ua weires ai upwe eitieta pei. Use tongeni. Use mefi och mettoch, esap mwo nge ekis memefin kinamwe ika tong. Me uwa pwan ngaseri ew iotek non mosonoson. Jises, Use tongeni omusano atewe. Ngeni ei Om omusomus.
“Nupwen ua angei poun atewe ewe mettoch a fis mi fokkun amwarar. Seni afarei afatanatiw won pei me non kumuchu ew eut ussun nge a suseniei ngeni atewe, nge non ngasangasei a pichita ew tong fan iten ei aramas use sisinei arapakan epwene chounieino.
“Iwe nge Ua kuna pwe esap chiwen nap seni ach omusano nge won ach murinno ina an fonufan echikar a nomw, nge won An. Nupwen I a ureni kich pwe sipwe tongei chon oput kich, I a wau, fiti ewe kapas annuk, ewe tong pusin.”1
Kot a nom an epwe anisuk om kopwe aponueta an kewe annuk, mi pachenong ekkewe annuk ne omwusano—pwan mo nupwen mi weires. I a tongeni anisuk ussun chok A anisi Corrie ten Boom.
Ewe Echikara a Auchea Ngonuk
Manau mi orukoruk. A arongorong. Me ennetin a ur ren aramas fiti ewe pungun finata meren Kot.
Non kana fansoun nupwen emon a fori an mochen a efisi ngonuk wachimuken metek—ika a fen fis nge ita esap ururun epwe fis—ka tongeni angei manamanen echikara nupwen ka iotek ren aninis me achocho ngeni ne omusano.
Omusano ekkoch a wato chikaren ngunum. Fiti an Kot aninis, nupwen ka omusano emon ewe a mwan ngonuk, ka oturano ew wachimuken chourek seni afarom ewe ita epwe omochu sefanuk. Pwan mwo nupwen ewe an ngeni ennetin echikara a mefi weires, ren Kot, kosap tongeni kopwe fetan anamon.
© 2021 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Kapasen Apochokun ren Sarafo Iteiten Maram, June 2021. Chuukese. 17470 901.