Porous ren Liahona Iteiten maram, June 2021

Met ewe Unumon Kot?

Samach Won Nang, Jises Kraist, me ewe Ngun mi Fel ir unumon mi imufesen nge ew chok popun.

Tichikin seni Ewe Aewin Nemesepwi, seni Jon McNaughton

Emon chon fori taropwen porous a kapas eis ngeni ewe Soufos Joseph Smith won met chon ew Mwichefenin Jises Kraist ren Aramas mi Pin non Fansoun Soponon ra nuku. Non ponuan, ewe Soufos a makkei 13 porous ussun nuku sia eita ngeni Ekkewe Nongonongen Achifoua. Ewe aewin porous a apasa, “Sia nuku non Kot, ewe Sam Esemuch, me Noun we, Jises Kraist, me ewe Ngun mi Fen” (Ekkewe Nongonongen Achifoua 1:1). Ekkei unumon ra forata met ewe sia eita ngeni Unumon Kot.

Kot, ewe Sam Esemuch

Kot a wor inisin mi manau sefan ren inis me chu. I ewe Semenapen ngunuch. I a unusoch an tongei Noun semirit meinisin. Kot mi unusoch, a wor a manaman, me a sinei mettoch meinisin. I a pung, umoumoch, me kirekiroch. Sia nom ren Kot non pekin ngun me mwen ach uputiw. A tinikichetiw fonufan pwe sipwe kaeo me marita. An Kot ewe watten mochen ren kich noun semirit pwe sipwe niwin sefanino ren me nom sefan ren I mwirin ach mano. Kot a aiti kich pwe sipwe opuru Jises Kraist ne niwiniti fan mesen Kot.

Kraist a Afanafan non ewe Nenien Ngun, seni Roert T. Barrett

Jises Kraist

Jises Kraist a pwan wor inisin mi manau sefan ren inis me chu. I noun Kot emonun aat mi upwutiw. Me mwen ach uputiw, Kot a finata I pwe epwe nouch Chon Amanau. Wewen ei pwe Jises a feitiw fonufan an epwe ew minen apiru ngeni kich, a afanafana an ewe kapas allim, a fori ewe achasefan ren ach kewe tipis, me angasa kich seni mano. Punun Jises Kraist, sia tongeni musono seni ach kewe tipis nupwen sia aier. Jises Kraist a pwan riaffouni chommong mettoch pwe epwe tongeni weweiti me anisi kich. Jises Kraist a mano mwirin apwan manau sefan, a fori an epwe tufich ren kich meinisin sipwe manau sefan.

Sasing seni Getty Images

Ewe Ngun mi Fel

Ewe Ngun mi Fel i pwan chon ewe Unumon ewe ese wor inisin. I emon ngun. Ewe Ngun mi Fel a tufichin kapas ngeni ngunuch kewe. I a pwarata ngeni kich pwe mi wesewesen wor Kot me Jises Kraist ach Chon Amanau. Wisen ewe Ngun mi Fel chon atoura ngeni kich an Kot memefin tong, emwen me ourur. Nupwen sia papatais me epinipinino, sia angei ewe niffangen ewe Ngun mi Fel. Mwirin ach papatais, ewe Ngun mi Fel a tongeni nonnom rech fansoun meinisin ika sia aponueta an Kot kewe annuk.

Aewin Nemesepwi, seni Walter Rane

An Joseph Smith Aewin Nemesepwi

Non fansoun aramas ra osukosuk ussun met ewe Unumon Kot. Aramas ra tipefesen ren ifa ussun nikinikin Kot, Jises Kraist, me ewe Ngun mi Fel. Iei ew popun pwata ewe Aewin Nemesepwi an Joseph Smith a fokkun auchea. I a kuna pwe Samach Kot won Nang me Jises Kraist mi wor inisir me ir mi imufesen won inisir.

Rongorong, seni Michael Jarvis Nelson

Imufesen nge Chufengen

Pukefen me soufos ikenai ra aitikich pwe Kot, Jises Kraist, me ewe Ngun mi Fen mi imufesen inisir nge ew chok popun: ach manau fochofoch me manau ese much (nengeni Moses 1:39). Ussun chon ew chok kumi, Ra angang fengen ar repwe anisi kich iteiten ran. Sia tongeni mefi arapakan ngeni Ir nupwen sia aier seni ach kewe tipis me finata mi pung.

Uwokisin ussun ewe Unumon Kot

• Samach won Nang me Jises Kraist ir chok emon non popun (nengeni John 10:30).

• Samach won Nang a kapas ngeni Noun we (nengeni Matthew 3:16–17).

• Jises Kraist a kapas ngeni Saman we (nengeni John 11:41).

• Jises Kraist a iotek fan itach pun sipwe winit ew non ekoch raan (nengeni John 17:11).

• Joseph Smith a kuna Samach won Nang me Jises Kraist (nengeni Uruon—Joseph Smith 1:17).

• Ewe Ngun mi Fel a pwarata pwe Jises Kraist i ach Chon Amanau (nengeni John 15:26).

© 2021 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Porousen Liahona Iteiten Maram, June 2021. Chuukese. 17470 901.