Lako Mai, Mo Muri Au

Kunea na Kaukauwa mo Veivosoti

Mai vei David Dickson

Mekasini ni Lotu

Sa vakarota na Turaga meda vosoti ira na tani. O Koya na vukei keda ena kena muri na Nona ivunau, oka kina na kena oqo.

Vunau kei na Veiyalayalati 64:10

Droini mai vei Jim Madsen.

E so beka na ivunau e dredre me maroroi mai vei ira tale eso?

Oqo e dua e dau vakatitiqataki vakalewevuqa: “Ia koi au na Turaga au na vosoti ira ga kau sa lewa, ia koi kemudou sa kilikili mo dou vosota na tamata kecega” (Vunau kei na Veiyalayalati 64:10).

Wawa. Meda vosoti ira kecega era caka cala vei keda? Ena rawa beka?

E dua na ka mo vosota kina e dua ena nona tukuna vei iko e dua na ka viavialevu se me taura na iotioti ni madrai ena teveli ni vakayakavi. Ia vakacava na mavoa titobu? Na veimavoa bibi vakaoqo e rawa ni vakaseuta se veisautaka sara na ilakolako ni noda bula?

Ena so na gauna na noda rawata meda vosota e dua e vakararawataki keda vakaca sara e rawa vakilai ni dredre meda uabaleta.

Oqo na itukutuku vinaka: Ena veivuke i Jisu Karisito, eda na sega ni yalani ki na veika eda rawa ni cakava vakataki keda.

Na Veivuke a Gadreva

E dua na Lotu Vakarisito yalodina mai Netherlands na yacana o Corrie ten Boom e kunea saraga vakataki koya na kaukauwa ni kerei vua na Kalou me vukei koya me vosota e dua.

O koya kei tacina o Betsy erau a vesu tu ena keba ni veivakararawataki ena iKarua ni iValu Levu. A vosota o Corrie kei na so tale na veivakacacani rerevaki mai vei ira na sotia ni valeniveivesu e Nazi. A mate kina na tacina o Betsy ena vuku ni veivakacacani oya. A qai bula o Corrie.

Ni oti na ivalu, a kunea rawa o Corrie na kaukauwa veivakabulai me vosoti vei ira na tani. E dau wasea vakararaba vakawasoma o koya na nona itukutuku. Ia ena dua na siga a bolei vakalevu kina na nona vosa.

Ni oti e dua na vosa raraba, a sotavi Corrie e dua na sotia dau veivakalolomataki ni valeniveivesu mai na keba.

A tukuna vei Corrie ni sa yaco me Lotu Vakarisito mai na gauna ni valu ka sa veivutunitaka na veika rerevaki a vakayacora me vaka e dua na sotia ni valeniveivesu.

A dodoka yani na ligana ka kerea, “E rawa mo vosoti au?”

E dina sa vulica ka wasea na nona vosoti ira na tani, a sega ni rawa vei Corrie me ciqoma na ligana na turaga oqo ka vosoti koya—sega ni baleti koya ga.

A qai vola malua, “Me vaka ni buebue e lomaqu na vakanananu ni cudru kei na veiravuti, au raica na nodra ivalavala ca. … Turaga Jisu, au a masu, vosoti au ka vukei au me’u vosoti koya.

“Au a tovolea me’u matadredredre, [ka’u] saga me’u laveta na ligaqu. Au sega ni rawata rawa. Au a sega ni vakila e dua na ka, sega ni dua na caudre lailai madaga ni veivakatakatai se loloma cecere. Ka mani yaco tale me’u cavuta e dua na masu lo. Jisu, au sega ni rawa ni vosoti koya. Solia vei au na Nomuni veivosoti.

“Ni’u sa taura na ligana, a yaco e dua na ka veivakurabuitaki levu. Mai na tabaqu ka lako curuma yani na ligaqu, e dua na kaukauwa e vaka me pasi mai vei au ki vei koya, mai na vunilomaqu a vure mai kina e dua na loloma me baleta na vulagi oqo ka voleka ni vakadrukai au.

“Ka’u a mani dikeva rawa ni sa sega ni mai noda veivosoti me na levu cake mai na noda cakavinaka ka sa vakatautaki kina na veivakabulai ni vuravura, ia ena Nona. Ni dau tukuna vei keda o Koya meda lomani ira na noda meca, e solia o Koya, vata kei na ivakaro, na loloma vakaikoya.”¹

Sa tiko na Kalou me vukei iko mo muria na Nona ivunau, oka kina na ivakaro mo veivosoti—ena gauna madaga e dredre kina. E rawa ni vukei iko me vaka na Nona vukei Corrie ten Boom.

Na Veivakabulai e Ganiti Iko

Na bula e rawa ni veivakacalai. E dau sakuca. Ka sinai ena tamata taukena na digidigi vaKalou.

Ena veigauna oqori ni dua e digidigi ka vakavuna na mosi bibi—se ena vakacalaka sara madaga—e rawa ni o ciqoma na kaukauwa ni veivakabulai ni ko masuta na veivuke ka segata mo veivosoti.

Na noda na vosoti ira na tani ena kauta mai na veivakabulai ki na yalomu. Ena veivuke ni Kalou, ni o vosota e dua e caka cala vei iko, o sa vakalutuma tiko e dua na icolacola rerevaki mai na tabamu ka tarova tiko na nomu mua ki liu. Ena gauna madaga e dredre kina na salatu ni veivakabulai dina, vata kei na Kalou, o na sega vakadua ni taubaletaka duadua.

Na Cava e Sega ni Gadreva na Veivosoti

A vosa o Elder Jeffrey R. Holland ena Kuoramu ni iApositolo Le Tinikarua me baleta na ivakaro ni iVakabula meda ia na veivosoti. Qai kaya o koya:

“Sa bibi sara vei keda eda bula tu ena yaluma meda kila na veika a sega ni cavuta o Koya. A sega ni tukuna o Koya “E sega ni vakatarai mo vakila na mosi dina se na yaluma mai na veika veivakalolomataki e cakava vei iko e dua.” E sega talega ni kaya o Koya, ‘Me rawa ni taucoko nomu veivosoti mo na curuma tale mada e dua na veiwekani velavela se lesuva tale e dua na gauna ni veivakalolomataki ka veivakacacani.’ Ia se cava ga na veivakacacani dredre duadua e rawa ni yaco mai, e rawa walega ni da uabaleta na mosi ni da butuka na salatu ni veivakabulai dina.”²

Me kilai: Kevaka o sa sotava oti se o sa sotava tiko ena gauna oqo na veivakacacani cava ga, oka kina na veivakacacani vakayago, vakasama, se veiyacovi, tukuna vei nomu bisopi o gadreva mo sikovi koya ena salatu ni veivakabulai dina. E tu Vua na idola ni lewa ka na rawa ni vukei iko.

© 2021 mai na Intellectual Reserve, Inc. Dodonu kece e taqomaki Tabaki e Amerika. Vakadonui me vaka-Valagi: 6/19. Vakadonui me vakadewataki: 6/19. iVakadewa ni iTukutuku Vakavula ni Me iSakisaki ni Tabagone, June 2021. Fijian. 17470 858

iDusidusi

1. Corrie ten Boom, The Hiding Place (1971), 215.

2. Jeffrey R. Holland, Okot. 2018 koniferedi raraba (Ensign, se Liaona, Nove. 2018, 79).