Na Cava na Lewetolu Vakalou?

Na Tamada Vakalomalagi, Jisu Karisito, kei na Yalo Tabu eratou lewe tolu na tamata duidui ka dua ga na nodratou inaki.

E dua na edita ni niusipepa a taroga na Parofita o Josefa Simici se cava era vakabauta na lewe ni Lotu i Jisu Karisito ni Yalododonu Edaidai. Me kena isau, a vola na Parofita e 13 na itukutuku ni vakabauta eda vakatoka na Yavu ni Vakabauta. Na imatai e tukuna, “Keimami vakabauta na Kalou, na Tamada Tawamudu, kei na Luvena, ko Jisu Karisito, kei na Yalo Tabu” (Na Yavu ni Vakabauta 1:1). Eratou yavutaka na lewe tolu oqo na ka eda vakatoka me Lewetolu Vakalou.

Kalou, na Tamada Vakalomalagi

Taukena na Kalou na yago vakalagilagi, tawamate rawa vakalewe kei na sui. Na Kalou sa Tama ni yaloda. E lomani ira vakauasivi sara na Luvena. Na Kalou e sa vinaka vakaoti, taukena na kaukauwa kece, ka kila na ka kecega. O Koya e dodonu, dauloloma, ka yalovinaka. Eda a bula tu vakayalo kei na Kalou ni bera ni da sucu mai. A talai keda mai ki vuravura meda vuli ka tubu. Na gagadre cecere duadua ni Kalou kivei ira na Luvena yadua mera lesu ka bula vata tale kei Koya ni da sa takali yani. E vakavulica na Kalou meda muri Jisu Karisito meda lesu tale ki na iserau ni Kalou.

Jisu Karisito

O Jisu Karisito e vakayago cecere vakalewe kei na sui. Sa Luvena Duabau ga na Kalou. Bera noda sucu, a digitaki Koya na Kalou me noda iVakabula. Kena ibalebale ni a lako mai ki vuravura o Jisu me ivakaraitaki vei keda, vakavulica na Nona kosipeli, sorovaka na noda ivalavala ca, ka vueti keda mai na mate. Ena vuku i Jisu Karisito, sa rawa ni vosoti na noda ivalavala ca ni da veivutuni. A sotava talega o Jisu Karisito e vuqa na ka me na kila vinaka ka vukei keda kina. A mate o Jisu Karisito ka qai bula tale, ka rawa kina vei keda kece meda bula tale.

Na Yalo Tabu

Na Yalo Tabu sai koya e dua vei iratou na Lewetolu Vakalou ka sega ni vakayagona. Sai Koya na yalo. Sa rawa vua na Yalo Tabu me veitaratara vakadodonu kei na yaloda. E vakadinadinataka vei keda ni bula dina tiko na Kalou ka sa noda iVakabula o Jisu Karisito. Na Yalo Tabu e cakacaka vaka italai ni Kalou me solia vei keda na yalo ni loloma, veituberi, se veivakacegui. Ni da sa papitaiso ka vakadeitaki, eda sa ciqoma na isolisoli ni Yalo Tabu. Ni oti noda papitaiso, sa rawa ni tiko vata kei keda na Yalo Tabu ni da muria na ivakaro ni Kalou.

Na iMatai ni Raivotu nei Josefa Simici

Ni toso na gauna era sa veilecayaki na tamata me baleta na Lewetolu Vakalou. Era sa sega ni duavata na tamata ena ituvaki ni Kalou, Jisu Karisito, kei na Yalo Tabu. Oqo e dua na vuna e bibi kina na iMatai ni Raivotu nei Josefa Simici. A raica ni rau taukena na yagodrau na Tamada Vakalomalagi kei Jisu Karisito ka rau sa rua na tamata duidui.

Tawase ia e Duavata

Era vakavulica vei keda na ivolanikalou kei ira na parofita ni gauna oqo ni Kalou, o Jisu Karisito, kei na Yalo Tabu eratou sa kabula duidui vata kei na dua ga na inaki: na noda tawamate rawa kei na bula tawamudu (raica na Mosese 1:39). Me vakataki ira na lewe ni dua na timi, Eratou cakacaka vata me ratou vukei keda ena veisiga. E rawa meda vakilai Ratou ni da veivutunitaka na noda ivalavala ca ka digitaka na dodonu.

iVolanikalou me baleta na Lewe Tolu Vakalou

Na Tamada Vakalomalagi kei Jisu Karisito erau duabau ena inaki (raica na Joni 10:30).
A vosa na Tamada Vakalomalagi vua na Luvena (raica na Maciu 3:16–17).
A vosa vei Tamana o Jisu Karisito (raica na Joni 11:41).
A masulaki keda o Jisu Karisito meda yaco meda dua ena dua na siga (raica na Joni 17:11).
O Josefa Simici e raica na Tamada kei na Luvena o Jisu Karisito (raica na Josefa Simici—Ai Tukutuku 1:17).
Na Yalo Tabu e vakadinadinataka ni o Jisu Karisito e noda iVakabula (raica na Joni 15:26).

© 2021 mai na Intellectual Reserve, Inc. Dodonu kece e taqomaki Tabaki e Amerika. Vakadonui me vaka-Valagi: 6/19. Vakadonui me vakadewataki: 6/19. iVakadewa ni iTukutuku Vakavula ni Liaona, June 2021. Fijian. 17470 858