“Konwacack Kuh in Nuhnak Muhnahs,” Nuh ke kuh luhn Mwet Fuhsr, Jun 2021, 10–11.
Fahsruh, Fahsr Tukuk
Konwacack Kuh in Nuhnak Muhnahs
Leum El sapkihn nuh sesr in nuhnak muhnahs nuh sin mwet sahyac. El ac kahsrwe kuht in liyacacng masap Lal, oacyacpac ma se inge.
Sroallah sel James Madsen
Kuh kuhtuh masap uh upac in karihngihnyuck liki masap sahyac uh?
Pa inge sie masap ma ahksahngwengye mwet puhkantwen: Nga, Leum, e fah nuhnak muhnahs nuh sel suc nga e nuhnak muhnahs nuh se, tuhsruhk kom enenuh in nuhnak muhnahs nuh sin mwet nuhkwewa (liye Doctrine ac Covenants 64:10).
Kollac. Kuht enenuh in nuhnak muhnahs nuh sin mwet nuhkwewa ma oruh koluk nuh sesr uh? Yac ma se ingacn kuh?!
Sie ma pa in nuhnak muhnahs nuh sin mwet se ma fahk ma koluk nuh sum kuh in sruhkwack fuhlao se ma an luhlah ke tepuh ah. Tuhsruhk fuhkah nuh ke ma na upac uh? Ma upac koluk ma kuh in kuhnahoslah kuh ekuhllah fahsr luhn ohiyacn moul lasr uh?
Kuhtuh pacl uh kuh lasr in nuhnak muhnahs nuh sin mwet se ma ahkngalye kuht uh kuh in puhla ma tiac kuh in oreklac.
Pa inge pweng wo: Ke kahsruh lal Jisus Kraist, tiac tulokihnyuck kuht ke ma kuht kuh in oruh uh.
Kahsruh se ma El Enenuh ah
Mwet luhlahlfongi ke Kraist se fin acn Netherlands pahngpahng Corrie ten Boom konwacack sel sifacna kuh se ke siyuck sin God in kahsrwel nuhnak muhnahs nuh sin mwet se.
El ac muhtwacn se wiyacl pahngpahng Betsy sruhuh oasr ke nien kaul ke pacl se ke Mweun ahkluo ah. Corrie ac kuhtuh pac sahyac kuhtanglah ahkkohs na upac sin mwet topang luhn Natsi ah. Muhtwacn se wiyacl ah Betsy el misac ke srihpen acnwuck inge. Corrie el pain moullac.
Tukun mweun sac, Corrie el konwacack kuh in onwelah ke nuhnak muhnahs nuh sin mwet sahyac. El wacna akacsruhi ke mwe fahkwack lal ke acn puhslac mwet we. Tuhsruhk sie lwen ah kahs lal inge srihkeyuck.
Tukun na sramsram se lal nuh sin mwet puhkantwen, sie mwet topang ma koluk emeet ke prison sac fahsryang nuh yohrohl.
El fahk nuh sel Corrie muh el eklac Christian se ke sahflah mweun sac ac el auliyak ke ma koluk el oraclah ke el tuh ekihn mwet topang se ke presin ah.
El ahsroelah pahol ac fahk, “Kom kuh in nuhnak muhnahs nuh sihk?”
Sahyacn ma nuhkwewa ma el lotwelah ac akacsruhi ke nuhnak muhnahs nuh sin mwet sahyac uh, Corrie el tiac kuh in eis poun mukul se inge ac nuhnak muhnahs nuh sel—el tiac kuh in sifacna.
El suhmuhslah ke kuhtuh pacl tok,“Finne ke nuhnak foloyak, ac fohlohksahk tuhkuh nuh sihk, nga liye ma koluk kaclos. … Leum Jisus, nga pruhe, nuhnak muhnahs nuh sihk ac kahsreyuc nga in sang nuhnak muhnahs nuh sel.
“Nga srihke in isracsr, ac nga srihke in sang pouk. Nga tiac kuh. Wacngihn puhla luhk, wacngihn puhla fucsrfucsr kuh luhngse pwacye. Na oruh nga sulpacna pruhe. Jisus, nga tiac kuh in sang nuhnak muhnahs nuh sel. Use nuhnak muhnahs Lom.
“Ke nga sruok pahol ma wolacna emet uh sikyak. Ke finpihsuck sisken pouk ac nuh lun pouk oasr puhla oacna sahromrom tuhkuh nuh sihk kacl, ac ke insiyuck nga muhtwacwacack in puhla luhngse nuh sin mwet se inge ma apkuhran in kuhtangyuclac.
“Na nga konwacack lah tiac ke nuhnak muhnahs kuh ohiyac wo lasr muhkwena pa facluh kuh in eklac, tuhsruhktuh Kacl. Ke El fahk nuh sesr in luhngse mwet lokoalok lasr, El sang, wi pac masap se inge, luhngse pac.”1
God el wi kom in kahsrwe kom in liyacacng masap lal, wi pac masap se in nuhnak muhnahs—finne ke pacl upac. El kuh in kahsrwe kom oacna ke el kahsrwel Corrie ten Boom ah.
Onweyuck Se Ma Fal Kom In Eis
Moul uh el mwe srihkeyuck se. El okahrkahr. Ac nwacnwaclah ke mwet ma oasr God el sang sukohsohk in sulaclah se.
Ke pacl ma mwet se oraclah ma se ma usot nuh sum kweok—kom kuh in eis kuh in onweyuck ke kom pruhe in kahsreyuck kom ac kom kampare in nuhnak muhnahs nuh sin mwet uh.
Nuhnak muhnahs nuh sin mwet sahyac uh usot onweyuck nuh ke moul lom an. Ke kahsruh lal God, ke kom nuhnak muhnahs nuh sin mwet se ma oruh koluk nuh sum uh, kom sislah ma toasr na upac se liki finpihsom ma kuh in tulokihnkowi in tiac fahsr nuh met. Finne innek nuh ke onweyuck pwacye puhla muh upac, ke God, kom tiac enenuh in muhkwena fahsr.
© 2021 sin Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lweng nuh ke Monthly For the Strength of Youth Message, June 2021. Kosraean. 17470 868