Meac Sifen God?

Pahpah Tuhmasr Inkuhsrao, Jisus Kraist, ac Nguhn Muhtahl elos tiac ma se uh srihpac se fanna lalos.

Mwet orekma ke nuspwepuh tuh siyuck sel Mwet Pahluh Joseph Smith lah meac mempucr ke Alu luhn Jisus Kraist luhn Mwet Luhlahlfongi ke Lwen Sahflah luhlahlfongi uh. In sang topuk, Mwet pahluh Joseph Smith el suhmuhslah sacntacns 13 ma kuht pahngon muh Ip yohk ke Luhlahlfongi. Ma se met fahk muh, “Kuht luhlahlfongi ke God, Pahpah ma Pahtpaht, ac ke Wen Nahtuhl, Jisus Kraist, ac ke Nguhn Muhtahl” (Ip Yohk ke Luhlahlfongi 1:1). Ma tolu inge pa oraclah ma se kuht pahngon Godhead uh.

God, Pahpah ma Pahtpaht

Oasr mahno ac sri luhn God. El pa Pahpah tuhmwacn nguhn lasr. El luhngse kais sie tuhlihk nahtuhl oacna sie. God El suwohswohs, kuh nuhkwewa oasr Sel, ac El etuh ma nuhkwewa. El suwohs, pahkomuhta, ac kuhlwacng. Kuht nguhn weluhl God muhta met liki kuht isuslac. El suhpwekuhtme nuh facluh in lotwelah ac kapwack. Luhngse yohk luhn God nuh sin kais sie tuhlihk nahtuhl pa in fohlohk muhta yohrohl tukun kuht misac. God El luti kuht lah kuht enenuh in ukwacl Jisus Kraist fuhkah in fohlohklac nuh yohrohl.

Jisus Kraist

Oasr pac mahno in ikoac ac sri lal Jisus. El pa Wen se emeet nuhtin God. Met liki kuht isuslac, God El sulaclah Elan Mwet Lahngo lasr. Kalmac pa Jisus El tuhkuh nuh fin facluh in orwaclah mwe srihkasrak nuh sesr, luti wosasuc Lal, elah ma koluk lasr, ac molikuhtlac liki misac. Ke Srihpacl, kuht e kuh in eis nuhnak muhnahs ke ma koluk lasr ke kuht ac auliyak uh. Jisus Kraist El oacyacpac kweok ke ma puhs Elan muh kahlwem kac ac kahsrwe kuht. Jisus Kraist El misac ac sifilpac moulyak, use nuh sesr kwewa kuht in kuh in sifilpac moulyak.

Nguhn Muhtahl

Nguhn Muhtahl pa sie mwet ke sifac luhn God ma tiac oasr mahno la. El nguhn se. Nguhn Muhtahl El kuh in sramsram nuh sin nguhn lasr uh. El fahkwack nuh sesr lah God El pwacye ac lah Jisus Kraist pa mwet Lahngo lasr uh. Nguhn Muhtahl El mwet in tuhtahf se lal God in use puhla ke luhngse, kolyuck, kuh ahkkweyeyuck. Ke kuht pacptaislac ac ahkkweyeyucklac uh, kuht eis mwe sang luhn Nguhn Muhtahl. Tukun pacptais lasr, Nguhn Muhtahl kuh in wi kuht pacl nuhkwewa ke kuht liyacacng masap luhn God uh.

Aruhruhma Se Met Lal Joseph Smith

Ke puhluhn pacl mwet uh tuh fohsack ke sifac luhn God. Mwet uh tiac insese ke atacl God, Jisus Kraist, ac Nguhn Muhtahl. Pa inge srihpac oruh Aruhruhma se met lal Joseph Smith ah arulacna yohk srihpac uh. El liye lah Pahpah luhng ac Jisus Kraist oasr mahno lalos ac Elos mwet luo.

Maelihk tuh Ma se fanna

Ma suhmuhslah uh ac mwet pahluh lasr mihsenge uh luti kuht lah God, Jisus Kraist, ac Nguhn Muhtahl Elos tiac mwet se fanna tuh srihpac Lalos uh ma se fanna: moul in nguhn lasr uh (liye Moses 1:39). Oacna ke mwet ke oak soko fanna, Elos tuhkweni orekma in kahsrwe kuht lwen nuhkwewa. Kuht kuh in puhla fototo nuh Yohrohlos ke kuht auliyak ke ma koluk lasr ac sulaclah ma pwacye uh.

Ma suhmuhslah ke Sifen God

Pahpah Lucng ac Jisus Kraist Elos ma se fanna ke srihpac Lalos (liye John 10:30).
Pahpah Luhng El sramsram nuh sin Wen nahtuhl (liye Matthew 3:16–17).
Jisus Kraist El sramsram nuh sin Pahpah Tuhmwacl (liye John 11:41).
Jisus Kraist El pruhe tuh kuht in ma se fanna sie lwen (liye John 17:11).
Joseph Smith el liyaclwack Pahpah Luhng ac Jisus Kraist (liye Joseph Smith—History 1:17).
Nguhn Muhtahl El fahkwack lah Jisus Kraist pa mwet Lahngo lasr uh (liye John 15:26).

© 2021 sin Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lwenglah luhn Monthly Liahona Message, June 2021. Kosraean. 17470 868