Mei, Moltirakl er Ngak

Osiik a Klisiich el mo Ousubes

Mla er a David Dickson

Babier er a Ikelesia

A Rubak a mla mellach er kid el mo ousubes er a rebebil. Ngii a mo ngosukid el oltirakl a Llechul, el uldimukl er tiang.

Doctrine and Covenants 64:10

Sunga mla er a James Madsen

Ngarngii a bebil er a llechul a Dios el meringel a otireklel er a bai kuk bebil?

Tiakid a chimong el kora omekdakt er a rechad: Ngak el Rubak a mo ousubes er ngkel kuusubes er ngii, engdi kau a kirem el ousubes er a rokui el chad (Doctrine and Covenants 64:10).

Msall. Ng kired el ousubes er a rokui el chad el mla remuul a chebirukel el kired? Tiang locha meral sebechel?!

Ng kuk ta er a tekoi el ousubes er a chad el dillii a diak el ungil tekoi el mo er kau a lechub eng nguu sel mlo medechel el blauang el ngara bebul a tebel. Eng di aikel kmal ulis el mekngit el teletael a mekerang? A ikang el mekngit el teletael ng sebechel tomall a lechub eng ngodechii a klengar er kid?

A le bebil er a taem e sel dolasm el ousubes er a tara chad el mla tomelid a kmal meringel er kid a rullii.

Tiakid a ungil chais: Ngokiu a ngesou er a Jesus Kristo, eng kmal di sebeched el remuul a ikel sebeched.

Ngesou el Lousbech

A blak a rengul Kristiano el chad er a Netherlands el ngklel a Corrie ten Boom a miltik a klisiich se er a lolengit er a Dios mel ngeseuir el mo ousubes er a tara chad.

Ngii me a ochedal er a Betsy a mle kelbus er sel blil a kelbus er a temel a Ongeru el Mekemad. A Corrie me a rebebil a mlo chemau a kmal mekngit el teletael el mla er tirkel Nazi el mengkerengel a blil a kelbus. A ochedal er a Betsy a mlad eleng uchul tial mekngit el teletael. A Corrie a dimlak el mad.

A uriul er a mekemad, e a Corrie miltik a omekungil klisiich el mo ousubes er a rebebil. Ng mle blechoel ouchais a klemechel el mo er a buai. Ng mlo chemau a teletael el uai a blo skeng er ngii er a klaumernag er ngii er a tekoi el lulekoi.

Uriul er a cheldechedechal, ea tara tirkel mle mekngit a blekerdelel el mengkerengel a kelbus a mlo er a Corrie.

Ng dilu er a Corrie el kmo ngii a mlo Kristiano sera temel a mekemad e mla ouchel a rengul el kirel a ikel mekngit el omeruul el riruul sera le mengkerengel a kelbus.

Ng uldersii a chimal e uasei, “Ng sebechem lousubes er ngak?”

A ikel rokui el bla el suub e ouchais el kirel a ousubes er a rebebil, a Corrie dimlak el sebechel lorkedii a chimal ngkal chad e osubes er ngii—el kmal di ngii.

A uriul eng milluches, “Me sel ngesechel a renguk, a meral mlo klou, e ak miles a kengterir. … Rubak el Jesus, ak miluluuch, mousubes er ngak e mngosukak el ousubes er ngii.

“Ak milasm lotelechel, [e] mle meringel er ngak a odersii a chimak. Ng dimlak el sebechek. Ng dimlak a ngera kulchesuar er ngii, el diak di telkib el ungil reng a lechub eng bliochel el beltik el reng. Me ak lmuut el meluluuch er a chelsel a renguk. Jesus, ng diak el sebechek el ousubes er ngii. Beskak a klausubes er Kau.

“Sera kurkedii a chimal ea kmal ongasireng teletael a dilubech. Ngara ongelngelek el oeak a bkul chimak el mo er a chimak e ak mlo melechusar a mesisiich el remurt er a chelsel a bedengek el mo er ngikal chad, el renguk a tilobed a beltik el reng el mo er ngikal chad el kmal mle mesisiich.

“Me ak mlo medengei el kmo ng diak el klausubes er kid er a bai ungil blekeradel el beluulechad omekungil ultuil er ngii, ng bai klausubes er a Jesus. Sel ledung er kid el mo oubeltik el reng el mo er a chereued, Ngii a odersii, el obengkel a omellach, el kuk di beltik el reng.”¹

A Dios a ngarngii el olngeseu er kau el mo oltirakl a Llechul, el uldimukl er a llach el mo ousubes—me a locha el meringel. Ngii a mo ngosukau el di uai Ngii a lengesuir a Corrie ten Boom.

Omekungil el Kirel mo er Kau

A klengar a meringel. Ng chetituokl. E mui er a rechad el obang a klisichir el melilt el mla er a Dios.

Chelsel a ikel taem el tara chad a melilt el mo rullii a klou el ringel el merkau—a lechub eng dimlak er a rengul eng di rirellii—eng sebechem el nguu a omekungil klisiich sel moluluuch el olengit a ngeseu e melasm el mo ousubes.

A ousubes er a rebebil a meskau a omekungil. Ngokiu a ngesou er a Dios, e sel mousubes er a tara chad el rirellii a chebirukel teletael el mo er kau, ea berraod el mongol er ngii a mo diak e le ngii a sebechel tomer er kau er a ikel kirem el meruul. Me a sel rael el mo er a mera el omekungil a kora meringel, eng di mobengkel a Dios, eng diak di el kau el tang a merael er ngii.

Ngera a ikel Klausubes a Diak el Ousbech

Elder Jeffrey R. Holland er a Chelechad er a Teruich me a terung el Apostol a mle ta longedecheduch el kirel a llechul a Osobel el mo ousubes. Meng dilu el uasei:

“Eng di, ng klou a belkul bo modengei kemiu el kiei el ngara ringel el kmo Ngii a dimlak el du el kmo. Ng dimlak el du el kmo, ‘Ng diak bom molchesuar a ringel me a klengitelreng er a mekngit el omerellir a rebebil er a rechad.’ E dirrek el Ngii a dimlak el du el kmo, ‘A mo uchul e ko meral mo ousubes eng kiriu el melemolem malechub e ko mlemuut el mo er a chelsel a mekngit, el teletael.’ Eng di nguldimukl er a ikel kmal mekngit lomeruul duubech el mei er kid, e kid a sebeched el ngoriakl er a ringel sel sekum e kede soiseb er sel rolel a meral omekungil.”²

Uleklatk: Alsekum ke mmla mo chemau a lechub ke chemau a mekngit el teletael er a chelechal taem, el uldimukl er a blekeradel, tekoi er a reng, a lechub eng mekngit el deleboes el teletael, e bom sbedii a bishop er kau el kmo ng kirem el mo mesang el kirel a ngeseu me bo el sebechem el meral mo omekungil. Ngii a ngarngii a kiis er a klisiich el olab el sebechel mo ngosukau.

© 2020 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/19. Kengei er a Oidel: 6/19. Oidel a Klumech er a bek el buil el Kirel a Klisichir a Rengeasek, Ongelolem el buil 2021. Palauan. 17470 881

Uleklatk

1. Corrie ten Boom, The Hiding Place (1971), 215.

2. Jeffrey R. Holland, Oct. 2018 klou el ongdibel (Ensign or Liahona, Nov. 2018, 79).