Ngera a Kle Dios?

Chedam er a Babeluades, Jesus Kristo, me a Chedaol Reng a tedei el kakerous el chad el obang a chimo el moktek.

A editor er a simbung a mle ta el oker er a Profet Joseph Smith el kmo a rechedal a Ikelesia er a Jesus Kristo er a Uriul-klebesei el Santo ngera te oumerang. A nger, ea Profet a liluches a tacher me a kldei el tekoi el kirel a klaumerang el kid a omekedong el Tebechelel a Klaumerang. A kot el tekoi a uase, “Aki oumerang er a Dios, el Edam ra diak a Ulebengelel Klengar, me a Ngalek el Jesus Kristo, ma Edaol Reng” (Tebechelel a Klaumerang 1:1). A ikakid el kldei a rullii sel ngii a domekedong er ngii el Kle Dios.

Dios, el Edam ra diak a Ulebengelel Klengar

A Dios a mla mekiis el ngarngii a bedengel me a chiuesel. Ngii a Demal a delbenged. Ngii a betik a rengul er a ta me a ta el Rengelekel el di ungil. A Dios a cherrungel, e obang a rokui el klisiich, e medengei a rokui el tekoi. Ngii a melemalt, chubechub, e bekerurau. Kid a delbenged a kiliei lobengkel a Dios ruchei er a demechell. Ngii a uldureklid el mei er a beluulechad el mo mesuub e mukeroul. Sel kot el ngara chelsel a rengul a Dios el kirel a dersta er a Rengelekel a lmuut el mo kiei el Obengkel ruriul er a demad. A Dios a olsisechakl er kid el kmo ng kired el oltirakl er a Jesus Kristo me el sebeched el lmuut el mo er a rengedel a Dios.

Jesus Kristo

A Jesus Kristo a dirrek el mla mekiis e ngarngii a bedengel me a chiuesel. Ngii a Kot el Ngelekel a Dios. A uchei er a demechell, e a Dios a Ngileltii el mo Osobeled. Ng belkul a kmo a Jesus a mlei er a beluulechad el mo okesiu el merkid, olsisechakl er a ebangkelio er Ngii, e melngakireng a kengtid, e olsobel er kid er a kodall. Ngokiu a Jesus Kristo, eng sebechel mousubes a kengtid se el bo douchel a rengud. A Jesus Kristo a mlo chemau a betok el ringel me bo el Sebechel mo medengei e olngeseu er kid. A Jesus Kristo a mlad e liluut el mo ngar, el uchul a rokui el chad a sebechir el lmuut el mo ngar.

Chedaol Reng

A Chedaol reng a ta er a chedal a Kle Dios el diak a bedengel er a tech. Ng di ngarngii a delbengel. A Chedaol Reng a sebechel mengedecheduch el di melemalt el mo er a rengud. Ng ouchais er kid el kmo a Dios a merang e a Jesus Kristo a Osobeled. A Chedaol Reng a oureor loderchelel a Dios el mo meskid a beltik el reng, ulekrael, a lechub eng ongelaod. Sel de metecholb e demoterekokl, e kede nguu a sengk er a Chedaol Reng. A uriul er a techolbechelid er kid, ea Chedaol Reng a sebechel mo blechoel el obengked sel doltirakl a llechul a Dios.

Kot el Ues er a Joseph Smith

Cherrengel a taem ea rechad a mle rrau a rengrir el kirel a Kle Dios. A rechad a kautitekangel el kirel a Dios, Jesus Kristo, me a Chedaol Reng el kmo te osisiu. Tiang a ta er a uchul ea Kot el Ues el Joseph a Smith a milsang a kmal klou a ultutelel. Ng milsang el kmo a Chedam er a Babeluades me a Jesus Kristo a ngarngii a bedengir e teblong el kakerous el chad.

Blii eng di Tang

A chedaol llechukl me a re profet er a chelechal taem a olisechakl er kid el kmo a Dios, Jesus Kristo, me a Chedaol Reng a kakerous el chad el obang a chimol moktek: ng diak de mad me a diak a ulebengelel klengar (mesa Moses 1:39). Ng diuai a rechedal a osisiu el tim, Te dmak el oureor el olngeseu er kid. Ng sebeched el melchesuar el kmeed el mo er Tir sel douchel a rengud e melilt er a llemalt.

Chedaol Llechukl el kirel a Kle Dios

Chedam er a Babeluades me a Jesus Kristo a di tang a moktek er tir (mesa Johanes 10:30).
Chedam er a Babeluades a milngedecheduch el mo er a Ngelekel (mesa Mateus 3:16–17).
A Jesus Kristo a milngedecheduch el mo er a Demal (mesa Johanes 11:41).
A Jesus Kristo a miluluuch el kired me a tara klebesei e bo de tang (mesa Johanes 17:11).
A Joseph Smith a milsang a Chedam er a Babeluades me a Jesus Kristo (mesa Joseph Smith—History 1:17).
A Chedaol Reng a ouchais el kmo a Jesus Kristo a Osobeled (mesa Johanes 15:26).

© 2020 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/19. Kengei er a Oidel: 6/19. Oidel a Klumech er a bek el buil Liahona, Ongelolem el buil 2021. Palauan. 17470 881