Enam Ediwewet Nkpɔ

Etop otode Mme Adaibuot eke Mkparawa Irenowo

Ndiwet mme ekikere mbufo ke nte mbufo ekotde nwed Abasi eyenehede anwam mbufo ndibɔ-ukpeb.

Ɔkwɔrɔ-iko kiet eketiŋ ɔnɔ adaibuot mission esie ete, “Kpukpru ini eke ami nyomde nditɔŋɔ edikot nwed Abasi, ami nyeduɔ idap!” “Etie nte nwed Abasi edi ibɔk idap!”

Adaibuot esie ɔbɔrɔ ete, “Akananam nte afo emesiwet nkpɔ kini afo okotde?”

Ɔkwɔrɔ-iko oro ete, “Ihn-ihn.”

“Emem ndiduɔ idap mme ndiyak nnɔ ekikere mbufo ɔŋwɔŋɔre kini mbufo ekotde-kot kpɔt,” adaibuot oro ete, “edi oro imemke kini mbufo ediande ediwewet nkpɔ!”

Item emi adaibuot mission emi ɔkɔnɔde enyenen-mfina ɔkwɔrɔ-iko emi ama anam akamba ukpuhɔre. Ntre edieke mbufo eyomde obufa usuŋ ndisɔŋɔ edikot nwed Abasi mbufo, edomo item emi ese. Nte mbufo ewetde ebaŋa se mbufo ekotde, mbufo eyekeme ndikut idem mbufo nte enehede enam enyuŋ ekpeb ɔfɔn, nko.

Emi edi ubak usuŋ emi nnyin ikutde nte enehede anwam.

Brother Steven Lund:

Ami nyenim ikpa-babru mkpere-idem kini ami nkotde nwed Abasi. Nte Spirit etemede mi kini edikot mi, ami nwet mme ekikere oro nim.

Ami mma nnyene ifiɔk kiet nto Elder Richard G. Scott (1928–2015) eke Eboho mme Apostle Duopeba, emi eketinde ete, “Ewet mme akpan nkpɔ emi mbufo ekpebde eto Spirit enim ke eti ebiet. Mbufo eyekutete ke nte mbufo ewetde nti ntuuk mbufo enim, ediwak ntuuk eyedi. Nko, ifiɔk emi mbufo edinyenede eyedu ke ofuri eyo uwem mbufo” (“Man Enyene Ifiɔk ye Ɔsɔŋɔ Ndida oro nam Eti Nkpɔ,” Ensign, June 2002, 32).

Ami mmediɔŋɔ ke mme ikɔ oro edi akpanikɔ. Nte ami mbeŋede utiŋ-ikɔ ye ukpebnkpɔ, ami nyomke ke nwed Abasi kpɔt edi nyom nko nto ke se ami nkewet nim kini nkokotde mmɔ.

Brother Ahmad Corbitt:

Ami menehede mma ndiduŋɔre-nkot ibuot-ikɔ. Ami nkot nwed Abasi ke ntɔŋɔ kesim akpatre, edi ami nko mmema ndikot nkanare nyuŋ nduŋɔre mme ibuot-ikɔ. Nte uwutnkpɔ, ami nyeda Ndausuŋ Ibuot-ikɔ nyom itei-nwed Abasi ke mbuɔtidem mme eke editaŋ Israel mbok. Ntre ami nsiwetke esisit kpɔt, edi ami nsiwet se ami mkpebde man ami mfiɔk ke ami menehede ndiɔŋɔ nkpɔ oro. Kpukpru ini esikpa-mi-idem ke adaŋa ediwak nkpɔ eke ami nehede mfiɔk kini ami namde emi. Ami mesimek nditi usuk itie-nwed Abasi ke ibuot nko.

Brother Bradley Wilcox:

Ami mmenyene nwed uwet-nkpɔ eke ami nwetde mme itie-nwed Abasi ke mme ikɔ idem mi. Nte uwutnkpɔ, “Koro ata-owo ekedi asua ye Abasi” (Mosiah 3:19) akabare edi “Koro owo nkohore-idem ye unana edikabare-esit emekde ndidi asua ye Abasi, edi Abasi idihe asua esie. Abasi edi ata-akpan ufan esie.”

Ami mmesiwet mme mbume nko. Mmɔ ekeme ndidi mme mbume eke ami nkereke mbaŋa mbemiso ami nkot, mme mmɔ ndidi mme mbume emi otode ke se ami nkekot. Ke usuŋ ekededi, oro ɔnɔ mi ntiŋ-enyin.

Odudu Ediwet mme Ekikere Fo

Nnyin owo kiet-kiet ke presidency nnyin imesikot nwed Abasi nsio-nsio, edi ofuri nnyin imesiwet-nkpɔ kini nnyin ikotde!

Edikokot anwam nnyin ndikere nyuŋ nnyene ntuuk ke esit idem nnyin. Oro edi akpan-nkpɔ. Ndien kini nnyin itiŋde mme iwetde, nnyin idikut inyuŋ itiŋ mme ekikere ye ntuuk emi otode ke esit-idem ɔwɔrɔ edi. Nnyin ikop ke oro anwam nnyin ndinehede nda mme akpanikɔ ikɔ-Abasi nsin ke idem nnyin.

Akparawa kiet ɔkɔfiɔk akpanikɔ emi ɔnɔ idemesie kini ekedɔhɔde enye ete ɔnɔ utiŋ-ikɔ ke sacrament meeting. Enye esikop nte ediwak mbon efen enɔde utiŋ-ikɔ edi ikemeke nditi se esinamde. Ini enye emi ama okpuhɔ. Kini enye ekewetde utiŋ-ikɔ esie ke ibio-ibio, oro kpɔt ikenwamke enye ke ndinɔ inem etop, edi enye ama-eti oro ke anyan ini.

Ukem nkpɔ oro ekeme nditibe ke mbufo edikot nwed Abasi. Edieke mbufo eduɔde idap kini mbufo ekubɔre nwed Abasi mbufo, edi ini ndidemere-ke-idap. Edomo ndisio benetap, eto-nwed, phone, mme computer ndien tɔŋɔ ndiwet-nkpɔ. Eyekpa mbufo idem ke adaŋa ukpuhɔre se oro ekemede ndinam!

© 2021 otode Intellectual Reserve, Inc. Ekpeme kpukpru unen ndiming. Ekeming ke USA. Enyime edikabare ke Ikɔ Mbakara: 6/19. Enyime ndikabare: 6/19. Edikabare Etop eke Ofuri Ofiong emi Abaŋade Nsɔŋɔnda eke Iwaad, Ofiong July 2021. Efik. 17471 553