Ete Nnyin ke Heaven Oyom Nnyin Ndinem Esit

Nte nnyin itide uduak Abasi kabanga inemesit, nnyin iyekeme ndikut idara kpa ke ini uwem osongde.

Mbemiso nnyin ikedimana ke isong, kpukpru nnyin ikedung ye Ete Heaven nte ndito spirit Esie. Enye emen uduak kiet owut man anwam ndito Esie ndibo-ukpeb nyung nkori. Otode ke uduak Esie, nnyin imekeme ndikabare ntie-nte Enye nyung ndot ndidara nsinsi uwem. Uduak emi eyetibe koro Eyen Abasi, Jesus Christ, ama edi ke isong man obo ndutuhore ono mme idioknkpo nnyin, uwa kiet emi ekotde Erisio-isop.

Ekot duak eke Ete Heaven nte uduak

inemesit (se Alma 42:8),
erinyanga-ukpong (se Moses 6:62),
erifak (se Jacob 8:8), mme
mbom (se Alma 42:15).

Nte emi ye mme itie-nwed Abasi efen owutde, Ete Heaven oyom nnyin ikabare itie nte Enye, ifiak-inyong itiene Enye,inyung inehede inem esit (se Moses 1:39).

Nnyin Idi Isong man Ibo-ukpeb inyung Ikori

Abasi okono nnyin idi ke isong, ke ebiet emi nnyin ikemede ndinyene ikpokidem (se Genesis 1:26–27). Nnyin ima iyom mme ikpokidem man anwam nnyin ndifiok uwem ke isong.

Abasi ama odiongo ete ke nnyin idinyeneke inemesit ke ofuri ini. Nnyin iyefiok edikpu, ubiak, ye mkpa. Edi ke otode ke mme mfina eke uwem, Ete Heaven anwam nnyin nddibo-ukpeb nyung nkori.

Abasi nko ono nnyin unen-ndimek, ukeme edimek ke ufot eti ye idiok. Enye enyime ete nnyin imek in idem nnyin se nnyin ikerede inyung inamde. Enye ama ono nnyin mme nwed Abasi ye odu-uwem prophet man enwam nnyin ndimek se inende (se Abraham 3:25).

Edomo Ndibiet Jesus Christ

Abasi ikenoho nnyin idi ke isong ye unana uwutnkpo nditiene (se John 3:15). Abasi okono Eyen Esie, Jesus Christ edi, man ediwut nnyin usung. Man ikpeb nte iditienede Enye, nnyin imekeme ndikot mme nwed Abasi man ikpeb owo emi Enye edide ye se Enye akanam kini uwem Esie ke isong. Nnyin nko imekeme ndinam ata ukeme nnyin nditie nte Christ ke ndikop-item Abasi nyung mma mbon efen.

Kini nnyin inamde ndudue, nnyin ibup iyom erifen-nno inyung ida odudu Erisio-isop Jesus Christ man anwam nnyin ndikpuho. Nnyin imekeme ndinem-esit ke nte nnyin idomoke kpukpru usen ndikabare ntie nte Enye.

Mkpa Idige Akpatre

Kini nnyin ikpade, mme spirit nnyin onyong aka obio ekpo. Do ke nnyin ika iso ibo-ukpeb ke nte nnyin ibengeke-idem ino Eriset-ke-mkpa.

Kini Eriset-ke-mkpa, mme ikpokidem ye spirit nnyin eyefiak ediana kiet. Ikpokidem nnyin eyefon-ama, ndien nnyin idiboho ndutuhore mkpa ye udongo aba (se Alma 11:44–45). Ukem nte Jesus Christ akakpade ndien afiak odu uwem, kpukpru nnyin iyefiak idu uwem.

Kini Abasi edikpede-ikpe nnyin, Enye eyekere-abanga mme edinam ye udong nnyin. Edieke nnyin ikedomoke ndinim mme mbet ye enwongo emi nnyin ikenamde ye Ete Heaven, ekem nnyin iyekeme ndifiak ndu uwem ye Enye.

Uwem ye Abasi ye Mme Ufokemana Nnyin ke Heaven

Ke obio-ubong celestial, nnyin iyedu ye Abasi ye Jesus Christ. Nnyin nko iyekeme ndidu do ye mme ufokemana nnyin ke nsinsi edieke ekediande nnyin ye mmo otokiet. Nnyin iyekut emem, inemesit, ye nduok-odudu (se Mosiah 2:41).

Uwem nnyin ke isong ekeme ndisong ke ubak ini, edi edieke nnyin itienede Jesus Christ, nnyin iyekeme ndikut idara ke uwem emi ye nsinsi inemesit ke uwem eke edidide.

Nso Ke Ŋwed Abasi Etiŋ abaŋa Uduak Inemesit?

Usung eke nnyin idude uwem nnyin edi akpan-nkpo. Abasi eyekpe onyung ononnyin nkpo-eyen-utom etiene mme ekikere ye edinam nnyin (se Alma 41:3).

Satan edi asua ono inemesit nnyin. Enye odomo nnyin man ibiat uwem nnyin inyung inam idioknkpo. Enye oyom nnyin ete ikabare idi ndutahare ibiet enye (se 2 Nephi 2:27).

Kini nnyin inyenede mbuotidem ke uduak emi Abasi enyenede ono nnyin, nnyin iyekeme ndinyene emem ke suto mme idomo emi nnyin ikpekutde. Nnyin imekeme ndise iso man idung ke nsinsi ye Abasi (se Ukpebnkpɔ ye Mme Ediomi 59:23).

© 2021 otode Intellectual Reserve, Inc. Ekpeme kpukpru unen ndiming. Ekeming ke USA. Enyime edikabare ke Ikɔ Mbakara: 6/19. Enyime ndikabare: 6/19. Edikabare Etop Liahona eke Ofuri Ofiong, July 2021. Efik. 17471 553

Ofuri mbuwet-eduride oto J. Kirk Richards