“Isulat ang Imo Ginatun-an,” Para sa Kusog sang mga Lamharon, Hulyo 2021, 18–19.
Bulanan nga Mensahe sang Para sa Kusog sang mga Lamharon, Hulyo 2021
Isulat ang Imo Ginatun-an
Ang pagsulat sang imo mga panghunahuna samtang nagatuon ka sang balaan nga mga kasulatan makabulig gid sa imo nga makatuon.
“Tagsa nga magsugod ako basa sang balaan nga mga kasulatan, nagakatulugan ako!” siling sang isa ka misyonero sa iya pangulo sa misyon. “Daw bulong nga pangpatulog ang balaan nga mga kasulatan!”
Nagsabat ang iya pangulo, “Ginasulat mo bala ang imo natun-an kon magbasa ka?”
“Wala,” siling sang misyonero.
“Dali ka gid matulugan ukon magpamensar sang lainlain kon nagabasa ka lang,” siling sang pangulo, “pero imposible ini nga matabo kon idugang mo ang pagsulat!”
Dako ang epekto sang laygay sining pangulo sa misyon sa iya ginabudlayan nga misyonero. Gani kon nagapangita ka sang bag-o nga paagi para pabakuron ang imo pagtuon sang balaan nga mga kasulatan, tilawi ini. Kon imo ginasulat ang parte sa imo ginabasa, matukiban mo nga mas ginaganahan ka kag mas makatuon pa gid.
Ari ang pila ka pamaagi nga natukiban namon nga makabulig gid.
Brother Steven Lund:
May nahanda gid ako nga papel kon magbasa ako. Kon may ginapabatyag sa akon ang Espiritu samtang nagatuon, ginasulat ko ina nga mga pagpabatyag.
Nakuha ko ina nga ideya kay Elder Richard G. Scott (1928–2015) sang Korum sang Dose ka Apostoles, nga nagsiling: “Isulat sa sigurado nga lugar ang importante nga mga butang nga imo matun-an halin sa Espiritu. Makita mo nga kon imo isulat ang malahalon nga mga pagpabatyag, sa masami madamo pa gid ang nagaabot. Dugang pa dira, ang ihibalo nga imo mabaton mangin kaupod mo sa bilog mo nga kabuhi” (“To Acquire Knowledge and the Strength to Use It Wisely,” Ensign, Hunyo 2002, 32).
Nakahibalo ako nga matuod ang ina nga mga pulong. Samtang nagahanda ako sang mga pamulong-pulong kag mga leksyon, nagabasa ako indi lamang sang balaan nga mga kasulatan kundi lakip man sang akon mga ginsulat samtang ginabasa ko ang mga ini.
Brother Ahmad Corbitt:
Nanamian ako magtuon base sa topiko. Ginabasa ko ang balaan nga mga kasulatan halin sa puno pakadto sa punta, pero nanamian man ako maglumpat-lumpat kag magtuon base sa topiko. Halimbawa, ginagamit ko ang Guide to the Scriptures sa pagpangita sang balaan nga mga kasulatan parte sa pagtuo ukon sa pagtipon sang Israel. Dayon indi lang ako basta nga nagasulat, kundi ginasulat ko kon ano ang akon natun-an para siguruhon nga naintiendihan ko gid ini. Nagakakibot lang ako pirme nga mas maintiendihan ko ang mga butang kon himuon ko ini. Nagapili man ako sang pila ka balaan nga kasulatan nga sauluhon.
Brother Bradley Wilcox:
Nagatipig ako sang sululatan sang tinun-an [journal] kon diin ginasulat ko ang balaan nga mga kasulatan sa akon kaugalingon nga mga pulong. Halimbawa, “Kay ang kinaugali nga tawo isa ka kaaway sang Dios” (Mosias 3:19) nangin “Kay ang bugalon kag wala nagahinulsol nga tawo nagapili nga mangin kaaway sang Dios, pero ang Dios indi niya kaaway. Ang Dios iya suod nga abyan.”
Ginasulat ko man ang akon mga pamangkot. Mahimo nga mga pamangkot ini kon ano ang akon ginapamensar antes ako magbasa, ukon mahimo nga mga pamangkot ini nga nagsulod sa pamensaron bangod sang akon ginbasa. Bisan diin sa mga ini, nagabulig ini sa akon nga magtutok.
Ang Gahum sang Pagsulat sang Imo Panghunahuna
Tagsa sa amon sa pangulohan nagatuon sang balaan nga mga kasulatan sa lainlain nga paagi, pero tanan kami nagasulat samtang nagatuon!
Ang pagbasa nagabulig sa amon nga binagbinagon ang mga panghunahuna kag mga balatyagon. Importante gid ina. Kag kon maghambal kami ukon magsulat, nagakatukiban namon kag ginapahayag ang mga panghunahuna kag balatyagon halin sa sulod pa-gwa. Nabatyagan namon nga nakabulig ina sa amon nga idapat sa kaugalingon ang mga kamatuoran sang ebanghelyo.
Isa ka pamatan-on ang nakadiskubre sining kamatuoran sa iya kaugalingon sang ginpangabay sia nga maghambal sa pangsakramento nga miting. Madamo na sia sing nabatian nga iban nga naghambal pero indi niya madumduman ang mga detalye. Sa sini nga tion lain na. Sang ginbalay niya ang iya kaugalingon nga pamulong-pulong, wala lamang ini nakabulig sa iya nga maghatag sang organisado nga pamulong-pulong, kundi nadumduman niya ini sa malawig nga tion.
Mahimo man ini matabo sa imo pagtuon sang balaan nga mga kasulatan. Kon daw ginatuyo ka sa pagbukas sang imo balaan nga mga kasulatan, tion na para magbugtaw. Tilawi nga magkuha sang lapis, bolpen, telepono, ukon kompyuter kag sugdi nga magsulat. Makibot ka na lang sa epekto sini!
© 2021 by Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, July 2021. Hiligaynon. 17471 861