Bulanan nga Mensahe sa Liahona, Hulyo 2021

Gusto sang Aton Amay nga Langitnon nga Mangin Malipayon Kita

Kon aton panumdumon ang plano sang kalipayan sang Dios, makakita kita sang kalipay bisan pa nga mabudlay ang kabuhi.

Si Cristo upod ang kabataan

Antes kita nabun-ag sa duta, tanan kita nagpuyo upod sa Amay nga Langitnon bilang Iya mga anak nga espiritu. Nagpresentar Sia sang plano para buligan ang Iya mga anak nga magtuon kag mag-uswag. Paagi sa Iya plano, sarang kita nga mangin mas pareho sa Iya kag mangin kaangay-angay nga magbaton sang kabuhi nga wala katapusan. Ining plano nangin posible tungod ang Anak sang Dios, nga si Jesucristo, nagkari sa duta agud mag-antos para sa aton mga sala, isa ka sakripisyo nga ginatawag Pagbayad-Sala.

Ang plano sang Amay nga Langitnon ginatawag nga plano sang

• kalipayan (tan-awa sa Alma 42:8),

• kaluwasan (tan-awa sa Moises 6:62),

• pagtubos (tan-awa sa Jacob 6:8), ukon

• kaluoy (tan-awa sa Alma 42:15).

Sa ginapakita diri kag sa iban pa nga balaan nga mga kasulatan, gusto sang Amay nga Langitnon nga mangin pareho kita sa Iya, magbalik sa Iya, kag mangin matuodtuod nga malipayon (tan-awa sa Moises 1:39).

Nagkari Kita sa Duta para Magtuon kag Mag-uswag

Ginpadala kita sang Dios sa duta, kon diin kita makaangkon sang pisikal nga lawas (tan-awa sa Genesis 1:26–27). Kinahanglan naton sang mga lawas agud buligan kita nga maeksperiyensyahan ang kabuhi sa duta.

Nahibal-an sang Dios nga indi kita mangin malipayon sa tanan nga oras. Makaeksperiyensya kita sang mga kapaslawan, kasakit, kag bisan kamatayon. Pero sa tunga sang mga hangkat sang kabuhi, ginabuligan kita sang Amay nga Langitnon nga magtubo kag mag-uswag.

Ginhatagan man kita sang Dios sang pagbuot, ukon sang ikasarang nga magpili sa tunga sang maayo kag malain. Ginatugotan Niya kita nga magpili para sa aton kaugalingon sang aton hunahunaon kag himuon. Ginhatagan Niya kita sang balaan nga mga kasulatan kag buhi nga mga propeta agud buligan kita nga magtuon sa pagpili sang husto (tan-awa sa Abraham 3:25).

kahoy sang kabuhi

Tinguhai nga Mangin pareho kay Jesucristo

Wala kita ginpadala sang Dios sa duta nga wala sing sulundan nga halimbawa (tan-awa sa Juan 13:15). Ginpadala Niya ang Iya Anak, nga si Jesucristo, agud ipakita sa aton ang dalan. Agud makatuon kon paano Sia sundon, sarang naton basahon ang balaan nga mga kasulatan para mahibal-an ko sin-o gid Sia, kag ano ang Iya ginhimo sang nagakabuhi Sia sa duta. Sarang man naton himuon ang aton pinakamaayo agud mangin pareho kay Cristo paagi sa pagtuman sa Dios kag sa pagpalangga sa iban.

Kon magsayop kita, nagapangayo kita sang kapatawaran kag nagalab-ot sa gahum sang Pagbayad-Sala ni Jesucristo para buligan kita nga magbag-o. Sarang kita nga mangin malipayon samtang ginatinguhaan naton adlaw-adlaw nga mangin mas pareho sa Iya.

Ang Kamatayon Indi ang Katapusan

Kon mapatay kita, ang aton mga espiritu nagakadto sa kalibutan sang espiritu. Didto padayon kita nga nagatuon samtang nagahanda kita para sa Pagkabanhaw.

Sa Pagkabanhaw, ang aton mga lawas kag mga espiritu magaupod liwat. Ang aton mga lawas mangin perpekto, kag indi na kita liwat mag-antos sang kamatayon ukon balatian (tan-awa sa Alma 11:44–45). Pareho kay Jesucristo nga napatay kag nabuhi liwat, tanan kita magakabuhi liwat.

Kon hukman kita sang Dios, timbangon Niya ang aton mga aksyon kag ang aton mga handum. Kon gintinguhaan naton nga tumanon ang mga kasuguan kag ang mga promisa nga ginhimo naton sa Amay nga Langitnon, sarang kita nga magpuyo liwat upod sa Iya.

Kabuhi upod sa Dios kag sa Aton mga Pamilya sa Langit

Sa selestiyal nga ginharian, magapuyo kita upod sa Dios kag kay Jesucristo. Mahimo man kita nga magpuyo didto upod sa aton mga pamilya sa wala katubtuban kon naselyohan kita sa ila. Makaangkon kita sang paghidaet, kalipayan, kag kapahuwayan (tan-awa sa Mosias 2:41).

Ang aton kabuhi sa duta mahimo nga mabudlay kon kaisa, pero kon sundon naton si Jesucristo, makasalapo kita sang kasadya kag wala katapusan nga kalipay sa kabuhi nga magaabot.

Ano ang Ginasiling sang Balaan nga mga Kasulatan parte sa Plano sang Kalipayan?

Ang pamaagi nga nagapangabuhi kita importante. Hukman kita kag padyaan sang Dios suno sa aton mga panghunahuna kag aksyon (tan-awa sa Alma 41:3).

Si Satanas kaaway sang aton kalipayan. Ginatentar niya kita nga usikan ang aton kabuhi sa duta kag magpakasala. Luyag niya nga mangin miserable kita pareho sa iya (tan-awa sa 2 Nefi 2:27).

Kon may pagtuo kita sa plano sang Dios para sa aton, sarang kita makaangkon sang kalinong bisan ano pa ang pagtilaw nga aton atubangon. Sarang kita magpaabot nga magpuyo upod sa Dios sa katubtuban (tan-awa sa Doktrina kag mga Kasugtanan 59:23).

© 2021 by Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, July 2021. Hiligaynon. 17471 861

Tanan nga drowing iya ni J. Kirk Richards