“Aramidem ti Naisurat a Banag,” Para iti Pigsa dagiti Agtutubo, Hulio 2021, 18–19.
Binulan a Mensahe iti Para iti Pigsa dagiti Agtutubo , Hulio 2021
Aramidem ti Naisurat a Banag
Ti panangisurat kadagiti kapanunotam bayat ti panagadalmo kadagiti nasantuan a kasuratan ket talaga a makatulong kenka a makasursuro.
“Tunggal kanito a rugiak ti panagbasa kadagiti nasantuan a kasuratan, makaturturogak!” imbaga ti maysa a misionario iti mission presidentna. “Kasla man pampaturog a pildoras dagiti nasantuan a kasuratan!”
Simmungbat ti presidentena, “Agisursuratka kadi no agbasbasaka?”
“Saan,” kinuna ti misionario.
“Nalaka a makaturog wenno bay-am a mayaw-awan ti panunotmo no agbasbasaka laeng,” kinuna ti presidente, “ngem imposible a mapasamak daytoy no nayonam iti panagsurat!”
Ti balakad nga inted daytoy a mission president iti mangikarkarigatan a misionario ti nakaaramid iti dakkel a pagdumaan. Isu a no agsapsapulkayo iti maysa a baro a wagas a mangpapigsa iti panagadalyo iti nasantuan a kasuratan, padasenyo daytoy. Bayat ti panangisuratmo maipapan iti basbasaenyo, nalabit a matakuatanyo iti bagiyo nga ad-adda a naparegget ken agsursuro a nasaysayaat pay.
Dagitoy ti sumagmamano a pamuspusan a natakuatanmi a talaga a nakatulong.
Brother Steven Lund:
Adda iggemko a papel no agbasaak. No iparikna ti Espiritu kaniak kabayatan ti panagadalko, isuratko dagita a parikna.
Naalak ti ideya manipud ken ni Elder Richard G. Scott (1928–2015) ti Korum dagiti Sangapulo-ket-dua nga Apostol, a nagkuna: “Isuratyo iti natalged a lugar dagiti napapateg a banag a nasursuroyo manipud iti Espiritu. Makitayonto a no isuratyo dagiti napapateg a parikna, masansan nga ad-adunto pay ti dumteng. Kasta met, a ti pannakaammo a magun-odyo ket addanto a magun-od iti unos ti panagbiagyo” (“To Acquire Knowledge and the Strength to Use It Wisely,” Ensign, Hunio 2002, 32).
Ammok a pudno dagita a balikas. Bayat ti panangisaganak kadagiti mensahek ken adalek, mapanak saan laeng a kadagiti nasantuan a kasuratan ngem kadagiti pay insuratko kabayatan ti panagbasbasak kadagitoy.
Brother Ahmad Corbitt:
Pagaayatko ti agadal babaen ti topiko. Basaek dagiti nasantuan a kasuratan manipud iti rugi agingga iti gibusna, ngem kayatko pay a sublian ken adalen dagiti topiko. Kas pagarigan, usarekto ti Topical Guide a mangsapul kadagiti nasantuan a kasuratan maipapan iti pammati wenno ti panaguummong ti Israel. Kalpasaanna saanak laeng nga agisursurat, ngem isuratko no ania ti masursurok tapno masigurado a talaga a maawatak daytoy. Kanayon a nasdaawak iti no kasano ti kadakkel ti pannakaawatko kadagiti banag a nasaysayaat no aramidek daytoy. Pumiliak pay iti sumagmamano a nasantuan a kasuratan a yulok.
Brother Bradley Wilcox:
Addaanak iti study journal a pangisuratak kadagiti nasantuan a kasuratan iti bukodko a balikas. Kas pagarigan, “Ta kabusor ti Dios ti nailubongan a tao” (Mosiah 3:19) agbalin a “Ta kaykayat ti napasindayag ket saan nga agbabawi a tao ti agbalin a kabusor ti Dios, ngem saanna a kabusor ti Dios. Ti Dios ti kasingedan a gayyemna.”
Isuratko pay dagiti saludsod. Mabalin a dagiti saludsod a pampanunotek sakbay ti panagbasak, wenno mabalin a dagiti saludsod a tumaud iti no ania ti nabasak. Ania man kadagita a wagas, daytoy ti pangipamaysaak.
Ti Bileg ti Panangisurat Kadagiti Pampanunotem
Tunggal maysa kadakami iti panguluenmi agduduma ti panagadalmi kadagiti nasantuan a kasuratan, ngem agsuratkami amin kabayatan ti panagbasami!
Tulongannatayo ti panagbasa a mangaramat iti biagtayo dagiti kapanunotan ken panagrikna. Napateg dayta. Ket no agsarita wenno agsurattayo, matakuatan ken maipeksatayo dagiti kapanunotan ken panagrikna manipud iti kaunggan. Mariknatayo a makatulong kadatayo a mangipakat iti biagtayo dagiti kinapudno ti ebanghelio a nasaysayaat.
Natakuatan ti maysa nga agtutubo a lalaki daytoy a kinapudno para iti bagina idi nakiddaw kenkuana nga agsarita iti miting ti sakramento. Nangngegannan ti adu a dadduma pay a tao a nagsarita ngem dina malagip dagiti detalye. Naiduma daytoy a gundaway. Idi insuratna ti balabala para iti bukodna a panagsarita, saan laeng a nakatulong daytoy kenkuana a mangted iti naurnos a panagsarita, ngem nalagipna daytoy iti napaut a panawen.
Mabalin a mapasamak ti isu met laeng a banag iti panagadalyo iti nasantuan a kasuratan. No makaturturogkayo no ukradenyo dagiti nasantuan a kasuratanyo, orasen tapno agriingkayo. Padasenyo ti mangala iti maysa a lapis, pen, telepono, wenno computer ket mangrugi iti panagsurat. Masdaawkayonto iti no ania ti maaramid daytoy a pakaidumaan!
© 2021 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, July 2021. Ilokano. 17471 864