Tarigagayan ti Nailangitan nga Amatayo nga Agragsaktayo

Bayat ti pananglagiptayo iti plano ti Dios iti kinaragsak, makasaraktayo iti rag-o uray no narigat ti biag.

Ladawan

Ni Cristo ken dagiti ubbing

Sakbay a nayanaktayo ditoy daga, nagnaedtayo amin iti Nailangitan nga Ama kas espiritu nga annakna. Nangidatag iti maysa a plano a makatulong kadagiti annakna nga agsursuro ken dumur-as. Babaen iti planona, makapagbalintayo nga ad-adda pay a kas Kenkuana ken agbalin a maikari a mangsagrap iti agnanayon a biag. Posible daytoy a plano gapu ta ti Anak ti Dios, ni Jesucristo, immay iti daga tapno agsagaba para iti basbasoltayo, maysa a sakripisio a maawagan iti Pannubbot.

Naawagan ti plano ti Nailangitan nga Ama iti plano ti

kinaragsak (kitaen iti Alma 42:8),
pannakaisalakan (kitaen iti Moises 6:62),
Pannakasubbot (kitaen iti Jacob 6:8), wenno
asi (kitaen iti Alma 42:15

Kas ipakita dagitoy ken dadduma pay a nasantuan a kasuratan, tarigagayan ti Nailangitan nga Ama nga agbalintayo a kas Kenkuana, agsubli Kenkuana, ken agbalin a pudno a naragsak (kitaen iti Moises 1:39).

Umaytayo iti Daga nga Agsursuro ken Dumur-as

Imbaonnatayo ti Dios iti daga, a pakaaddaantayo iti pisikal a bagi (kitaen iti Genesis 1:26–27). Kasapulantayo dagiti bagi a makatulong kadatayo a mangpadas ti biag iti daga.

Ammo ti Dios a ditayo marikna ti ragsak iti amin a kanito. Mapadasantayo ti pannakapaay, saem, ken uray pay ipapatay. Ngem babaen kadagiti karit ti biag, tulongannatayo ti Nailangitan nga Ama nga agsursuro ken dumur-as.

Inikkannatayo pay iti karbengan nga agpili, ti kabaelan nga agpili iti nasayaat ken dakes. Pinagpilinatayo para iti bagbagitayo no ania ti panunoten ken aramidentayo. Inikkannatayo kadagiti nasantuan a kasuratan ken sisibiag a propeta a makatulong kadatayo nga agsursuro a pumili no ania ti umno (kitaen iti Abraham 3:25).

Ladawan

kayo ti biag

Ikarigatan ti Agbalin a kas ken ni Jesucristo

Dinatayo imbaon ti Dios iti daga nga awanan iti maysa a pagwadan a suroten (kitaen iti Juan 13:15). Imbaonna ti Anakna, ni Jesucristo, tapno ipakitana kadatayo ti wagas. Tapno masursuro no kasano ti mangsurot Kenkuana, mabalintayo a basaen dagiti nasantuan a kasuratan a mangsursuro no asino Isuna ken no ania ti inaramidna kabayatan ti panagbiagna iti daga. Mabalintayo met nga aramiden ti amin a kabaelantayo nga agbalin a kas ken ni Cristo babaen ti panagtungpal iti Dios ken panagayat kadagiti dadduma.

No agaramidtayo kadagiti biddut, dumawattayo iti pammakawan ken gun-odem iti bileg ti Pannubbot ni Jesucristo a makatulong kadatayo nga agbalbaliw. Makapagragsaktayo no ikarigatantayo iti inaldaw nga agbalin nga ad-adda pay a kas Kenkuana.

Saan a ti Ipapatay ti Paggibusan

No mataytayo, mapan dagiti espiritutayo iti lubong ti espiritu. Idiay nga ituloytayo ti agsursuro bayat ti panagsaganatayo para iti Panagungar.

Kabayatan ti Panagungar, agtiponto manen dagiti bagi ken espiritutayo. Agbalinto a perpekto dagiti bagitayo, ken saantayonton nga agsagaba pay iti ipapatay wenno sakit iti kaano man (kitaen iti Alma 11:44–45). Kas iti ipapatay ken panagsubli iti biag ni Jesucristo, agbiagtayonto amin manen.

No ukomennatayo ti Dios, ibilangnanto dagiti aramidtayo ken tarigagaytayo. No pinadastayo a tungpalen dagiti bilin ken kari nga inaramidtayo iti Nailangitan nga Ama, kalpasanna makipagnaedtayo manen Kenkuana.

Biag iti Dios ken kadagiti Pamiliatayo iti Langit

Iti celestial a pagarian, makipagnaedtayonto iti Dios ken ni Jesucristo. Makapagbiagtayonto pay idiay a kadua dagiti pamiliatayo iti agnanayon no mailantiptayo kadakuada. Masarakantayonto ti kappia, ragsak, ken inana (kitaen iti Mosiah 2:41).

Mabalin a narigat ti biagtayo iti daga no dadduma, ngem no surotentayo ni Jesucristo, makasaraktayo iti rag-o iti daytoy a biag ken agnanayon a ragsak iti umay a biag.

Ania ti Kuna dagiti Nasantuan a Kasuratan maipapan iti Plano ti Kinaragsak?

Napateg ti wagas a panagbiagtayo. Ukomennatayonto ti Dios ket gunggonaannatayo a mayannurot kadagiti panunot ken aramidtayo (kitaen iti Alma 41:3).

Ni Satanas ti kabusor iti panagragsaktayo. Sulisogennatayo a mangusar iti saan a nasayaat ti biagtayo iti daga ken agbasol. Kayatna nga agbalintayo a kas kenkuana (kitaen iti 2 Nephi 2:27).

No addaantayo iti pammati iti plano ti Dios para kadatayo, maaddaantayo iti talna ania man dagiti pannubok a sanguentayo. Mabalintayo a pasungadan ti pannakipagbiag nga agnanayon iti Dios (kitaen iti Doktrina ken Katulagan 59:23).

© 2021 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, July 2021. Ilokano. 17471 864

Amin nga aramid iti arte ni J. Kirk Richards