“Oruh Ma Sihmlac uh,” Nuh ke Kuhiacn Mwet Fuhsr Julahe 2021, 18—19
Mahlwem Nuhkwewa Nuh ke Kuhiacn Mwet Fuhsr Mwe Fahkwack, Julahe 2021
Oruh Ma Sihmlac uh
Suhmuhslah nuhnak lom ke kom lutlutkihn ma suhmuhslah uh kuh in kahsrwe nuh pwacye in eis etwacack.
“Pacl nuhnkwewa nga muhtwacwacack riti ma Suhmuhslah uh, nga ac mwetkweli!” sie misineri el fahk nuh sin misin prestuhn lal. “Oacna muh ma suhmuhslah uh pa sie ono in ahkmutul!”
Misin prestuhn se lal ah tohpohkuhllah fahk, “Kuh kom na sihmihs ma ke kom riti uh?”
“Moh,” misineri sac fahk.
“Fihsrwacsr kom in mwetkweli kuh fuhlwelah nuhnak lom an in srolah liki ke kom rit muhkwena uh,” prestuhn sac el fahk, “tuhsruhk upac ke kom sang sihm in welah uh!”
Kahs in kahsruh se misin prestuhn se inge sang nuh sin misineri elyah oraclah eklac na yohk. Na oruh fin kom ac sukok inkacnek sasuc in ahkkweye lutlut lom ke ma suhmuhslah, na kom kuh in srihke. Ke kom sihmihs ma kom riti uh, kom ac oacna in konwekomyak sifacna lah kom eiskomyak yohk ac lotwelah yohk, pac.
Pa inge kuhtuh ohiyackuht konwacack ma arulacna kahsruh.
Tamuhlwel Steven Lund
Nga sruok ipin pwepuh ke pacl nga rit uh. Ke Nguhn pihrihk yuc ke pacl in lutlut luhk, ngac suhmuhslah mwet ahknuhnak ingacn.
Nga eislah nuhnak se Lal Elder Richard G. Scott (1928–2015) ke U luhn Mwet Sap Singucul Luo ah, suc fahk: “Suhmuhslah ke sie acn karihngihnyuck wo ma yohk srihpac ma lom lotwelah sin Nguhn. Kom ac konwacack lah ke kom sihmihs ma mwe ahknuhnak sacohk inge, ac kuhtuh ac tuhkuh pac. Oacyacpac, etwacack ma kom eis uh fah oasr yurum ke lusen moul lom” (“In Rit Etwacack ac Kuh in Orekmakihn ke Lahlmwetmwet,” Ensign Jun 2002, 32).
Nga etuh lah kahs inge pwacye. Ke nga ahkolah sramsram ac mwe luti uh, nga tiac som muhkwena nuh ke ma suhmuhslah tuhsruhk oacyacpac nuh ke ma nga suhmuhslah ke pacl se nga rit uh.
Tamuhlwel Ahmad Corbitt:
Nga luhngse lutlutkihn sifac uh. Nga riti ma suhmuhslah eke muhtwacwacack ah nuh ke sahflahiyac ah, tuhsruhk nga oacyacpac luhngse srisri rauni ac lutlut ke sifac ah. Ke sie mwe srihkasrak, ngac fah orekmakihn Mwe Kolyuck luhn Sifac in suk kolyuck ke luhlahlfongi kuh fahsrweni luhn Mwet Israel. Na nga tiac sihmihs mwe lutlut na, tuhsruhk nga sihmihs ma nga lotwelah in liye lah pwacye nga arulacna kahlwem kac. Pacl nuhkwewa nga lut ke luhpan ma nga kahlwem kac yohk ke nga oruh ohinge uh. Nga oacyacpac sulaclah kuhtuh ma suhmuhslah in esamyac.
Tamuhlwel Bradley Wilcox:
Nga sihmihs journal in lutlut se nuhtihk yac nga sihmihs ma suhmuhslah ke kahs luhk sifacna. Ke sie mwe srihkasrak, “Tuh mwet luhngse ma luhn facluh el sie mwet lokoalok nuh sin God” (Mosiah 3:19) eklac nuh ke “Tuh mwet inse fuhlwact ac tiac auliyak sulwaclah in sie mwet lokoalok nuh sin God, tuhsruhktuh God El tiacna sie mwet lokoalok lal. God pa kawuck pwacye se lal uh.”
Nga oacyacpac sihmihs kihsensiyuck. Kihsensiyuck inge kuh in ma nga nuhnkuh met liki nga rit, kuh elos kuh in kihsensiyuck ma sahromromyak ke pacl se nga rit uh. Sie na sin ohiyac inge, oruh nga lohacng.
Kuh in Sihmihs Mwe Nuhnak Lom
Kais sie sesr ke prestuhnsi lasr uh lutlutkihn ma suhmuhslah uh Siena, tuhsruhk kuht nuhkwewa suhmuhslah oacna ke kuht oruh uh!
Rit uh kahsrwe kuht in isongyac mwe nuhnak ac puhla lasr uh. Yohk srihpac ma sacn. Ac ke kuht sramsram ac sihm uh, kuht sokwack ac ahkkahlwemye nuhnak ac puhla ma tuhkuh ke luhkuh ah. Kuht puhla lah kahsrwe kuht sifacna yohk ke ma pwacye luhn wosasuc.
Sie mukul fuhsr el konwacack ma pwacye se inge muh sel sifacna ke siyuckyuck sel in oruh sie sramsram ke pacl in miting luhn sacrament. El porongo sramsram luhn mwet puhkantwen sahyac tuhsruhk tiac kuh in esamyac ip srihsrihk kac. Pacl se inge siena. Ke el tahkuhnlah sihmihs ma muh ke sramsram lal sifacna uh, tiac kahsrwel muhkwena in oraclah sramsram lal ah, tuhsruhk el esamyac ke lusen pacl loeloes se.
Ma se inge kuh in sikyak nuh sum pac. Fin kom mwetkweli ke pacl se kom ikucslah ma suhmuhslah nuhtum an, pacl in muhtwaclihk. Srihke in olwack soko pinsucl an, pen, fon, kuh computer ac muhtwacack sihm. Kom fah lut ke ma eklac oreklac kac an!
© 2021 sin Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lweng nuh ke Mahlwem Nuhkwewa Nuh ke Kuhiacn Mwet Fuhsr Mwe Fahkwack, Julahe 2021. Kosraean. 17467 868