Pahpah Tuhmasr Inkuhrsao El Kena Kuht in Engan

Ke kuht esam plwacn in engan luhn God, kuht kuh in konwacack engan finne upac moul uh.

Met liki kuht isuslac nuh facluh, kuh nuhkwewa wi Pahpah tuhmasr Inkuhsrao muhta ekihn tuhlihk nguhn Nahtuhl. El oraclah plwacn se in kahsruh tuhlihk Nahtuhl in luti ac kapwack. Ke plwacn Lal, kuht kuh in muh oacna El ac in suwohswohs in engankihn moul ma pahtpaht. Plwacn se inge fihsrwacsr ke srihpen Wen nuhtin God, Jisus Kraist, tuhkuh nuh facluh in kweok ke ma koluk lasr, sie kihsac pahngpahng Iwaclah.

Plwacn lal Pahpah Lucng pahgnpahng plwacn in

engan (liye Alma 42:8),
moul ma pahtpaht (liye Moses 6:62),
molwelah (liye Jacob 6:8), kuh
pahkotwen (liye Alma 42:15).

Ke ma inge ac ma suhmuhslah sahyac ahkkahlwemye, Pahpah Lucng El kena kuht in muh oacna El, fohlohk nuh Yohrohl, ac in engan na pwacye (liye Moses 1:39).

Kuht Tuhkuh nuh Facluh in Lotwelah ac Kapwack

God El suhpwacma nuh facluh, yac kuht kuh in eis mahno ac ikoac lasr (liye Genesis 1:26–27). Kuht enenuh mahno in kahsrwe kuht moulkihn moul fin facluh.

God El etuh lah kuht fah tiac puhla engna pacl nuhkwewa. Kuht ac moulkihn mwe ahksuhpwacr, ngal, ac finne misac. Tuhsruhk ke mwe srihkasrak upac ke moul uh, Pahpah Lucng El kahsrwe kuht in lotwelah ac kapwack.

God El oacyacpac use sukohsohk in sulwaclah lasr, etuh lasr in sulwaclah inmahsrlon ma wo ac koluk. El lwelah nuh sesr in sulwaclah nuh sesr sifacna ke ma kuht nuhnkuh ac oruh uh. El use nuh sesr ma suhmuhslah ac mwet pahluh moul in kahsrwe kuht etuh in sulwaclah ma suwohs (liye Abraham 3:25).

Srihke in Oacna Jisus Kraist

God El tiac suhpwekuht mwe nuh facluh wacnihgn sie srihkasrak in ukwe (liye John 13:15). El suhpwacma Wen Nahtuhl, Jisus Kraist, in ahkkahlwemye nuh sesr inkacnek uh. In etuh lah ac Ukwacl fuhkah, kuht kuh in riti ma suhmuhslah in etuh lah suc El uh ac meac El oraclah ke moul Lal fin facluh. Kuht oacyacpac oruh kuhiyacsr in wo in oacna Kraist ke ahkostwen nuh sin God ac luhngse mwet sahyac.

Ke kuht oraclah ma tahfonglac uh, kuht siyuck nuhnak muhnahs ac fungyang nuh ke kuh ke Iwaclah luhn Jisus Kraist in kahsrwe kuht eklac. Kuht kuh in engan oacna ke kuht srihke kais sie lwen in muh oacna El.

Misac uh tiac pa Sahflah uh

Ke kuht misac uh, nguhn lasr uh som nuh ke facluh luhn nguhn. Insacn kuht tahfwelah in lotwelah ke kuht ahkolah nuh ke Sifil Moulyak.

Ke pacl in Sifil Moulyak uh, mahno ac nguhn lasr uh fah sifil fohlohkweni. Mahno lasr uh fah fas, ac kuht fah tiac sifil pac puhla kweokkihn misac kuh mas (liye Alma 11:44–45). Ke na Jisus Kraist El misac ah ac sifil moulyak ah, kuht nuhkwewa fah sifil pac moul.

Ke God El ac nuhnuhnke kuht uh, El fah sulwaclah ohiyacsr ac kena lasr uh. Fin kuht srihke in lilyacacng masap ac olwelah kuht oraclah nuh sin Pahpah tuhmasr Inkuhsrao, na kuht kuh in sifil Weluhl muhta.

Moul yurin God ac Sucu Lasr Inkuhsrao

Ke tohkohsrah luhn celstial, kuht fah moul yurin God ac Jisus Kraist. Kuht fah oacyacpac kuh in moul wi sucu lasr we ne tok ma pahtpaht fin kuht siliyucki nuh selos. Kuht fah konwacack mihs, engan, ac monglac (liye Mosiah 2:41).

Moul lasr fin facluh sahp ac upac ke pacl uh, tuhsruhk kuht fin ukwe Jisus Kraist, kuht kuh in konwacack engan ke moul se inge ac engan ma pahtpaht ke moul se fahsruh uh.

Meac Ma Suhmuhslah Fahk ke Plwacn in Engan?

Ohiyac kuht moulkihn uh pa yohk srihpac uh. God El fah nuhnuhnkuh ac opi kuht fal nuh ke nuhnak lasr ac ohiyacsr (liye Alma 41:3).

Satan el pa mwet lokoalok nuh ke engan. El srihfwe kuht in sopokloti moul lasr fin facluh ac in koluk. El kena kuht in muh kweok oacna el (liye 2 Nephi 2:27).

Ke oasr luhlahlfongi lasr ke plwacn luhn God nuh sesr, kuh in oasr mihs yohrohsr finne oasr ma upac kuht sun. Kuht kuh in ngwetlah rahrahlah in tuhkweni moul yurin God (liye Doctrine and Covenants 59:23).

© 2021 sin Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lwenglah luhn Mahlwem Nuhkwewa Liahona Mwe Fahkwack, Julahe 2021. Kosraean. 17467 868

Sroal nuhkwewa sel J. Kirk Richards