“A Demad er a Babeluades a Soal a bo dengara Deureng,” Liahona, July 2021
Klumech er a bek el buil Liahona Ongeuid el buil 2021
A Demad er a Babeluades a Soal a bo Dengara Deureng
Sel dolbedebek er a moktek er a Dios el kirel a deureng, eng sebeched el metik er a deureng luldimukl a dengara chelsel a ringel er a klengar.
Uchei er a demechell el mei er a beluulechad, e kede kiliei lobengkel a Chedam er a Babeluades el Ngelekel er a reng. Ngii a ulechotii a uldasou el mo ngosuterir a Rengelekel el mesuub e mukeroul. Ngokiu a Uldesuel, eng sebeched el mo uai Ngii e mo klikiid el mo nguu a diak a ulebengelel klengar. Tial luldasu a sebechel mekedmokl el Ngelekel a Dios a uchul, el Jesus Kristo, el mlei er a beluulechad e mlo er a ringel el kirel a kngtid, el ngii el ringel okedongall el Tngakireng.
A uldesuel a Chedam er a Babeluades a okedongall el luldasu er a
-
deureng (mesa Alma 42:8),
-
kiei el mo cherechar (mesa Moses 6:62),
-
mo suobel (mesa Jacob 6:8), a lechub
-
eng chubechub (mesa Alma 42:15
Aikang me a bebil er a chedaol llechukl ochotii el kmo, a Chedam er a Babeluades a soal a bo deuai Ngii, lmuut el mo er Ngii, e meral mo ngara deureng (mesa Moses 1:39).
Kede Mei er a Beluulechad el me Mesuub e Mukeroul
A Dios uldureklid el mei er a beluulechad, me bol sebeched el nguu a bedenged er a tech (mesa Genesis 1:26–27). Kede ousbech er a bedenged er a tech meng mo sebeched el kiei er tial beluulechad.
A Dios a mle medengei el kmo ng diak di bo dengara deureng er a bek el taem. Kede mo kurursii, e mo ngara ringel, e mo er a kodall. Eng di ngokiu a ringel er a klengar, e a Chedam er a Babeluades a ngosukid el suub a klubeled e mukeroul.
A Dios a dirrek el milskid a mimokl lomelilt, el ngii a techall el dolilt er a delongelel a ungil me a mekngit. Ngii a mechikid meng di kid el melilt aikel domdasu me a doruul. Ngii a mla meskid chedaol llechukl me a rengar el profet el ngosukid el mesuub e melilt er a ungil (mesa Abraham 3:25).
Molasm el Mo Uai a Jesus Kristo
A Dios a dimlak di lodureklid el mei er a beluulechad el diak okesiu el doltirakl (mesa Johanes 13:15). Ngii a uldureklii a Ngelekel Sechal, el Jesus Kristo, el mo chotii a melemalt el rael er kid. Sel mo uchul otirekled er Ngii, eng sebeched el menguiu chedaol llechukl el mo Medengelii me a ikel Ngii a riruul er a lengara beluulechad. Ng dirrek el sebeched el kmal melasm el mo uaia Kristo sel dolngesenges er a Dios e doubeltikereng er a rebebil.
E sel derelii a mekngit, eng sebeched lolengit a klausubes e mo ultuil er a klisichel a Tngkaireng er a Jesus Kristo el mo ngosukid el mengodech. Ng sebeched el mo ngara deureng sel dolasm er a bek el sils el mo uai Ngii.
A Kodall a Diak Lulebongel
Sel demad, e a delbenged a mo er a belurir a redeleb. E melemolem el mesuub e mengedmokl er kid el kirel Okiis er a kodall.
Sel taem er a Okiis er a kodall, e a bedenged me a delbenged a lmuut el mo dmak. A bedenged a mo cherrungel, e kid a diak deluut el mo er a kodall a lechub e mo desecher (mesa Alma 11:44–45). Ng di uaia Jesus Kristo el mlad e liluut el mo ngar, me kid me kede rokui el muut el mo ngar.
Sel bo loukerkeriil er kid a Dios, e Ngii a mo ultuil er aikel lomerelled me a soal a rengud. Alsekum e kede millasm loltirakl a llach me a telbiil el deriruul lobengkel a Chedam er a Babeluades, e seikid eng sebeched el mo kiei Lobengkel.
Klengar lobengkel a Dios me a Telungalek er kid er a Babeluades
Chelsel a rengedel a celestial, e kede mo kiei lobengkel a Dios me a Jesus Kristo. Ng dirrek el sebeched el mo kiei risei lobengterir a rtelunaglek er kid el mo cherechar alsekum e kede mloak el mo er tir. Kede mo ngara budech, deureng, me a ulengull (mesa Mosiah 2:41).
A klengar kid er a beluulechad a lebebil er a taem eng kmal mo meringel, eng di alsekum e kede oltirkal er a Jesus Kristo, eng sebeched el metik er a deureng er tial klengar me a diak a ulebengelel deureng er sel merael mei klengar.
Ngerang Dmu Chedaol Llechukl el kirel a Uldasu er a Deureng?
A teletelel a dekiei a kelngar kid a klou a ultutelel. A Dios a mo oukerkeriil e meluked er kid loltirakl a ngara uldesued me a omerelled (mesa Alma 41:3).
A Diablong a cherreuel a deureng er kid. Ngii a mengesuseu er kid el mo melemall er a klengar kid e meruul a mekngit. Ngii a soal a bo dekurusii e dengara ringel el uai ngii (mesa 2 Nephi 2:27).
Ng di sel sekum e ngarngii a klaumera er kid er a moktek er a Dios el kired, eng sebeched el metik er a budech el diak el iior er a ringel el dengara cheslel. Ng sebeched lolsingch el mo kiei el mo cherechar lobengkel a Dios (mesa Doctrine and Covenants 59:23).
© 2021 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/19. Kengei er a Oidel: 6/19. Oidel a Klumech er a Bek el Buil er a Liahona, Ongeuid el buil 2021. Palauan. 17471 881
A rokui el sunga a mla er a J. Kirk Richards