Ang Pagkapari sang Dios

Sang Pangkabilogan nga Pangulohan sang Young Women

Ang dapat mahibal-an sang tagsa ka lamharon parte sa priesthood kag ang ila koneksyon diri.

Natalupangdan bala ninyo kon daw ano ka makalilibog kon ang isa ka tinaga ginagamit sa duha ka paagi? Halimbawa, ang tinaga sa Ingles nga earth [duta] nagatumod sa pareho planeta nga aton ginapuy-an kag duta nga aton ginatindugan. Pareho ini nga husto, pero ang kahulugan kon inyo gamiton ang termino nagadepende sa kon ano ang inyo ginatumod sa sina nga tion. Agud dugangan ang inyo libog, kon ang earth nagakahulugan nga aton planeta, nalakip man diri ang ideya sang duta, kay ang duta ara sa planeta.

Pagpahangop sang Tinaga nga Priesthood

Isa ka termino nga aton ginagamit sa Simbahan sa duha ka paagi amo ang priesthood. Ang termino nagatumod sa bug-os nga gahum kag awtoridad sang Dios. Ugaling, ginagamit man naton ang priesthood sa mas limitado nga paagi—sa pagtumod sa “gahum kag awtoridad nga ginahatag sang Dios sa gin-ordinan nga mga nagakapot sang pagkapari sa pag-akto sa tanan nga butang nga kinahanglanon para sa kaluwasan sang mga anak sang Dios.”¹

Ang pagkapari nga ginhatag sa tawo indi ang kabug-osan sang gahum sang Dios. Ang masunod nga tsart nagapaathag sining punto.

Sa sining tsart makita ninyo ang pila ka mga halimbawa sang gahum sang Dios, nga wala sing katapusan kag wala sing dulunan. Sa sulod sina, makita man ninyo ang mga halimbawa sang gahum kag awtoridad sang pagkapari sang Dios nga Iya ginahatag, sa kaangay-angay nga mga lalaki sa paghikot sa Simbahan ni Cristo.

Mga Halimbawa sang Awtoridad sang Priesthood sa Inyo Kabuhi

Ang tanan nga mga bugay sang priesthood matigayon sang tanan nga pinalangga nga anak nga babayi kag lalaki sang Amay nga Langitnon. Ang ikaduha nga listahan nagapakita lamang sinang mga bugay nga nagaabot sa inyo paagi sa tawo nga nagakapot sang mga yabi sang priesthood ukon ginhatagan sang awtoridad sang priesthood.

Amo ini ang kahusay nga ginpahamtang sang Dios para sa pagtukod kag pagdumala sang Iya Simbahan sa duta. Iban pa nga mga halimbawa sang awtoridad sang priesthood nagalakip sang pangulo sang korum sang mga deacono ukon manunudlo nga may mga yabi sa pagpanguna sa buluhaton sang iya korum, mga bendisyon sang amay nga ginahatag sa panimalay, kag mga ordinansa kag mga kasugtanan sa templo.

Kalalakin-an, Kababayin-an, kag ang Priesthood

Bisan pa nga ang ordinasyon sa priesthood ginahatag lamang sa kalalakin-an, si Pangulong Dallin H. Oaks, Unang Manuglaygay sa Unang Pangulohan, nagpaathag sang isa ka importante nga prinsipyo: “Ang pagkapari isa ka diosnon nga gahum kag awtoridad nga ginsalig sa tawo agud gamiton sa buluhaton sang Dios para sa kapuslanan sang tanan Niya nga anak. Ang priesthood indi yadtong mga gin-ordinan sa isa ka palangakuan sang priesthood ukon mga nagagamit sang awtoridad sini. Ang mga lalaki nga nagakapot sang priesthood indi ang priesthood. … Indi naton dapat tumuron ang gin-ordinan nga mga lalaki nga priesthood.”²

Bisan pa nga ang kababayin-an wala ginaordinan sa pagkapari, si Pangulong Russell M. Nelson nagpaathag, “sang kamo ginpain sa pagserbisyo sa isa ka calling sa idalom sang direksyon sang isa nga nagakapot sang mga yabi sang pagkapari … ginhatagan kamo sang awtoridad sang pagkapari sa paggiho sa sina nga calling.”³ Pila sa mga halimbawa sini nagalakip sang mga panguluhan sa klase sa Young Women, mga misyonera nga nagawali sang ebanghelyo, mga lider sa mga ward kag stake nga ginpain agud magtudlo kag magpanguna, kag mga nagahikot sang ordinansa sa templo.

Ang Gahum sang Pagkapari Nagabugay sa Tanan

Ang mga bugay nga mabaton ninyo nga mga pamatan-on kag bataon nga mga babayi mabaton ninyo paagi sa mga kasugtanan nga inyo ginahimo sa tion sang bunyag kag sa mga kasugtanan nga inyo himuon sa templo. Bisan wala kamo sing isa nga nagakapot sang priesthood sa inyo balay, mabugayan kamo gihapon sang gahum sang pagkapari sang Dios samtang inyo ginatipigan ang mga kasugtanan nga inyo ginhimo upod sa Iya (tan-awa sa 1 Nefi 14:14).

Mientras nga nagapangabuhi kita suno sa aton mga kasugtanan, mabaton naton ang mga bugay nga nagapabakod kag nagapakamaayo sa aton. Ginahagad namon kamo nga binagbinagon ang mga bugay sang priesthood sa inyo kabuhi—ang mga bugay nga nagaabot bangud sang wala katapusan nga gahum sang pagkapari sang Dios kag sinang nagaabot partikular paagi sa awtoridad sang pagkapari nga ginhatag kag gintugyan sa Simbahan sang Dios.

© 2021 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, August 2021. Hiligaynon. 17472 861