Bulanan nga Mensahe sa Liahona, Agosto 2021

Ang Priesthood Amo ang Gahum sang Dios

Ginabugayan kita sang Dios paagi sa gahum sang priesthood. Ang mga bugay sang priesthood matigayon sang tanan.

Ang priesthood amo ang gahum sang Dios. Ginagamit Niya ining gahum agud pakamaayuhon ang tanan Niya nga anak kag buligan sila nga makabalik sa pagpuyo upod sa Iya. Ginhatag sang Dios ang gahum sang priesthood sa Iya mga anak sa kalibutan. Upod sining gahum, sarang sang mga lider sa priesthood nga pangunahan ang Simbahan, kag ang mga nagakapot sang priesthood makahikot sang sagrado nga mga ordinansa, pareho sang bunyag, nga makabulig papalapit sa aton sa Dios. Ang tanan nga lalaki kag babayi nga takos nga nagabaton sang mga ordinansa sang priesthood kag nagatipig sang mga kasugtanan (sagrado nga mga promisa) may kinamatarong sa gahum sang Dios.

Ang Gahum sang Priesthood Ginhatag kay Joseph Smith

Sang ari si Jesucristo sa duta, ginpangunahan Niya ang Iya Simbahan gamit ang gahum sang priesthood. Ginhatag man Niya ining gahum sa Iya mga Apostoles. Sa mga dinag-on pagkatapos sila nga mapatay, madamo sa mga miyembro ang nagpalayo sa Simbahan. Sayop nila nga gin-islan ang ebanghelyo kag ang paagi nga nagahikot ang Simbahan. Nadula na ang priesthood sang Dios sa duta. Sang1829, ginpadala ni Jesus si Juan Bautista kag sanday Apostoles Pedro, Santiago, kag Juan agud ihatag kay Joseph Smith ang priesthood. Ang Simbahan ni Jesucristo sang mga Santos sa Ulihing mga Adlaw amo lamang ang organisasyon sa duta nga may ari sining awtoridad halin sa Dios.

The Voice of Peter, James, and John [Ang Tingug nanday Pedro, Santiago kag Juan], iya ni Linda Curley Christensen kag Michael T. Malm

Mga Yabi sang Priesthood

Ang mga yabi sang priesthood amo ang awtoridad sa paggiya sang paggamit sang priesthood, pareho sang pagpahanugot sa paghikot sang mga ordinansa. Si Jesucristo ang nagauyat sang tanan nga mga yabi sang priesthood. Ang Pangulo sang Simbahan amo lamang ang tawo sa duta nga makagamit sang mga yabi sang priesthood agud panguhanan ang bilog nga Simbahan. Sa idalom sang iya direksyon, mahimo nga gamiton sang iban ang pila ka mga yabi agud himuon ang buluhaton sang Dios. Ang mga lider pareho sang mga bishop kag pangulo sang stake makagamit sang mga yabi sang priesthood agud pamunoan ang ila mga ward kag stake. Tungod ang mga tulumanon nga magserbisyo nagahalin sa mga lider nga may mga yabi sang priesthood, ang kalalakin-an kag kababayin-an nga nagaalagad sang mga palangakuan nagagamit sang awtoridad sang priesthood samtang ila ginahimo ang ila mga katungdanan.

Ang Priesthood ni Melquisedec kag Priesthood ni Aaron

Ang priesthood may duha ka bahin: ang Priesthood ni Melquisedec kag ang Priesthood ni Aaron. Paagi sa Priesthood ni Melquisedec, ginapamunoan sang mga lider sang Simbahan ang tanan nga espirituhanon nga buluhaton sang Simbahan, pareho sang pang-misyonaryo nga buluhaton kag buluhaton sa templo. Ang Priesthood ni Aaron nagagiho sa idalom sang awtoridad sang Priesthood ni Melquisedec. Ginagamit ini sa paghikot sang mga ordinansa kasubong sang bunyag kag sakramento.

Mga Bugay sang Priesthood

Paagi sa mga kasugtanan kag mga ordinansa, ginapatigayon sang Dios ang mga bugay sang priesthood sa tanan Niya nga anak. Ining mga bugay nagalakip sang bunyag, dulot sang Balaan nga Espiritu, ang sakramento, kag mga ordinansa sang templo. Ang mga lalaki kag babayi nga na-endow sa templo nagabaton sang dulot sang gahum sang pagkapari sang Dios paagi sa ila mga kasugtanan. Mabaton man naton ang mga bendisyon sang priesthood sang pag-ayo, pagpasulhay, kag giya.

Ano ang Ginasiling sang Balaan nga mga Kasulatan parte sa Priesthood?

Ang pagkapari nga nagluntad sa dumaan nga panahon amo man ang nagaluntad sa karon (tan-awa sa Moises 6:7).

Ang mga yabi sang pagkapari nagabulig sa pagsiguro nga matuman naton ang buluhaton sang Ginuo sing may kahusay (tan-awa sa Doktrina kag mga Kasugtanan 42:11).

Ang mga lalaki nga nagakapot sang pagkapari makagamit lamang sini “sa mga prinsipyo sang pagkamatarong” (Doktrina kag mga Kasugtanan 121:36).

Ang pila sa mga katungdanan sang mga nagakapot sang pagkapari ginalaragway sa Doktrina kag mga Kasugtanan 20:38–67.

© 2021 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, August 2021. Hiligaynon. 17472 861