Pristut luhn God

Sin Prestuhnsi Luhlahp luhn Muhtwacn Fuhsr

Ma mwet fuhsr nuhkwewa enenuh in etuh ke pristut ac kuhpahsr lalos nuh kac.

Kuh kom nuh akihlwen luhpan fohsack kac ke pacl se kahs se orekmakihnyuck ke ohiyac luo uh? Nuh ke sie atac an, ke kahs English uh kahs inge earth uh luhmweyuck kwewana nuhke facluh kuht muhta kac uh ac fohk ye niyacsr uh. Kwewana pwacye, tuhsruhk kalmweyac sum ke kom orekmakihn kahs sacn wiwi na ma kom sramsramkihn kac ke pacl sacn. In ahkfohsyeack kuhtuh, ke earth kalmac pa facluh lasr uh, oacyacpac weacng nuhnak se ke fohk, mweyen fohk pa oan fin facluh uh.

Ahkuhtweyac Kalmweyacn Kahs se Pristut

Sie kahs kuht orekmakihn ke Alu uh ke ohiyac luo pa pristut. Kahs sacn luhmweyuck nuh ke kuh nuhkwewa ac wal luhn God. Tuhsruhktuh, kuht oacyacpac orekmakihn pristut ke sie ohiyac sahyac—in luhma nuhke “kuh ac wal ma God El sang nuh sin mwet sruok pristut ma akmuhsralah in mukwikwi ke ma nuhkwewa ma enenweyuck nuh ke moul ma pahtpaht luhn tuhlihk nuhtin God.”¹

Pristut ma ituckyanq nuh sin mukul uh tiac pa kuh nuhkwewa luhn God uh. Chart se inge sruhlwaclah atac se inge.

Ke chart se inge, liye kuhtuh mwe srihkasrak ke kuh luhn God, suc ma pahtpaht ac wacngihn sruokyac. Lun ma se ingacn, kom ac oacyacpac liye srihkasrak ke kuh ac wal ke pristut luhn God ma El fihliyac fwac, kuh usot nuh sin, mukul suwohswohs in karihngihn Alu luhn Kraist.

Mwe srihkasrak ke Wal luhn Pristut ke Moul Lom

Mwe insewowo nuhkwewa ke pristut fihlfihllac nuh sin tuhlihk mukul ac muhtwacn nuhkwewa nuhtin Pahpah tuhmasr Inkuhsrao. Tahk soko ahkluo ingacn luhmweyuck na nuhsin elos suc sruok ki luhn pristut kuh oasr tari wal luhn pristut Ituckyang nuh sel.

Pa inge tahk se God El oraclah muh sin u kuh ohfuhs ke Alu Lal fin facluh. Srihkasrak sahyac ke wal luhn God oasr tikin se kuh prestuhn luhn mwet luti ke u srihsrihk suc oasr ki la in kol orekma luhn u lal, mwe insewowo se ituckyang nuh sin pahpah se in lohm se, ac akwuck ac olwelah muhtahl luhn tempuhl.

Mukul, Muhtwacn, ac Pristut

Akmuhsra uh ne ohinge orek nuh ke ofuhs luhn pristut nuhsin mukul muhkwena, Prestuhn Dallin H. Oaks, Mwet in Kahsruh Se Met ke Prestuhnsi Se Met, tuh ahkuhtweyac sie mwe luti yohk srihpac: “Pristut uh pa kuh ac wal fuhlwact sruokyuck ke Luhlahlfongi in orekmakihnyuck nuh ke orekma luhn God nuhke ahkwoyeyacn tuhlihk Nahtuhl nuhkwewa. Pristut tiacna elos suc ahkkweye nuh ke ofohs luhn pristut kuh elos suc orekmakihn wal lal. Mukul ma sruok pristut uh tiac elos pa pristut. … Kuht tiac enenuh in luhma mukul akmuhsralah ingacn muh elos pa pristut.”²

Muhtwacn uh tiac akmuhsralah nuhke pristut, Prestuhn Russell M. Nelson el ahkuhtweyac, “ke kom akmuhsralah in kuhlwacnsap ke kunohkohn se ye kolyuck luhn sie mwet suc sruok ki luhn pristut … utucklac nuhsum wal luhn pristut in orekma ke kunohkohn sacn.”³ Kuhtuh srihkasrak ke ma se inge som nuh kuhlahs luhn prestuhnsi luhn Muhtwacn Fuhsr, muhtwacn ma misineri fahkwelihk wosasuc, mwet kol ke ward ac stake suc srihsrngiyucki in luti ac kol, ac mwet orekma ke akwuck ke tempuhl.

Kuh luhn Pristut Ahkinsewowoye Mwet Nuhkwewa

Mwe insewowo ma kowos mukul ac muhtwacn fuhsr an eis uh ma lowos ut ke olwelah kowos oraclah ke pacptais ac ke olwelah muhtahl kowos fah orwaclah lun tempuhl. Finne wacngihn pristut lun lohm suwos, kom srackna kuh in ahkinsewowoyeyuck ke kuh luhn pristut luhn God in moul lom ke kom liyacacng olwelah muhtahl kom tuh orwaclah nuh Sel ah (liye 1 Nephi 14:14).

Ke kuht moulkihn fal nuhke olwelah muhtahl lasr, kuht eis mwe insewowo ma ahkkweye ac ahkinsewowoye kuht. Kuht suli kom in nuhnkuh yohk ke mwe insewowo luhn pristut in moul lom—mwe insewowo ma tuhkuh ke srihpen kuh wacngihn sahflahiyac luhn pristut luhn God ac elos ma tuhkuh suwohswohs mwe ke wal luhn pristut ma ituckyang ac oreklac ke Alu luhn God.

© 2021 sin Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lweng nuh ke Sramsram ke Nuh ke Kuhiyacn Mwet Fushr Mahlwem Nuhkwewa, Ohkohs 2021. Kosraean. 17472 000