“The Priesthood of God,” For the Strength of Youth, Aug. 2021, 20–21.
ຂ່າວສານປະຈໍາເດືອນ For the Strength of Youth ເດືອນສິງຫາ 2021
ຖານະປະໂລຫິດຂອງພຣະເຈົ້າ
ສິ່ງທີ່ຊາວໜຸ່ມທຸກຄົນຄວນຮູ້ກ່ຽວກັບຖານະປະໂລຫິດ ແລະ ຄວາມສຳພັນຂອງພວກເຂົາກັບມັນ.
ເຈົ້າເຄີຍສັງເກດເຫັນວ່າມັນສັບສົນຂະໜາດໃດບໍ ເມື່ອຄຳສັບຄຳໜຶ່ງຖືກໃຊ້ໃນສອງວິທີທາງ? ຍົກຕົວຢ່າງ, ໃນພາສາອັງກິດ ຄຳສັບທີ່ວ່າ ແຜ່ນດິນໂລກ ໝາຍເຖິງທັງດາວພະເຄາະທີ່ເຮົາອາໄສຢູ່ ແລະ ຂີ້ດິນທີ່ຢູ່ໃຕ້ຕີນຂອງເຮົາ. ທັງສອງຄວາມໝາຍກໍຖືກຕ້ອງ, ແຕ່ສິ່ງທີ່ເຈົ້າໝາຍເຖິງເມື່ອເຈົ້າໃຊ້ຄຳສັບນີ້ແມ່ນຂຶ້ນຢູ່ກັບສິ່ງທີ່ເຈົ້າກຳລັງກ່າວເຖິງຢູ່ໃນເວລານັ້ນ. ເພື່ອເຮັດໃຫ້ມັນສັບສົນຂຶ້ນໄປອີກ, ເມື່ອຄຳວ່າ ແຜ່ນດິນໂລກ ໝາຍເຖິງດາວພະເຄາະຂອງເຮົາ, ມັນຍັງລວມທັງຄວາມຄິດຂອງຄຳທີ່ວ່າ ຂີ້ດິນ, ເພາະຂີ້ດິນນັ້ນມີຢູ່ເທິງດາວພະເຄາະ.
ການກຳນົດຄວາມໝາຍຂອງຄຳສັບ ຖານະປະໂລຫິດ
ຄຳສັບໜຶ່ງທີ່ເຮົາໃຊ້ຢູ່ໃນສາດສະໜາຈັກໃນສອງວິທີທາງຄືຄຳສັບທີ່ວ່າ ຖານະປະໂລຫິດ. ຄຳສັບນີ້ໝາຍເຖິງອຳນາດ ແລະ ສິດອຳນາດທັງໝົດຂອງພຣະເຈົ້າ. ເຖິງຢ່າງໃດກໍຕາມ, ເຮົາຍັງໃຊ້ຄຳສັບ ຖານະປະໂລຫິດ ໃນທາງທີ່ຈຳກັດນຳອີກ—ເພື່ອໝາຍເຖິງ “ອຳນາດ ແລະ ສິດອຳນາດທີ່ພຣະເຈົ້າປະທານໃຫ້ແກ່ຜູ້ດຳລົງຖານະປະໂລຫິດທີ່ໄດ້ຮັບການແຕ່ງຕັ້ງ ເພື່ອໃຫ້ປະຕິບັດໃນທຸກສິ່ງທີ່ຈຳເປັນສຳລັບຄວາມລອດຂອງລູກໆຂອງພຣະເຈົ້າ.”1
ຖານະປະໂລຫິດທີ່ຖືກມອບໃຫ້ແກ່ຊາຍຄົນໜຶ່ງບໍ່ໄດ້ເປັນອຳນາດທັງໝົດຂອງພຣະເຈົ້າ. ຕາຕະລາງຕໍ່ໄປນີ້ຈະສະແດງໃຫ້ເຫັນຈຸດນີ້.
ຢູ່ໃນຕາຕະລາງນີ້ ເຈົ້າຈະເຫັນບາງຕົວຢ່າງຂອງອຳນາດຂອງພຣະເຈົ້າ, ຊຶ່ງເປັນນິດ ແລະ ບໍ່ມີຂອບເຂດ. ຢູ່ພາຍໃນນັ້ນ, ເຈົ້າກໍຈະເຫັນຕົວຢ່າງຂອງອຳນາດ ແລະ ສິດອຳນາດຂອງຖານະປະໂລຫິດຂອງພຣະເຈົ້າທີ່ພຣະອົງມອບໝາຍໃຫ້, ຫລື ປະທານໃຫ້ແກ່ຜູ້ຊາຍທີ່ມີຄ່າຄວນ ເພື່ອໃຫ້ປະຕິບັດວຽກງານຢູ່ໃນສາດສະໜາຈັກຂອງພຣະຄຣິດ.
ຕົວຢ່າງຂອງສິດອຳນາດຂອງຖານະປະໂລຫິດໃນຊີວິດຂອງເຈົ້າ
ພອນຂອງຖານະປະໂລຫິດທັງໝົດກໍມີໄວ້ໃຫ້ທິດາ ແລະ ບຸດທີ່ຮັກຂອງພຣະບິດາເທິງສະຫວັນທຸກໆຄົນ. ລາຍການອັນທີສອງກໍພຽງເປັນຕົວແທນໃຫ້ແກ່ພອນເຫລົ່ານັ້ນທີ່ມາສູ່ເຈົ້າ ຜ່ານທາງຜູ້ດຳລົງຂໍກະແຈຂອງຖານະປະໂລຫິດ ຫລື ໄດ້ຮັບສິດອຳນາດຂອງຖານະປະໂລຫິດທີ່ຖືກມອບໃຫ້ແກ່ລາວ.
ນີ້ຄືລະບຽບການທີ່ພຣະເຈົ້າໄດ້ສະຖາປະນາສຳລັບການຈັດຕັ້ງ ແລະ ການບໍລິຫານສາດສະໜາຈັກຂອງພຣະອົງຢູ່ເທິງແຜ່ນດິນໂລກ. ຕົວຢ່າງອື່ນໆຂອງສິດອຳນາດຂອງຖານະປະໂລຫິດຂອງພຣະເຈົ້າລວມທັງປະທານກຸ່ມມັກຄະນາຍົກ ຫລື ປະທານກຸ່ມຄູສອນ ຜູ້ທີ່ມີຂໍກະແຈເພື່ອຊີ້ນຳວຽກງານຂອງກຸ່ມຂອງລາວ, ພອນຂອງພໍ່ທີ່ຖືກມອບໃຫ້ໃນບ້ານ, ແລະ ພິທີການ ແລະ ພັນທະສັນຍາພຣະວິຫານຕ່າງໆ.
ຊາຍ, ຍິງ, ແລະ ຖານະປະໂລຫິດ
ເຖິງແມ່ນວ່າການແຕ່ງຕັ້ງສູ່ຕຳແໜ່ງຂອງຖານະປະໂລຫິດຖືກມອບໃຫ້ພຽງແຕ່ຜູ້ຊາຍ, ປະທານດາລິນ ເອັຈ ໂອກສ໌, ທີ່ປຶກສາທີໜຶ່ງໃນຝ່າຍປະທານສູງສຸດ, ໄດ້ອະທິບາຍຫລັກທຳສຳຄັນຂໍ້ໜຶ່ງວ່າ: “ຖານະປະໂລຫິດແມ່ນອຳນາດ ແລະ ສິດອຳນາດແຫ່ງສະຫວັນທີ່ໄດ້ຮັກສາໄວ້ເພື່ອນຳໃຊ້ສຳລັບວຽກງານຂອງພຣະເຈົ້າ ເພື່ອເປັນຜົນປະໂຫຍດໃຫ້ແກ່ລູກໆຂອງພຣະອົງທຸກຄົນ. ຖານະປະໂລຫິດ ບໍ່ໄດ້ໝາຍເຖິງຜູ້ຄົນທີ່ໄດ້ຮັບການແຕ່ງຕັ້ງສູ່ຕຳແໜ່ງຂອງຖານະປະໂລຫິດ ຫລື ຜູ້ຄົນທີ່ໃຊ້ສິດອຳນາດຂອງມັນ. ຜູ້ຊາຍທີ່ດຳລົງຖານະປະໂລຫິດບໍ່ໄດ້ເປັນຖານະປະໂລຫິດ. … ເຮົາບໍ່ຄວນເອີ້ນຜູ້ຊາຍທີ່ໄດ້ຮັບການແຕ່ງຕັ້ງວ່າເປັນ ຖານະປະໂລຫິດ.”2
ເຖິງແມ່ນວ່າຜູ້ຍິງບໍ່ໄດ້ຮັບການແຕ່ງຕັ້ງສູ່ຖານະປະໂລຫິດ, ປະທານຣະໂຊ ເອັມ ແນວສັນ ໄດ້ອະທິບາຍວ່າ, “ເມື່ອທ່ານຖືກແຕ່ງຕັ້ງເປັນທາງການ ເພື່ອຮັບໃຊ້ຢູ່ໃນຕຳແໜ່ງ ພາຍໃຕ້ການຊີ້ນຳຂອງຜູ້ທີ່ດຳລົງຂໍກະແຈຂອງຖານະປະໂລຫິດ … ທ່ານໄດ້ຮັບສິດອຳນາດຂອງຖານະປະໂລຫິດ ເພື່ອທຳງານໃນຕຳແໜ່ງດັ່ງກ່າວ.”3 ບາງຕົວຢ່າງແມ່ນລວມທັງຝ່າຍປະທານຫ້ອງຮຽນຍິງໜຸ່ມ, ເອື້ອຍນ້ອງຜູ້ສອນສາດສະໜາທີ່ສັ່ງສອນພຣະກິດຕິຄຸນ, ຜູ້ນຳໃນຫວອດ ແລະ ສະເຕກທີ່ໄດ້ຮັບການແຕ່ງຕັ້ງເປັນທາງການເພື່ອໃຫ້ສິດສອນ ແລະ ນຳພາ, ແລະ ພະນັກງານທີ່ດຳເນີນພິທີການໃນພຣະວິຫານ.
ອຳນາດຂອງຖານະປະໂລຫິດເປັນພອນໃຫ້ແກ່ທຸກຄົນ
ພອນທີ່ພວກເຈົ້າ ຊາຍໜຸ່ມ ແລະ ຍິງໜຸ່ມໄດ້ຮັບເປັນຂອງພວກເຈົ້າ ຜ່ານທາງພັນທະສັນຍາທີ່ພວກເຈົ້າໄດ້ເຮັດຕອນຮັບບັບຕິສະມາ ແລະ ພັນທະສັນຍາທີ່ພວກເຈົ້າຈະເຮັດໃນພຣະວິຫານ. ເຖິງແມ່ນວ່າພວກເຈົ້າບໍ່ມີຜູ້ດຳລົງຖານະປະໂລຫິດຢູ່ໃນບ້ານເຮືອນຂອງພວກເຈົ້າກໍຕາມ, ພວກເຈົ້າກໍຍັງສາມາດໄດ້ຮັບພອນດ້ວຍອຳນາດຂອງຖານະປະໂລຫິດຂອງພຣະເຈົ້າໃນຊີວິດຂອງພວກເຈົ້າ ຂະນະທີ່ພວກເຈົ້າຮັກສາພັນທະສັນຍາທີ່ພວກເຈົ້າໄດ້ເຮັດກັບພຣະອົງ (ເບິ່ງ 1 ນີໄຟ 14:14).
ຂະນະທີ່ເຮົາດຳລົງຊີວິດຕາມພັນທະສັນຍາຂອງເຮົາ, ເຮົາຈະໄດ້ຮັບພອນທີ່ເສີມຄວາມເຂັ້ມແຂງ ແລະ ເປັນພອນໃຫ້ແກ່ເຮົາ. ພວກເຮົາຂໍເຊື້ອເຊີນເຈົ້າໃຫ້ໄຕ່ຕອງພອນຂອງຖານະປະໂລຫິດໃນຊີວິດຂອງເຈົ້າ—ພອນທີ່ມີມາເພາະອຳນາດຂອງຖານະປະໂລຫິດຂອງພຣະເຈົ້າທີ່ບໍ່ມີທີ່ສິ້ນສຸດ ແລະ ພອນອື່ນໆທີ່ມີມາຜ່ານທາງສິດອຳນາດຂອງຖານະປະໂລຫິດໂດຍສະເພາະ ທີ່ຖືກປະທານໃຫ້ ແລະ ຖືກມອບໝາຍໃຫ້ໃນສາດສະໜາຈັກຂອງພຣະເຈົ້າ.
© 2021 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, August 2021. Laotian. 17472 331