ຖານະປະໂລຫິດຄືອຳນາດຂອງພຣະເຈົ້າ

ພຣະເຈົ້າອວຍພອນເຮົາຜ່ານທາງອຳນາດຂອງຖານະປະໂລຫິດ. ພອນຂອງຖານະປະໂລຫິດມີໄວ້ໃຫ້ທຸກຄົນ.

ຖານະປະໂລຫິດຄືອຳນາດຂອງພຣະເຈົ້າ. ພຣະອົງໃຊ້ອຳນາດນີ້ເພື່ອອວຍພອນລູກໆຂອງພຣະອົງທຸກຄົນ ແລະ ເພື່ອຊ່ວຍເຂົາເຈົ້າໃຫ້ກັບຄືນໄປອາໄສຢູ່ກັບພຣະອົງ. ພຣະເຈົ້າໄດ້ປະທານອຳນາດຂອງຖານະປະໂລຫິດໃຫ້ແກ່ລູກໆຂອງພຣະອົງຢູ່ເທິງໂລກ. ດ້ວຍອຳນາດນີ້, ຜູ້ນຳຖານະປະໂລຫິດສາມາດນຳພາສາດສະໜາຈັກ, ແລະ ຜູ້ດຳລົງຖານະປະໂລຫິດສາມາດດຳເນີນພິທີການສັກສິດ, ດັ່ງເຊັ່ນການບັບຕິສະມາ, ທີ່ຊ່ວຍເຮົາໃຫ້ເຂົ້າໃກ້ພຣະເຈົ້າຫລາຍຂຶ້ນ. ຍິງ ແລະ ຊາຍທຸກຄົນຜູ້ທີ່ຮັບເອົາພິທີການຂອງຖານະປະໂລຫິດຢ່າງມີຄ່າຄວນ ແລະ ຮັກສາພັນທະສັນຍາ (ຄຳສັນຍາສັກສິດ) ກໍສາມາດເຂົ້າເຖິງອຳນາດຂອງພຣະເຈົ້າໄດ້.

ຮູບພາບ

ສິນລະລຶກ

ອຳນາດຂອງຖານະປະໂລຫິດຖືກມອບໃຫ້ແກ່ໂຈເຊັບ ສະມິດ.

ຕອນພຣະເຢຊູຄຣິດຢູ່ເທິງໂລກ, ພຣະອົງໄດ້ນຳພາສາດສະໜາຈັກຂອງພຣະອົງດ້ວຍອຳນາດຂອງຖານະປະໂລຫິດ. ພຣະອົງຍັງໄດ້ປະທານອຳນາດນີ້ໃຫ້ແກ່ອັກຄະສາວົກຂອງພຣະອົງນຳອີກ. ໃນຫລາຍໆສັດຕະວັດຫລັງຈາກພວກເພິ່ນໄດ້ເສຍຊີວິດໄປ, ສະມາຊິກຫລາຍໆຄົນກໍໄດ້ຕົກອອກໄປຈາກສາດສະໜາຈັກ. ເຂົາເຈົ້າໄດ້ປ່ຽນແປງພຣະກິດຕິຄຸນ ແລະ ວິທີການທຳງານຂອງສາດສະໜາຈັກຢ່າງບໍ່ຖືກຕ້ອງ. ຖານະປະໂລຫິດຂອງພຣະເຈົ້າກໍບໍ່ໄດ້ຢູ່ເທິງໂລກອີກຕໍ່ໄປ. ໃນປີ 1829, ພຣະເຢຊູໄດ້ສົ່ງໂຢຮັນບັບຕິສະໂຕ ແລະ ອັກຄະສາວົກເປໂຕ, ຢາໂກໂບ, ແລະ ໂຢຮັນລົງມາມອບຖານະປະໂລຫິດໃຫ້ແກ່ໂຈເຊັບ ສະມິດ. ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍເປັນອົງການດຽວຢູ່ເທິງໂລກທີ່ມີສິດອຳນາດນີ້ຈາກພຣະເຈົ້າ.

ຮູບພາບ

ການຟື້ນຟູຖານະປະໂລຫິດແຫ່ງເມນຄີເສເດັກ

The Voice of Peter, James, and John [ສຽງຂອງເປໂຕ, ຢາໂກໂບ, ແລະ ໂຢຮັນ], ໂດຍ ລິນດາ ເຄີລີ ຄຣິສເຕັນເຊັນ ແລະ ໄມໂກ ທີ ມອມ

ຂໍກະແຈຂອງຖານະປະໂລຫິດ

ຂໍກະແຈຂອງຖານະປະໂລຫິດຄືສິດອຳນາດທີ່ຈະຊີ້ນຳການນຳໃຊ້ຖານະປະໂລຫິດ, ດັ່ງເຊັ່ນການໃຫ້ອະນຸຍາດເພື່ອດຳເນີນພິທີການຕ່າງໆ. ພຣະເຢຊູຄຣິດດຳລົງຂໍກະແຈຂອງຖານະປະໂລຫິດທັງໝົດ. ປະທານຂອງສາດສະໜາຈັກເປັນຄົນດຽວຢູ່ເທິງໂລກທີ່ສາມາດນຳໃຊ້ຂໍກະແຈຂອງຖານະປະໂລຫິດເພື່ອຊີ້ນຳຕະຫລອດທົ່ວສາດສະໜາຈັກ. ພາຍໃຕ້ການຊີ້ນຳຂອງເພິ່ນ, ຄົນອື່ນກໍສາມາດນຳໃຊ້ຂໍກະແຈບາງຢ່າງເພື່ອປະຕິບັດວຽກງານຂອງພຣະເຈົ້າ. ຜູ້ນຳດັ່ງເຊັ່ນອະທິການ ແລະ ປະທານສະເຕກນຳໃຊ້ຂໍກະແຈຂອງຖານະປະໂລຫິດເພື່ອນຳພາຢູ່ໃນຫວອດ ແລະ ສະເຕກຂອງພວກເພິ່ນ. ເປັນເພາະການເອີ້ນຕ່າງໆໃຫ້ຮັບໃຊ້ມາຈາກຜູ້ນຳທີ່ມີຂໍກະແຈຂອງຖານະປະໂລຫິດ, ບັນດາຊາຍ ແລະ ຍິງຜູ້ທີ່ຮັບໃຊ້ໃນການເອີ້ນກໍໃຊ້ສິດອຳນາດຂອງຖານະປະໂລຫິດຂະນະທີ່ເຂົາເຈົ້າປະຕິບັດໜ້າທີ່ຂອງເຂົາເຈົ້າ.

ຖານະປະໂລຫິດແຫ່ງເມນຄີເສເດັກ ແລະ ຖານະປະໂລຫິດແຫ່ງອາໂຣນ

ຖານະປະໂລຫິດມີສອງພາກສ່ວນ: ຖານະປະໂລຫິດແຫ່ງເມນຄີເສເດັກ ແລະ ຖານະປະໂລຫິດແຫ່ງອາໂຣນ. ຜ່ານທາງຖານະປະໂລຫິດແຫ່ງເມນຄີເສເດັກ, ຜູ້ນຳຂອງສາດສະໜາຈັກຊີ້ນຳວຽກງານທາງຝ່າຍວິນຍານຂອງສາດສະໜາຈັກທັງໝົດ, ດັ່ງເຊັ່ນວຽກງານເຜີຍແຜ່ ແລະ ວຽກງານພຣະວິຫານ. ຖານະປະໂລຫິດແຫ່ງອາໂຣນປະຕິບັດວຽກງານພາຍໃຕ້ສິດອຳນາດຂອງຖານະປະໂລຫິດແຫ່ງເມນຄີເສເດັກ. ມັນຖືກນຳໃຊ້ເພື່ອດຳເນີນພິທີການຕ່າງໆ ດັ່ງເຊັ່ນການບັບຕິສະມາ ແລະ ພິທີສິນລະລຶກ.

ຮູບພາບ

ການບັບຕິສະມາ

ພອນຂອງຖານະປະໂລຫິດ

ຜ່ານທາງພັນທະສັນຍາ ແລະ ພິທີການຕ່າງໆ, ພຣະເຈົ້າເຮັດໃຫ້ພອນຂອງຖານະປະໂລຫິດມີໄວ້ໃຫ້ລູກໆຂອງພຣະອົງທຸກຄົນ. ພອນເຫລົ່ານີ້ແມ່ນລວມທັງການບັບຕິສະມາ, ຂອງປະທານແຫ່ງພຣະວິນຍານບໍລິສຸດ, ສິນລະລຶກ, ແລະ ພິທີການພຣະວິຫານ. ບັນດາຊາຍ ແລະ ຍິງຜູ້ທີ່ໄດ້ຮັບເອົາຂອງປະທານສັກສິດໃນພຣະວິຫານ ກໍໄດ້ຮັບຂອງປະທານແຫ່ງອຳນາດຂອງຖານະປະໂລຫິດຂອງພຣະເຈົ້າ ຜ່ານທາງພັນທະສັນຍາຂອງເຂົາເຈົ້າ. ເຮົາກໍສາມາດໄດ້ຮັບພອນຂອງຖານະປະໂລຫິດແຫ່ງການປິ່ນປົວ, ການປອບໂຍນ, ແລະ ການຊີ້ນຳຄືກັນ.

ຮູບພາບ

ຄູ່ແຕ່ງງານໃໝ່ຢູ່ທີ່ພຣະວິຫານ

ພຣະຄຳພີກ່າວວ່າຢ່າງໃດກ່ຽວກັບຖານະປະໂລຫິດ?

ຖານະປະໂລຫິດທີ່ໄດ້ເປັນຢູ່ໃນສະໄໝບູຮານກໍຍັງເປັນຢູ່ແບບດຽວກັນໃນວັນເວລານີ້ (ເບິ່ງ ໂມເຊ 6:7).

ຂໍກະແຈຂອງຖານະປະໂລຫິດຊ່ວຍເຮັດໃຫ້ແນ່ໃຈວ່າ ເຮົາສຳເລັດວຽກງານຂອງພຣະຜູ້ເປັນເຈົ້າໃນວິທີທາງທີ່ເປັນລະບຽບ (ເບິ່ງ ຄຳສອນ ແລະ ພັນທະສັນຍາ 42:11).

ຜູ້ຊາຍທີ່ດຳລົງຖານະປະໂລຫິດສາມາດໃຊ້ມັນໄດ້ພຽງແຕ່ “ຕາມຫລັກທຳແຫ່ງຄວາມຊອບທຳເທົ່ານັ້ນ” (ຄຳສອນ ແລະ ພັນທະສັນຍາ 121:36).

ໜ້າທີ່ບາງຢ່າງຂອງຜູ້ທີ່ດຳລົງຖານະປະໂລຫິດແມ່ນຖືກບັນຍາຍໄວ້ຢູ່ໃນ ຄຳສອນ ແລະ ພັນທະສັນຍາ 20:38–67.

© 2021 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, August 2021. Laotian. 17472 331