“Itie-oku Edi Odudu Abasi,” Liahona, August 2021
Etop Liahona eke Ofiong, August 2021
Itie-oku Edi Odudu Abasi
Abasi odiong nnyin oto ke odudu eke itie-oku. Edidiong Itie-oku odu ono kpukpru owo.
Itie-oku edi odudu eke Abasi. Enye emen odudu emi odiong kpukpru ndito Esie onyung anwam mmo ndifiak ndidung ye Enye. Abasi ama ono odudu itie-oku osok ndito Esie ke isong. Ye odudu emi, mme ada ibuot itie-oku ekeme ndida usung ke Ufokabasi, nko mme akama itie-oku ekeme ndinam mme edisana ndutim, nte uduok mmong, emi awamde nnyin ndisik mkpere Abasi. Kpukpru irenowo ye kpukpru nwan emi ebode ndutim ke edisana ndaha enyung enimde ediomi (edisana unwongo) eyene unen ke odudu Abasi.
Ema eno Joseph Smith Odudu Itie-oku
Ini emi Jesus Christ okodude ke isong, Enye akada usung ke Ufokabasi Esie ye odudu itie-oku. Enye nko ama ono mme Apostle Esie odudu emi. Ke mme isua ikie emi ekebede ke mmo ema ekekpanga, ediwak mbon ufokabasi eduongo ekpong usung Ufokabasi. Mmo ke ndudue ekpuho ikoabasi ye usung emi Ufokabasi enamde mkpo. Itie-oku eke Abasi ikedugho ke isong aba. Ke 1829, Jesus odong John the Baptist ye Apostle Peter, James, ye John ndieyak itie-oku nno Joseph Smith. Ufok Abasi Jesus Christ eke mme Latter-day Saints edi nkukure eboho ke isong enyenede unen emi otode Abasi.
Uyio eke Peter, James, ye John, otode Linda Curley Christensen ye Michael T. Malm
Mme Ukpohore eke Itie-oku
Mme ukpohore itie-oku edi unen ke ndida itie-oku nam mkpo, nte ndino unen ke ndinam mme ndutim. Jesus Christ akama kpukpru mme ukpohore eke itie-oku. President eke Ufokabasi edi nkukwere owo ke isong ekemede ndimen mme ukpohore itie-oku nda usung ke ofuri Ufokabasi. Ke idanusung esie, mbon eken ekeme ndida ndusuk ukpohore nam utom Abasi. Mme ada ibuot nte mme bishop ye mme stake president emen ukpohore itie-oku ndida usung ke mme ward ye stake mmo. Koro ikoot ndida usung otode mme ada ibuot enyenede ukpohore itie-oku, mme irenowo ye iban emi enwamde ke ikoot enam unen itie-oku nte mmo enamde utom mmo.
Itie-oku Melchizedek ye Itie-oku Aaron
Itie-oku enyene uto iba: Itie-oku Melchizedek ye Itie-oku Aaron. Otode edi Itie-oku Melchizedek, mme ada ibuot ke Ufokabasi eno ndausung ke kpukpru utom eke spirit eke Ufokabasi, nte utom ukworo iko ye eke temple. Itie-oku eke Aaron enyene ufon ke idak unen eke Itie-oku Melchizedek. Emen enye enam ndutim nte uduok mmong ye udiaobong.
Mme Edidiong eke Itie-oku
Otode ke ediomi ye mme ndutim, Abasi anam mme edidiong itie-oku odu ono kpukpru ndito Esie. Mme edidiong emi odongo uduok mmong, eno Edisana Spirit, ye ndutim eke temple. Irenowo ye iban emi ebode ndutim eke temple ebo eno odudu itie-oku eke Abasi otode ke ediomi mmo. Nko nnyin imekeme ndibo mme edidiong edikok eke itie-oku, ndong esit, ye ndausung.
Nso Ke Ŋwed Abasi Etiŋ abaŋa Itie-oku?
Itie-oku emi okodude ke mme usen edem edi ukem nte enye emi odude idahaemi (seke Moses 6:7).
Ukpohore itie-oku anwam ke akpan ndinam utom Abasi oworo osu ke usung emi enende (seke Doctrine and Covenants 42:11).
Mme irenowo enyenede itie-oku ekeme ndinam enye “kpot ke ndaha edinen ido” (Doctrine and Covenants 121:36).
Ndusuk ke mme utom eke mbon ekamade itie-oku odu ke Doctrine and Covenants 20:38–67.
© 2021 otode Intellectual Reserve, Inc. Ekpeme kpukpru unen ndiming. Ekeming ke USA. Enyime edikabare ke Ikɔ Mbakara: 6/19. Enyime ndikabare: 6/19. Edikabare Etop Liahona eke Ofiong, August ke isua 2021. Efik. 17472 553