“Meleketek er Ngike el Kot Lungil Kau,” Kirel a Klisichir a Rengeasek, Sept. 2021, 6–7.
Klumech er a bek el buil Kirel a Klisichir a Rengeasek, Ongetiu el buil 2021
Meleketek er ngike elKot Lungil Kau
Kleim el teletael el kirel a teketekel a ungil e mui er a deureng el klengar.
Sunga er a Juliet Percival
A Rubak er a ledu er a Joseph Smith el mo omekedechor er a Templo er a Kirkland, eng dimlak lechitii me di lengii el tang el meruul er ngii. Ng ulechotii a teletael el mlo uchul a klungiolel.
Ng dilu Rubak el kmo, mokedecherur a blai el diak moltirakl er a teletael er a beluulechad. Mokedecherur loltirakl er a teletael el bo kuchotii er kau (Doctrine and Covenants 95:13–14). Me a Rubak a ulechotii a teletael el kirel okedecherul a templo (mesa Doctrine and Covenants 95:15–17).
Kede mereng a saul, le Rubak a mla ocholt a lmuut el betok el tekoi er kid el diak di lokedecherul a templo el merekong. Ng dirrek el mla meskid osisechakl el ngosukid el mo er sel kot lungil kid. Me sel doltirakl, e kede toketekii a klengar kid “el diak loltirakl er a teletael er a beluulechad” ng bai oltirakl er a teletelel a Rubak.
Aikakid a kleim el teletael el kirel a teketekel a ungil e mui er a deureng el klengar el ngara Jesus Kristo.
Toketekii a Mesisiich el Dodai
Ngii di el daiksang el chad a sebechel subedau el kmo a mesisiich el dodai a kmal klou a ultutelel er a omekedecheraol. A Helaman a ulisechakl el kmo a kot lungil dodai er a klengar kid a “Osobeled, el ngii a Kristo, el Ngelekel a Dios” (Helaman 5:12). Ng sebeched el rulii a Kristo el mo dodai er a klengar kid sel de mei er Ngii e doltirakl Osischeklel. Ngera komelchesiu sel mrelii a Kristo el mo dodai er a klengar kau?
Mesiou er a Rebebil
A tara ungil teletael er a teketekel a klengar kid, ng millekoi a President Dieter F. Uchtdorf, er sel taem er a -Longeru el Counselor er a First Presidency, a duubech sel “dosiou er a Rubak me a tirkel ngara bita er kid el chad.”1 Sel mosiou er a rebebil, e kau a meruul aikel luruul a Jesus e mesuub el mo uai Ngii. E diak di bo momekngeltengat a klengar er a rechad el mosiou er tir, ke dirrek el mo ngeltengat.
Mkedmeklii a Blechebech el Teletael er a Nglunguuch me a Omesubel Chedaol Llechukl
A dirrek el tara teletael el kirel a teketekel a ungil e mui er a deureng el klengar a sel moleketek er a ungil deleuill lobengkel a Chedam er a Babeluades me a Jesus Kristo. A kmal bedochel rolel tiang a okiu a nglunguuch me a omengiuel chedaol llechukl.
A President Uchtdorf a dilu el kmo: “Sel mo smisichii a deleuill er kid me a Dios, eng kired leklii a temed Lobengkel. Sel dekellechakl e dengara nglunguuch e dosuub chedaol llechukl er a bek el sils … a sebechel kmal ungil taem el dolekeed el mo er a Demad er a Babeluades.”2
A nglunguuch a techall el dongedecheduch er a Demad er a Babeluades. Ngii a medengelkid, oubeltik el reng el mei er kid, e soal rongesid! Sel dengara blakereng el nglunguuch, e doureng a saul, e dolengit aike el dousbech, e Ngii orrenges e blechoel longer er sel Teletelel me a Temel.
Sel kuk dosaod omesubel chedaol llechukl, eng diak a ulterekokl chimong el ungil rolel. A klou a belkul a kmo ke meruul er ngii! A President Russell M. Nelson a mla olisechakl el kmo, “A dmolech lomesubel a tekingel a Dios er a bek el sils a klou a ultutelel kirel a reng er kid.”3 A omesubel chedaol llehcukl er a bek el sils, a diak lokor, el mo ngosukau el toketekii a mesisiich el klaumerang.
Bom Teloi er Tirkel Tir a Mengelechel el Kau el mo Meruul a Ungil
A Chedam er a Babeluades a soal a bo de teloi e doleketek er a ungil deleuill lobengterir a rebebil er a rechad—oumesingd a telungalek me a resechelei. Kede blecheol suub a ngerang lokiu tirkel de teloi er tir el chad. A lechedal a Ikelesia me a lak, eng kirem el mo teloi er tirkel chad el ngosukau el melemolem loltirakl er a ebangkelio, oltirakl a llechul a Dios, e rullau el mo ungil chad. Ng dirrek el sebechem el ngosuterir tirkel ngara bita er kau el mo meruul osisiu el teletael. Te ngera el sechelim a ngosukau el toketekii a dodai er a llemalt?
Metik er a Deureng sel Moleketek er a Dodai er Kau
Ng betok a kuk bebil er a rolel e ke toketekii a mesisiich e mui er a deureng el klengar, el uaia mo er a ikelesia e melai er a sakrament, meruul e oltirakl a telbiil, e oltirakl a tekingir a rengar el profet.
Ng klou a ultutelel bo dodengei el kmo aika el rokui a dokokid loureor el kirel. Kede blechoel di meleketek e di mesuub, eng di diak el di el kau el tang oureor el kirel. A Rubak a mo ngosukau er a bek el sils sel molasm el meleketek er a klengar el kau me a Ngii a mo semeriar el kirel e mo uchul a deureng el mei er kau.
© 2021 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/19. Kengei er a Oidel: 6/19. Oidel a Klumech er a bek el buil el Kirel a Klisichir a Rengeasek, Ongetiu el buil 2021. Palauan. 17473 881