“Ngongliyem ngarim Fel’,” For the Strength of Youth, Sept. 2021, 6–7.
Milwol ni Ngan Thapeg ko biney e Pul ni Fan ko Gelngin e Pi’in ni Fal’yangren Milwol, September 2021
Ngongliyem ngarim Fel’
Ba’aray laal kanawo’en nrayag e falfalaen’ nge yafos nib mangil.
Juliet Percival e dag ya’an
Napan ni motochiyel nag Somoel ngak Joseph Smith ni nge toey fare Temple u Kirtland, dani pag ni nge milfan ngak rogon e gubin riy. Ke dag rogon nran rrin’ mara fel’.
“Ngan toey fare nu’un, ni gathi ngan toey ni wod rogon nima toey e fayleng e nu’un,” ni micheg Somoel. “Ngan toey ni wod rogon ni baygu dag rogon” (Doctrine and Covenants 95:13–14). Ma aram me dag Somoel rogon ni ngan toey fare temple (mu guy ko Doctrine and Covenants 95:15–17).
Ke magar, Somoel ni gathi kemus ni ke dag rogon ngodaed i toey e pi temple. Maki dag rogon ngodaed rogon ni ngaed fal’aged rogondaed ngaed fal’gaed. Napan gadaedra rrin’ e pin’ey, ma arram ni gadaed be toey e yafos rodaed ni “gathi rogon nima rrin’ e fayleng” machane rogon ni ke ngongliy Somoel.
Ba’aray laal’ kanawo’en nrayag e falfalaen’ nge yafos nib mangil ni bay Yesus Kristus riy u lukungun.
Toey e Deaf nib Gel
Gidii’en e dumow nu’un era yog ngom ni deaf nib gel ko nu’un e rib ga’fan ko fare nu’un ni yibe toey. Fil Helaman ni fare deaf ko nu’un nth’abi mangil ulan e yafos rodaed e “fare war ni Tabiyul rodaed, niʼir Kristus, ni fachaʼ ni Fak Got,” (Helaman 5:12). Rayag ni ngaed ted ni Kristus e ir fare deaf rodaed ni fa’anra gadaedra yib ngak min fol ko fapi machib Rok’. Uw rogon ni gabe thamiy ni gabe tay ni Kristus e Ir fare deaf ko yafos rom?
Pigpig ko Gidii’
Reb kanawo’en ni ngan toey e yafos, ni wod rogon ni yoeg President Dieter F. Uchtdorf, nge migid e ir fare-L’agruw e Counselor ko fare bin Somm’on e Presidency, era yib u napan “ni gadaed be pigpig ngak Somoel nge gidii’ ni bay u charendaed.”1 Napan ni gabe pigpig ngak e gidii’, ma aram ni gabe rrin’ ni wod rogon ni rrin’ Yesus ma aram ni gabe fil ni ngam bod Ir. Ma gathi kemus ni bay mu fal’ag wa’athan e pi gidii’ ni gabe pigpig ngak, machane bay kun tawa’ath nigem boech.
Mu Ngongliy Bang nge Par ni Ngiyal’ nge Tigil’ e Meybil nge Thin nib Thothup ni Ngan Fil
Reb kanawo’en nra falfalaen’ e yafos e ngan ga’nag fare tha’ rodaed ngak e Chitamangdaed ni bay u Tharmiy nge Yesus Kristus. Rogon ni ngan rrin’ e biney nib fel’ e ngan rrin’ u dakean e meybil nge fapi thin nib thothup ni ngan fil.
Ga’ar President Uchtdorf: “Ra ngan gelnag e tha’ rodaed ngak Got, ma rib tu’uf ni ngaed ted bang ko yafos rodaed ni kemus ni yigogadaed nge Ir. Meybil rodaed nge thin nib thothup ni gadaed be fil ni gubin e rran… era ayuwegdaed ngaed chuchugurgaed ngak e Chitamangdaed ni bay u Tharmiy.”2
Meybil e wo’en kanawo’en ni ngan non ngak e Chitamangdaed ni bay u Tharmiy. Manangdaed, gadaed ba tu’uf Rok’, ma ba’adag nge motoyil ngodaed! Napan ni gadaedra meybil u fithik’ e yul’yul’, min og nag e magar, min fith e pin’en nib tu’uf roraed, ma ra motoyil ma ra fulweg taban e meybil ko rogon ni be lemnag nge ngiyal’ ni manang nib fel’.
Napan nra yib ko tin ni yibe fil nib thothup, ma gathi ta’areb kanawo’en rogon nrayag ni ngan rrin’ mab fel’. N’en nib ga’fan e ngam rrin’! Ke fil President Russell M. Nelson, “Fil e thin rok Got ni gubin ngiyal’ e rib gaa’fan ko tin nib thothup ni ngan gel riy.”3 Fil e thin nib thothup ni gubin ngiyal’, e riyul’, nra ayuwegnem nge gel nag e mich ulan e yafos rom.
Mu Yilegnem ko Gidii’ ni ma Pii’ e Athamgil Ngom ngam Rrin’ e Mangil
Chitamangdaed ni bay u Tharmiy e ba’adag ni ngaed gaa’ niged e tha’ rodaed ngak boech e gidii’—nrib gaa’ ni fapi gidii’en e tabinaew rodaed nga fapi tafagar rodaed. Gadaed ma thil nge wod fapi gidii’ ni gadaed ma par u charenread. Demuturug ko gidii’en e Galasia fa danga’, mu liyegnem ko gidii’ nra ayuwegnem ngam fol ko gospel, mag fol ko fapi yalen rok Somoel, maga mang bee’ nib mangil. Ma krayag ni ngam ayuweg e gidii’ ni nge rrin’ ni kab ta’ab rogon ko biney. Bin ngan ko fapi tafagar rom e be ayuwegnem ngam toey fare deaf rom nga dakean e tin nib mat’aw?
Pir’eg e Falfalaen’ ko Dumow Nag e Deaf Rom
Bo’or rogon nrayag ni ngam toey e yafos rom ni nge par nib gel ko thothup mab gel e falfalaen’ riy, nib mu’un e yaen nga galasia ngan fek fare sacrament, fal’ag min fol ko fapi motochiyel, min rrin’ ni wod rogon fapi mulwol rok’ fapi profet nib fos.
Baga’fan ni ngan tay u wun’uy ni pin’ey e bagel e murwel nge ngiyal’ riy. Gubin ngiyal’ ma bay e dumow nu’un nge machib ni ngan fil, machane dariyfan ni ngan rrin’ ni kemus yigo gur rom. Somoel era ayuwegnem ni gubin e rran ko napan ni gabe gay rogon ni ngam rrin’ e tin nib mangil nra falfalaen’um me falfalan’ ngay nra fek e falfalaen’ ngalan e yafos rom.
© 2021 ko Intellectual Reserve, Inc. Gubin ma bay mat’won. Kan yoloey u Mariken. Kan micheg nag ko thin nu Ngalis: 6/19. Micheg i pilyeg: 6/19. Pilyeg ko Mulwol ni Fan ko Gelngin e Pi’in ni Fal’ Yangren, September 2021. Yapese. 17473 905